Unsaon Nato Pagtudlo sa mga Tawo mahitungod sa Plano sa Kaluwasan?

Ang gipadayag nga doktrina sa gipahiuli nga Simbahan ni Jesukristo nagtudlo nga ang tanang anak sa Dios—nga adunay limitado lang kaayo nga mga eksepsiyon nga ikonsiderar dinhi—sa kataposan mahidangat ngadto sa usa ka gingharian sa himaya. Sa kataposan, matag usa nato pagahukman sumala sa atong mga binuhatan ug mga tinguha sa atong mga kasingkasing. Sa dili pa kana, kita kinahanglang mag-antos alang sa atong wala mahinulsoli nga mga sala. Ang mga kasulatan klaro kaayo bahin niana. Dayon ang atong matarong nga Maghuhukom mopadala kanato ngadto sa usa niadtong tulo ka gingharian sa himaya.

Ang katuyoan sa plano—gipahayag sa doktrina ug mga palisiya sa gipahiuli nga Simbahan—mao ang pag-andam sa mga anak sa Dios aron maangkon ang kahimayaan sa celestial nga gingharian, ang kinatas-an nga ang-ang sa himaya. Apan dili tanan ang magtinguha ug takos niini. Tungod sa dako nga gugma sa atong Langitnong Amahan alang sa tanan Niyang mga anak, Siya naghatag og duha ka mas ubos nga mga gingharian sa himaya.

Kita nasayod sa bag-o nga pagpadayag nga ang “tanan nga mga gingharian adunay balaod nga gihatag.” Ang gingharian sa himaya nga atong madawat sa Kataposang Paghukom gitino pinaagi sa mga balaod nga atong gipili nga tumanon diha sa mahigugmaong plano sa atong mahigugmaong Langitnong Amahan. Ubos niana nga plano adunay tulo ka gingharian aron ang tanan Niya nga mga anak mahimong isangon ngadto sa gingharian sa himaya diin sila makahimo sa “pagtuman.” Matag usa niini mas maanindot pa kaysa atong masabtan. Ang Pag-ula ni Jesukristo naghimong posible niining tanan.

Pipila sa ubang dinasig nga mga pagtulun-an nga may kalabotan sa plano sa kaluwasan naghatag og panabot ug kahupayan. Sa mga paagi nga wala pa mapadayag, ang atong mga binuhatan didto sa atong kinabuhi sa wala pa dinhi sa yuta nakaapekto sa atong kahimtang sa mortalidad. Sa samang paagi, daghan sa labing importante nga gihikaw sa mortalidad pagatarongon didto sa kalibotan human sa kinabuhi dinhi sa yuta. Adunay milenyum diin ang mahinungdanong plano sa kalipay mohatag og panahon aron matuman ang tanang wala makompleto diha sa mga kinabuhi ni bisan kinsa nga takos nga mga anak sa Amahan.

Sa pagkakaron, ang Dios nagtinguha nga kitang tanan mogamit sa atong panahon sa mortalidad nga maningkamot sa Iyang kinatas-ang posible nga mga panalangin pinaagi sa pagtuman sa Iyang mga sugo, mga pakigsaad, ug mga ordinansa, ang tanan niini ipahigayon diha sa Iyang balaan nga mga templo nga gitukod sa tibuok kalibotan.

“Ang Pag-ula ni Jesukristo mao ang labing importante nga panghitabo sa kasaysayan sa tawo. Pinaagi sa Iyang maulaon nga sakripisyo, gihimo ni Jesus nga epektibo ang plano sa Amahan. Kita walay mahimo kon wala ang Pag-ula ni Jesukristo.”

Sama sa gipahayag sa atong propeta, ang Pag-ula ni Jesukristo mao ang “pinakasentro nga buhat sa tibuok tawhanong kasaysayan.”

Ako nadani nga ang atong labing mahinungdanong tumong sa pagsangyaw sa gipahiuli nga ebanghelyo ni Jesukristo karon mao ang pagkabig sa mga tawo ngadto ni Kristo.

Karon, samtang nagkadiyotay ang mga tawo nga nakasabot sa mahinungdanong misyon sa atong Ginoo ug Manluluwas, ang tema bahin ni Jesukristo kinahanglang mopatigbabaw sa atong pagtudlo.

Ang pagpatigbabaw bahin ni Jesukristo sa atong kasamtangang misyonaryo nga pagtudlo dinasig. Nag-anam kadaghan—ilabi na ang kabatan-onan ug mga young adult—kinahanglang makuha pag-usab gikan sa paglimod nga adunay Dios o Manluluwas o sa pag-ingon nga si Jesukristo tawo lamang—usa ka banggiitang magtutudlo apan dili Anak sa Dios nga adunay talagsaong misyon nga gilatid diha sa mga kasulatan nga gitudlo sa mga propeta.

Ang uban nagtuo nga bisan kon tingali adunay Dios, Siya wala maghimo og mga sugo nga nagkinahanglan og pagkamay-tulubagon, mao nga walay sala. Sa laing bahin niini mao nga ang tawo gawasnon sa pagsunod sa unsay gusto tungod kay ang Dios mihimo kanila niana nga paagi ug busa dili mosilot nila sa ilang mga gipili. Sa samang paagi, si Nephi mitudlo nga si Satanas adunay tulo ka paagi sa pagdaot sa mga anak sa Dios, ang duha niini mao ang pagtagbaw sa kaugalingon (“ang tanan maayo ra sa Zion”) ug walay pagtagad sa mga sugo (“walay impyerno”).

Ang labing epektibo nga paagi sa pagpakigbatok sa bisan unsa niadtong anti-Kristo nga mga ideya mao ang pagtudlo ug pagpamatuod sa katinuod ni Jesukristo ug ang kamahinungdanon sa Iyang misyon. Sa samang paagi, ang pagtudlo sa plano sa kaluwasan importante usab. Ang plano sa kaluwasan mao ang labing maayong tubag sa daghang pangutana nga nakasamok sa mga batan-on ug sa ilang mga higala nga dili mga Santos sa Ulahing mga Adlaw. Ang plano naghatag og gibug-aton sa atong doktrina sa Pagpahiuli ingon nga nagtutok nga mahimong takos sa kahimayaan didto sa celestial nga gingharian. Kini usab nagpakita kanato nga mahimong mapasaligon sa mahigugmaong mga pakigrelasyon uban niadtong dili mapasaligon ngadto niana nga doktrina.

Niining mortal nga kinabuhi, kita kinahanglang motutok nga mahimong takos sa kinatas-an nga ang-ang sa himaya didto sa celestial nga gingharian, diin si Jesukristo mahigugmaong mogiya kanato ug molig-on kanato. Ang mga pakigsaad nga gihatag diha sa plano sa kaluwasan naghatag nato og akses ngadto sa Iyang matubsanong gahom. Samtang magtinguha nga makaila ni Jesukristo ug moduol ngadto Kaniya pinaagi niana nga relasyon sa pakigsaad, Siya mohatag nato og gahom ug giya sa paghimo sa sakto nga mga pagpili, kay Siya mao ang dalan, ang kamatuoran, ug ang kinabuhi.