Pagtukod og mga Panimalay ug mga Pagpamatuod
Ang negosyo sa konstruksiyon ni Sarah mauswagon. Apan aduna siyay desisyon nga kinahanglang himoon.
Mga litrato pinaagi ni Christina Smith, gawas kon gipahibalo
Alang ni Noe, kini usa ka arko. Si Hari Benjamin mipatukod og usa ka tore. Ang Igsoong Lalaki ni Jared mihimo og mga barko. Ug para ni Sarah Christensen nga gikan sa Montana, USA? Aw, nakadesisyon siya nga gusto siyang motukod og mga balay.
Si Hermana Christensen, karon usa na ka full-time nga misyonaryo nga nagserbisyo sa Minnesota Minneapolis Mission, sa usa ka higayon medyo nasuko nga usa ka misyon ang nakabalda sa iyang mga tumong sa pagtukod—ug dili man gani ni iyang kaugalingong misyon!
Magsugod kita sa sinugdanan.
“Gitabangan nako akong papa sa pagtukod og mga butang sa tibuok nakong kinabuhi,” siya miingon. “Naanad na ko sa paggamit og maayo nga mga himan ug sa pagtukod, ug ganahan gayod ko niini. Busa, sa dihang ako 16 anyos ang panuigon, nakahukom ako nga magsugod sa akong kaugalingon nga negosyo sa pagtukod.”
“Gitudloan ko sa akong papa kon unsaon paghiusa sa mga butang, gikan sa duha ka tabla hangtod sa tibuok nga balay,” miingon si Sarah.
Pagtukod og Negosyo
Una nga gibag-o ni Sarah ang usa ka balay usa ka tuig sa ting-init. Ganahan kaayo siya niini mao nga mikuha siya og laing proyekto sa pag-remodel pagkasunod tuig. Sa kadugayan, midesisyon siya sa pagdawat og mas dako nga proyekto—usa ka “spec” nga balay, o balay nga siya ug iyang grupo sa mga subcontractor maoy motukod gikan sa pundasyon hangtod nga mahuman, sa paglaom nga makaginansiya kon ibaligya.
Adlaw sa pagguba! Si Sarah nagdala og usa ka martilyo paingon sa banyo diha sa usa sa iyang mga proyekto.
Ang pagsugod og usa ka negosyo dili sayon nga proyekto, ilabi na kay si Sara bisi pa sa hayskul ug sa cross country nga dagan.
Si Sarah misugod sa iyang kaugalingon nga kompanya sa konstruksiyon sa dihang 16 anyos pa siya.
“Daghan kaayo ko og nakat-onan,” miingon siya. “Kinahanglan kong mogamit og checkbook sa pagbayad sa mga tawo, nga wala pa nako sukad mahimo. Kinahanglan kong mahimong komportable nga makig-istorya sa mga estranghero nga akong mga subcontractor. Nakakat-on usab ko kon unsaon pagdala sa kakapoy sa pagpadagan og usa ka kompanya, nga dili kanunay makalingaw. Anaa kanunay ang kabalaka nga ang kwarta nga imong madawat gikan sa pagbaligya og balay dili igo itapal sa gasto sa pagpatukod sa balay.”
Wala Gayod Mag-inusara
Apan bisan pa sa mga kabalaka ug mga kakapoy nga moabot sa pagpadagan og negosyo, si Sarah wala gayod miatubang sa iyang dagko nga mga damgo nga nag-inusara.
“Kanunay kini nga maayo ang dagan, ug nakahibalo ko nga tungod kana sa Ginoo,” siya miingon. “Kini nga negosyo dili posible kon wala Siya. Mitabang Siya kanako sa dili maayo nga mga adlaw, sa malisod nga trabaho, sa tanan.”
Ang suod nga relasyon ni Sarah tali sa iyang pamilya nagagikan sa pagtinabangay.
Ang pamilya ni Sarah nagsuporta usab kaniya sa matag higayon—nga nagdala nato balik niana nga misyon nga nakasamok sa iyang mga plano.
Ang magulang nga lalaki nga si Tyler nagplano nga tabangan si Sarah sa pagtukod og balay kon makauli na siya gikan sa iyang misyon. Apan usa ka adlaw, mitawag siya kaniya [ni Sarah] uban ang balita nga gihangyo siya nga lugwayan ang iyang misyonaryo nga pagserbisyo.
“Suko kaayo ko niya,” miangkon si Sarah. “Miingon ko, ‘Tyler, dili na nimo pwede dawaton. Ako na kining giplanohan.’ Ug miingon siya, ‘Ang trabaho sa Ginoo mas importante kaysa imong trabaho.’ Kana nakapamata kanako. Kahibalo ko nga eksakto siya ug nga gikinahanglan nako nga mosalig sa plano sa Diyos.”
Ang pamilya ni Sarah miabiabi sa iyang igsoong lalaki nga si Tyler nga miuli human siya gilugwayan sa iyang misyon.
Litrato sa maayong kabubut-on ni Sarah Christensen
Bisan makadawat siya og tabang gikan sa iyang papa o tabang gikan sa Langitnong Amahan, nakahibalo si Sarah nga wala siya mag-inusara.
Usa ka Misyon sa Iyang Kaugalingon
Ang ehemplo ni Tyler nakadasig ni Sarah sa pagsugod og hunahuna kabahin sa pagserbisyo sa iyang kaugalingon nga misyon. “Akong naamgohan kon unsa ka daghan sa mga tawo ang natabangan sa akong igsoong lalaki nga moduol ngadto kang Kristo, ug akong nakita usab kon unsa kadako ang iyang pagduol kang Kristo sa iyang kaugalingon. Gusto nako nga adunay susama nga mga kasinatian,” miingon si Hermana Christensen. “Nagsugod ko sa pagtuon og seryoso sa ebanghelyo ug nakita nga samtang akong pagpamatuod ug akong relasyon sa akong Manluluwas mas nagtubo, mas gusto nako nga ipakigbahin unsay anaa nako.”
Gipili ni Sarah nga hunongon og kadiyot ang iyang negosyo sa konstruksiyon ug magserbisyo sa Ginoo. Kini nga desisyon naghatag niya og gamhanan nga mga panabot.
“Ang numero unong butang nga natudlo kanako sa akong misyon mao nga ang ebanghelyo hingpit nga makapausab og mga kinabuhi,” miingon si Hermana Christensen. “Ang pagdako diha sa Simbahan nakapalisod nako nga makita unsa ka mahinungdanon ang ebanghelyo sa akong kinabuhi.
“Dinhi sa akong misyon, napalibotan ko og mga tawo nga wala makahibalo kabahin sa Langitnong Amahan ug ni Jesukristo. Sa dihang nahibaloan nila nga sila mga anak sa Dios ug Siya adunay plano alang kanila, kini makapausab sa ilang mga kinabuhi. Mao kini ang labing maayo nga butang nga masaksihan ug mahimong parte. Aduna koy pagsabot niana sa wala pa ang akong misyon, apan karon nahibalo nako nga ang ebanghelyo ni Jesukristo mahinungdanon alang sa kalipay niini nga kalibotan ug sa kalibotan nga umaabot.”
Hermana Christensen (tuo) ug iyang kauban Hermana Taylor (wala) ganahan nga moserbisyo sa bisan unsang paagi nga ilang mahimo.
Litrato sa maayong kabubut-on ni Sarah Christensen
Hugot nga Pagtuo Batok sa Kahadlok
Sa ubang kabatan-onan nga naghunahuna nga magserbisyo og misyon, si Hermana Christensen miingon, “Pagbaton og hugot nga pagtuo ug ayaw kahadlok. Ang mga misyon dili sayon, apan bililhon kini. Ang Dios mopanalangin kaninyo sa mga pamaagi nga dili mahunahuna samtang mo-desisyon kamo nga mahimong usa sa Iyang mga sulugoon.”
Bisan og gimingaw siya sa pagtukod og mga balay samtang nagserbisyo siya, si Hermana Christensen wala gayod magmahay sa iyang gipili. “Siyempre, adunay potensyal nga pag-uswag nga mahimo unta sa akong negosyo samtang ako usa ka full-time nga misyonaryo,” miingon siya. “Apan ako nasayod nga ang Ginoo mopanalangin sa akong sakripisyo sa pagbiya niini sa makadiyot. Ang akong negosyo makahulat, apan ang trabaho sa Ginoo dili!”