Pagpili sa Templo

Ang templo nga labing duol kanako anaa mahimutang sa lain nga isla. Aron makaadto didto, kinahanglan kami nga mohimo og 45 ka minuto nga pagsakay sa eroplano o 12 ka oras nga pagsakay sa barko. Wala pa gayod ko sukad makaadto sa templo, ug sa akong kataposan nga tuig sa pag-eskwela, ang akong mama nagplano nga kami moadto. Nagtigom siya og kwarta sulod sa usa ka tuig aron dungan nga makaadto ang among pamilya.

Subo lang, makauli kami human nga makasugod na ang klase, nga nakapaguol nako. Importante kaayo alang nako nga makakuha og nindot nga grade point average (GPA) sa eskwelahan aron makakuha ko og scholarship sa kolehiyo. Naghunahuna ko nga dili na lang moadto sa templo, kay ang mga pagpalta sa klase makadaot sa akong final nga GPA. Dayon ang akong mama miingon, “Nganong dili man ka mag-ampo ug mangayo og tabang sa Ginoo?”

Medyo nagduhaduha ko tungod kay nahadlok ko, apan midesisyon ko nga mag-ampo. Gigiyahan ko sa Langitnong Amahan, ug akong gipili nga moadto sa templo. Sulod sa tibuok semana nga anaa kami didto, kada adlaw mi nga moadto sa templo. Talagsaon kaayo kadto! Ang paghimo og mga pagbunyag makapahingangha nga kasinatian, mabati nako ang Espiritu nga kusog kaayo.

Sa kataposan, nahimo nako nga mahuman ang pag-eskwela nga adunay maayo nga GPA. Ang pagmintinar og suod nga relasyon uban sa Manluluwas nakatabang nako nga makabaton og paglaom atol niadto nga higayon. Nakahibalo ko nga anaa Siya kuyog nako, naghatag nako og kalig-on. Ang Ginoo nakahibalo sa atong mga paningkamot, ug kon isalig nato ang mga butang sa Iyang mga kamot, makasalig kita nga mahimong maayo ra ang tanan.

Mapasalamaton kaayo ko nga ang akong igsoong babaye adunay kaisog sa pagdapit sa mga misyonaryo sa among panimalay. Siya ug ako mao ang unang mga nabunyagan sa among pamilya—ako 13 ug siya 15. Nakahibalo ko nga ako usa ka hinigugmang anak sa atong Langitnong Amahan. Ang akong kalibotanong amahan wala gayod nako makita sa akong kinabuhi, apan nakatabang nako nga makahibalo nga kita adunay Langitnong Amahan ug nga ako gilalang sa Iyang hulagway. Akong gibati ang Iyang gugma alang kanako, ako nakahibalo nga sa labing lisod nga mga higayon, Siya anaa sa akong kiliran.