2025
Pagsulbad sa Akong mga Pangutana bahin sa Kasaysayan sa Simbahan
Enero 2025


Pagsulbad sa Akong mga Pangutana bahin sa Kasaysayan sa Simbahan

Bisan og aduna koy mga pangutana, wala ko miundang o mibiya.

batan-ong lalaki

Sa akong klase sa kasaysayan, ang akong magtutudlo misugod sa paghisgot bahin sa Ang Simbahan ni Jesukristo sa mga Santos sa Ulahing mga Adlaw. Wala siyay madayegon nga opinyon bahin sa Simbahan. Miingon siya nga kita mga poligamista ug mga pagpihig sa kaliwatan [racists].

Ang tanan nga akong nakat-onan kaniadto bahin sa Simbahan adunay kahulogan ngari nako. Apan ang akong kasinatian sa klase nakapahinoktok nako bahin sa pipila ka lisod nga mga pangutana gikan sa kasaysayan sa Simbahan, sama sa nganong ang itom nga mga tawo wala tugoti nga makahupot og pagkapari sulod sa pipila ka panahon, ug nganong ang dinaghan nga kaminyoon nahitabo.

Tungod niana, nagsugod gyod ko sa paghunahuna, pagpamalandong, ug pag-ampo. Nagbasa ko gikan sa mga kasulatan, nakig-istorya sa akong mga ginikanan ug sa mga lider, ug nagkat-on pa og dugang para sa akong kaugalingon. Bisan og aduna koy mga pangutana, wala ko miundang o mibiya.

Samtang nagtuon ko ug nagkat-on, halos gibati nako nga daw ako gisapnay. Wala gihapon nako hingpit nga masabtan ang tanan, pero nakakaplag ko og kalinaw.

Karon kon aduna koy mga pangutana, mosalig ko sa unsay akong nahibaloan na, sama sa tanang mga kasinatian nga nakatabang nga molambo ang akong pagpamatuod. Kon adunay butang nga dili nako masabtan, ang pag-ampo ang kasagaran nakong unang buhaton, ug dayon maningkamot ko nga maminaw sa Espiritu samtang nagbasa ko sa mga kasulatan.

Niining milabay nga tuig, nahibaloan gayod nako ang gahom sa Espiritu, ug mibati ko og kalinaw ug kahupayan ug gugma. Ako nasayod nga aduna gayod Dios nga makigsulti nato ug gusto nga kita makabalik sa langitnong panimalay.

Ang tagsulat nagpuyo sa Texas, USA.