Digital Lamang

2025 nga Tema sa Kabatan-onan nga Tutorial ug mga Instruksiyon sa Paghimo og Pulseras

Diha sa bidyo sa 2025 nga Tema sa kabatan-onan, usa ka batan-ong babaye adunay hinimo nga pulseras nga adunay adlaw aron mapahinumdoman siya sa pagtan-aw kang Kristo. Ania ang mga instruksiyon sa paghimo og gipayano nga bersiyon sa pagsugod sa pulseras.

Ang kataposang lakang sa paghimo og pulseras mao ang pagdugang sa labing importante nga bahin—ang adlaw—aron mapahinumdoman kamo sa pagtan-aw kang Kristo. Unsa ang mamugnaong mga paagi nga inyong madugang sa adlaw diha sa inyong pulseras? (Paghunahuna og papel, hilo, mga bato, o lain pang butang!)

Kini nga pulseras pagahimoon atol sa sinemana nga kalihokan sa kabatan-onan. Ang mas magulang nga kabatan-onan mahimong magpraktis nang daan aron ilang mapakita kon giunsa kini sa paghimo ug sa pagtabang sa uban.

Tutorial nga Bidyo

0:20

Mga Materyal:

Tulo ka kolor nga hilo, lambo, o pang-crochet nga lambo
Pangtangtang sa tahi (sa pag-usab sa mga sayop)

Mga Depinisyon sa Sumbanan:

Wala nga higot: Ilakong ang hilo gikan sa wala ngadto sa tuo ibabaw sa laing piraso sa lambo, nga magporma og “4.” Gamit ang hilo, ipasok sa ilawom sa laing hilo ug birahon agi sa lungag sa tunga sa 4. Biraha og hugot.

Tuo nga higot: Ilakong ang hilo gikan sa tuo ngadto sa wala ibabaw sa laing piraso nga hilo, nga magporma og pinabaligtad nga “4.” Gamit ang hilo, ipasok sa ilawom sa laing hilo ug birahon agi sa lungag sa tunga sa pinabaligtad nga 4. Biraha og hugot.

Mga Instruksiyon:

Pagpahimutang:

Kada tawo, maggunting og tulo ka kolor nga hilo ngadto sa 50 ka pulgada (127 cm), o usa ka dupa, ang gitas-on.
Guniti ang tanang tulo ka kolor nga hilo, ug pil-a kini og katunga.
Ihigot ang kinatumyan sa gipilo. Karon kamo aduna nay unom ka piraso nga hilo nga nagbitay.
Ilinya ang inyong hilo aron mahan-ay kini og Kolor 1, Kolor 2, Kolor 3, Kolor 3, Kolor 2, Kolor 1.

Laray 1:

Sugdi pinaagi sa duha ka piraso nga hilo diha sa wala. Gamit ang Kolor 1 (sa wala), pagporma og wala nga higot (tan-awa sa depinisyon sa itaas) sa ibabaw sa Kolor 2.
Sa gihapon gamit ang Kolor 1, pagporma og tuo nga higot (tan-awa sa depinisyon sa itaas) sa ibabaw sa Kolor 2.
Balhin ngadto sa duha ka piraso nga hilo diha sa tunga. Gamit ang Kolor 3 sa wala nga bahin, pagporma og wala nga higot sa ibabaw sa laing Kolor 3.
Gamit ang mao gihapon nga Kolor 3, pagporma og laing wala nga higot sa ibabaw sa Kolor 3.
Balhin ngadto sa duha ka piraso nga hilo diha sa tumoy sa tuo. Gamit ang Kolor 1 sa layo sa tuo, paghimo og tuo nga higot sa ibabaw sa Kolor 2.
Gamit ang mao gihapon nga Kolor 1, pagporma og wala nga higot sa ibabaw sa Kolor 2.

Laray 2:

Ang piraso sa hilo sa matag kilid (Kolor 1) dili mahimong gamiton niini nga laray. Sugdi pinaagi sa pagtutok sa Kolor 2 ug Kolor 3 sa wala nga bahin. Gamit ang Kolor 2 (sa wala), pagporma og wala nga higot sa ibabaw sa Kolor 3.
Gamit ang mao gihapon nga Kolor 2, pagporma og tuo nga higot sa ibabaw sa Kolor 3.
Balhin ngadto sa Kolor 3 ug sa Kolor 2 sa tuo nga bahin. Gamit ang Kolor 2 (sa tuo), pagporma og tuo nga higot sa ibabaw sa Kolor 3.
Gamit ang mao gihapon nga Kolor 2, pagporma og wala nga higot sa ibabaw sa Kolor 3.

Balika:

Balika ang mga laray 1 ug 2 hangtod nga ang imong pulseras motaas kutob sa unsay imong gusto.

Ania ang gipamubo nga bersiyon sa sundanan sa pagbalik:

Laray 1. Wala nga mga higot: gikan sa Kolor 1 sa wala ngadto sa Kolor 2 sa tuo: wala nga higot, tuo nga higot. Tunga nga mga hilo: gikan sa Kolor 3 sa wala ngadto sa Kolor 3 sa tuo: wala nga higot, wala nga higot. Tuo nga mga hilo: gikan sa Kolor 1 sa tuo ngadto sa Kolor 2 sa wala: tuo nga higot, wala nga higot.
Laray 2. Ayaw gamita ang Kolor 1 (mga piraso sa kilid). Wala nga mga hilo: gikan sa Kolor 2 sa wala ngadto sa Kolor 3 sa tuo: wala nga higot, tuo nga higot. Tuo nga mga higot: gikan sa Kolor 2 sa tuo ngadto sa Kolor 3 sa wala: tuo nga higot, wala nga higot.

Humana:

Ihigot ang tumoy sa paghuman. Pagbilin og igong lambo aron ihigot sa inyong pulso.

Idugang ang Adlaw:

Ang labing importante nga bahin sa pulseras mao ang adlaw, aron mapahinumdoman kamo sa pagtan-aw kang Jesukristo. Mahimo kamo nga magdugang og adlaw sa daghang lainlaing paagi, gamit ang hilo, papel, mga bato, o ubang mga materyal.

Alang sa Hanas na nga mga Tighimo og Pulseras

Kon kamo hanas na sa paghimo niini nga pulseras, mahimo ninyong mas panindotan pa kaysa pulseras nga anaa sa bidyo pinaagi sa pagdugang og daghang kolor. Kinahanglan nga kini adunay dili pares nga numero sa may kolor nga mga hilo (sa dili pa pil-on) aron masakto kini. Ang pulseras nga anaa sa bidyo naggamit og 7 ka kolor, nga mahimong 14 ka piraso sa hilo.