Ang Propeta ug ang Iyang Manluluwas
Sa usa ka paagi, ang istorya sa Pagpahiuli mao ang istorya sa dugang nga pagpaduol ni Joseph Smith kang Jesukristo.
Every Knee Shall Bow [Matag Tuhod Moluhod],, ni Dan Wilson
Ang istorya sa kinabuhi ni Joseph Smith labaw pa sa istorya sa kinabuhi ni Joseph Smith.
Kon kita mosugilon sa istorya sa Pagpahiuli sa ebanghelyo ni Jesukristo, kita kasagaran magsugod pinaagi sa pagsugilon sa istorya ni Joseph Smith. Ug masabtan ra kana. Siya mismo ang misugilon sa istorya sa iyang pagkabata sa pipila ka nagkalain-laing higayon aron matabangan ang mga tawo nga makasabot kon giunsa pagsugod sa Pagpahiuli. Apan sa usa ka paagi, ang istorya sa kinabuhi ni Joseph Smith mao ang istorya sa iyang dugang nga pagpaduol kang Jesukristo.
Usa ka Panan-awon sa Pagpasaylo
Ang batan-on nga Joseph Smith mibati og kalibog mahitungod sa relihiyon. Ug adunay dugang nga pagbati nga nakapalihok niya aron mag-ampo nianang kakahoyan diin nahitabo ang iyang Unang Panan-awon: “Ako mibati nga magbangotan alang sa akong kaugalingon nga mga sala.”
Sa dihang ang Manluluwas misulti ni Joseph, Siya miingon, “Joseph, akong anak, ang imong mga sala gipasaylo na.”
Si Joseph nakat-on pinaagi sa kaugalingong kasinatian nga si Jesukristo buhi. Siya usab nakat-on nga si Jesukristo maluluy-on ug mopasaylo sa mga sala. Kini nga personal nga kahibalo importante ni Joseph. “Ang kaluwasan sa akong kalag maoy labing importante kanako [tungod] kay ako nahibalo sa kaseguroan sa mahangtorong mga butang,” siya sa makausa miingon.
Kini nga kahibalo mahitungod ni Jesukristo importante usab sa buluhaton diin si Joseph gitawag nga mobuhat isip usa ka propeta. Siya mihatag og gamhanang pagpamatuod sa grasya ug kaluoy ni Jesukristo sa tibuok niyang kinabuhi. Pananglitan, siya sa makausa nagtudlo, “Ang tanang mga kasingkasing kinahanglang maghinulsol ug magmaputli, ug ang Dios modawat kanila ug mopanalangin kanila sa paagi nga sila dili mapanalanginan sa bisan unsa nga paagi.”
Mga Sayop ug Kaluoy
Ang buluhaton nga si Joseph Smith gitawag nga mobuhat dako kaayo ang kaimportante. Ug si Joseph nakat-on nga seryosohon ang mga sugo ug tambag sa Ginoo, nga may kabahin pinaagi sa mga sayop nga iyang nahimo.
Pananglitan, sa dihang nawala ang mga pahina sa manuskrito sa Basahon ni Mormon, gikuha sa Ginoo ang gasa sa paghubad gikan kang Joseph ug human niana miingon ngadto kaniya: “Unsa ka kasagaran ikaw milapas sa mga sugo ug sa mga balaod sa Dios. … “Ikaw wala unta mahadlok sa tawo labaw pa kay sa Dios” (Doktrina ug mga Pakigsaad 3:6–7).
Apan ang Ginoo usab aduna niini nga mensahe alang ni Joseph: “Hinumdomi, ang Ginoo maluluy-on; busa, paghinulsol” (Doktrina ug mga Pakigsaad 3:10).
Si Joseph naghinulsol ug gihatagan pag-usab sa gasa sa paghubad. Ang tibuok kasinatian tingali sakit kaayo alang kaniya, apan siya nakat-on og importante nga mga leksiyon—lakip na nga kita makahinulsol ug mapanalanginan tungod kay ang Ginoo maluluy-on.
Manluluwas ug Higala
Si Joseph Smith adunay daghang panan-awon, mga pagbisita, ug mga pagpadayag diin iyang nakita o nadungog ang Ginoong Jesukristo o nakat-on mahitungod sa Iyang kinaiyahan, batasan, ug misyon (tan-awa, pananglitan, sa Doktrina ug mga Pakigsaad 19; 76; 93; 110).
Usa ka kamatuoran nga iyang nakat-onan mao nga ang buluhaton sa pagtubos sa Manluluwas alang sa tanang tawo kinsa nabuhi niining kalibotan—ug sa tanang kalibotan diin ang mga anak nga lalaki ug mga anak nga babaye sa Dios nagpuyo (tan-awa sa Doktrina ug mga Pakigsaad 76:24).
Sa samang higayon siya nagkat-on kon unsa ka lapad ang buluhaton sa Manluluwas, si Joseph nagkat-on usab nga ang Langitnong Amahan ug si Jesukristo nakaila ug nahigugma sa matag usa kanato sa indibidwal nga paagi. Gusto Nila ang mas suod nga relasyon sa matag usa kanato. Gusto Nila nga kita mohimo og mga pakigsaad, motuman niini, ug matinud-anon nga molahutay hangtod sa kataposan. Kining nagkalawom nga relasyon maghatag kanato og kamaya ug pagsalig.
Ang kaugalingong relasyon ni Joseph sa Langitnong Amahan ug ni Jesukristo nahimong lawom kaayo nga sa usa ka labing lisod nga higayon sa iyang kinabuhi, samtang nabilanggo sa Bilanggoan sa Liberty, siya nakasulti:
“Akong paningkamotan nga malipay sa akong kahimtang, kay nakahibalo ako nga ang Dios akong higala. Diha kaniya ako makakita og kahupayan. Ako nang gitugyan ang akong kinabuhi sa iyang mga kamot. Ako andam sa pagsanong sa iyang pagtawag. Ako nagtinguha nga ikauban si Kristo.”
Samtang ikaw magtuon sa kinabuhi ug mga pagtulun-an ni Joseph Smith, ikaw makasunod sa iyang ehemplo. Paghinulsol, paghimo ug pagtuman sa mga pakigsaad, ug padayon nga magmatinud-anon. Dayon ikaw usab makahibalo nga ang Manluluwas imong Higala.