2025 nga Tema sa Kabatan-onan
7 ka Paagi sa Pagtan-aw ngadto kang Kristo
Sulayi kini nga mga gawi aron sa pagtutok sa imong mga panan-aw ngadto sa Manluluwas.
Ang paggamit sa tema sa kabatan-onan karong tuiga—“Pagtan-aw ngadto kang Kristo”—naghatag og gamay nga hagit. Unsaon nimo sa pagtan-aw sa usa ka tawo nga dili makita sa pisikal nga paagi? Sugdi pinaagi niining pito ka gawi.
1. Hinumdomi Nga Wala Siya Magtago
Oo, kinahanglan nimo Siya nga pangitaon. Apan gusto Niya nga makit-an! Dili kini dula sa pagtago ug pagpangita. Ang Ginoo matinguhaon sa pagpanalangin kanimo—gani, kini makapahimuot Kaniya (tan-awa sa Doktrina ug mga Pakigsaad 41:1). Wala Siya mangita og mga rason aron dili ka mosarang. Ang medyo sukwahi: Siya kanunay nga nagtinguha sa pagpanalangin kanimo. Sama sa gitudlo ni Elder Kearon sa Korum sa Napulog Duha ka Apostoles, “Dili, [ang Manluluwas] wala magbutang og mga babag ug mga ali; gitangtang Niya kini. Siya wala magpugong kaninyo; Siya nag-abiabi kaninyo pasulod. Ang Iyang tibuok nga pagpangalagad mao ang usa ka buhi nga pamahayag niini nga tumong.”
2. Ilha ang Iyang Impluwensiya sa Imong Kinabuhi
Ang Ginoo mahimuot kon kita “mokompisal … diha sa tanan nga mga butang” (Doktrina ug mga Pakigsaad 59:21). Mao nga seguroha nga ilhon ang Iyang impluwensya sa imong kinabuhi! Pasalamati Siya kon maayo ang dagan sa mga butang alang kanimo ug pangita og kalinaw ug panabot kon kini dili maayo.
3. Pagmapasalamaton sa Unsay Anaa Kanimo
Kauban sa pag-ila sa impluwensiya sa Ginoo sa imong kinabuhi, importante usab nga mobati—ug mopakita—og pasalamat. Tingali dili nimo “makita” ang Manluluwas sa pisikal nga paagi, apan makita nimo ang Iyang mga panalangin sa imong kinabuhi! Si Elder Gary B. Sabin sa Seventy miingon, “Dili kamo mas magmalipayon kay sa inyong pagkamapasalamaton.” Pasalamati ang Ginoo kada adlaw sa inyong mga panalangin. Kon kamo mobati nga nasagmuyo, sunda ang tambag sa karaan nga awit: “Iphag nganli; Tinagsa-tagsa. Unsa ang nahimo; Sa Dios tan-awa.”
4. Pag-ampo Kada Adlaw
Mas “makita” nimo ang Manluluwas sa tibuok adlaw kon imong sugdan pinaagi sa pagpakig-istorya sa Langitnong Amahan. Hangyoa Siya sa pagtabang nimo nga makahinumdom sa Manluluwas ug makamatikod sa Iyang impluwensiya sa imong kinabuhi. Ikaw mahimong mag-ampo kutob sa imong gusto atol sa adlaw. Ug sa dili pa matulog, pag-ampo og usab aron sultihan ang Langitnong Amahan unsa ang mga nahitabo. Dili gayod Siya kapoyon sa pagpamati gikan kanimo!
5. Sag-uloha ang mga Kasulatan ug mga Himno
Usa ka paagi nga magpabilin ang imong hunahuna nga nakatutok ni Jesukristo mao ang pagpuno sa imong panumdoman sa mga pulong sa paborito nga kasulatan o mga liriko sa makapabayaw nga awit. Praktisa ang paghinumdom niini kon ikaw mobati nga naghinay-hinay na og sulod ang negatibo nga mga hunahuna. Kasagaran bisan ang paghinumdom lang (ug hilom nga pagkanta) sa ulohan sa usa ka himno tingali igo na aron mausab ang direksyon sa imong hunahuna: “Ako Anak sa Dios.” “Nagkinahanglan ko Nimo sa matag takna.” “Akong kalag, magmalinawon.”
6. Pagtan-aw og mga Imahe sa Manluluwas
Pangita og aritistikong mga paghulagway sa Manluluwas nga imong ganahan, ug dayon ibutang kini diin kanunay nimo kining makita. Ang ubang dapit tingali maglakip sa bungbong sa imong kwarto, samin sa imong kaligoanan, locker nimo sa eskwelahan, o isip background sa imong kompyuter o sa home screen sa imong phone.
7. Tan-awa ang Kalibotan sa palibot Nimo
Maanindot kini! Ug ang Manluluwas naghimo niini alang kanimo (tan-awa sa Doktrina ug mga Pakigsaad 14:9)! Walay rason nga atong nahibaloan nga ang yuta kinahanglan nga mahimong maanindot. Tingali mahimo nato nga igugol ang mortalidad sa usa ka kalibotan nga patag, kwadrado, ug abohon. Hinuon ang Manluluwas milalang og kalibotan nga “alang sa kaayohan ug sa paggamit sa tawo, aron sa pagpahimuot sa mata ug sa pagmaya sa kasingkasing” (Doktrina ug mga Pakigsaad 59:18). Sa laing pagkasulti, ang yuta maanindot tungod kay ang maanindot nga mga butang makapagaan sa atong pagbati. Kon ikaw gusto nga makahinumdom sa Manluluwas, tan-aw lang sa palibot.