Maayong Balita alang Kanimo ug sa Kalibotan

Sa kakahoyan, ang Dios nga Amahan ug ang Iyang Anak, si Jesukristo, mipakita ug nakig-istorya ngadto ni Joseph Smith isip tubag sa pag-ampo ni Joseph mahitungod kon asa nga simbahan ang kinahanglan niyang apilan (tan-awa sa Joseph Smith—Kasaysayan 1:16–20). Si Jesus miingon ni Joseph nga dili moapil sa bisan unsa nga simbahan. Siya misaad nga ang kahingpitan sa Iyang ebanghelyo ipadayag ngadto ni Joseph sa umaabot.

Sa kadaghanan, si Joseph mura og ang labing dili kasarangan nga tawagon sa niana nga importante nga buluhaton. Sa ilang mga panan-aw, siya usa lamang ka dili edukado nga batang lalaki nga gikan sa usa ka gamay nga umahan. Apan pinaagi ni Joseph, ang Langitnong Amahan ug si Jesukristo mobuhat sa tinuod nga makapahingangha. Si Joseph hatagan og mga sugo, bililhong mga pagpadayag, ug mahinungdanong mga doktrina mahitungod sa mahigugmaong plano sa Langitnong Amahan ug ang makatubos nga gugma ni Jesukristo ug Pag-ula aron kita mapanalanginan ug makatabang nato nga makahibalo kon unsaon nga kita makabalik sa panimalay.

Ang anghel Moroni mipakita ni Joseph Smith ug misulti ni Joseph kabahin sa usa ka talaan, gisulat sa bulawang mga palid, nga gilubong sa duol (tan-awa sa Joseph Smith—Kasaysayan 1:33–34). Sa kataposan, nahubad ni Joseph ang talaan ngadto sa unsay nahimo nga Basahon ni Mormon, nga mibarog kauban sa Biblia isip lain nga saksi ni Jesukristo.

Sa tibuok Basahon ni Mormon, ang katawhan, gatosan ka tuig sa wala pa si Kristo, nakahibalo ug gisultihan daan sa Iyang pag-abot ug naghinamhinam niini. Ato usab nga mabasa kon giunsa pagpakita ug pagpangalagad sa Manluluwas ngadto sa mga Nephita. Siya midapit sa tanan sa pagduol ngadto Kaniya. Iyang giayo ang mga masakiton, ang bakol, ang buta, ug tanan nga gisakit. Iya dayon nga gipanalanginan ang gagmayng mga bata ug nag-ampo alang kanila (tan-awa sa 3 Nephi 11:14–15; 3 Nephi 17:7–9; 3 Nephi 17:21).

Ang Basahon ni Mormon nagtudlo kanato og daghan kaayo kabahin sa gugma ug kaluoy sa Manluluwas. Kini tinud-anay nga nagpamatuod nga si “Jesus mao ang Kristo.” Kini naglangkob sa katahom sa Iyang mahangtorong ebanghelyo. Ang Basahon ni Mormon naghatag og tin-aw nga pagpasabot kon giunsa kita paghigugma sa atong Amahan sa Langit ug sa atong Manluluwas labaw kay sa bisan unsa pa nga atong mahanduraw.

Uban pang mga langitnong mensahero ang miadto ni Joseph Smith. Si Juan Bautista mianhi aron sa pagpahiuli sa awtoridad sa pagbunyag. Sila si Pedro, Santiago, ug Juan mipahiuli sa pagka-apostoles ug mga yawe sa awtoridad sa pagkapari. “Ang uban mianhi usab, lakip ni Elijah, kinsa mipahiuli sa awtoridad sa paghiusa sa mga pamilya hangtod sa kahangtoran diha sa mahangtoron nga mga pakigrelasyon nga molungtad lapas sa kamatayon.”

Si Jesukristo dayon mitukod pinaagi ni Propeta Joseph Smith og usa ka Simbahan nga gisunod sa usa nga Iyang giorganisar sa mga panahon sa Bag-ong Tugon (tan-awa sa Artikulo sa Hugot nga Pagtuo 1:6). Pinaagi ni Jesukristo ug sa Iyang apostoles ug mga propeta, Ang Simbahan ni Jesukristo sa mga Santos sa Ulahing mga Adlaw naghimo sa mga panalangin sa gipahiuli nga gahom sa pagkapari nga anaa sa tanang anak sa Dios.

Ako moingon nga kon kamo mobati nga nahugno ug mibati nga dili igo ang inyong katakos o nga kamo wala mahisakop, mahimong mas maaghop sa inyong kaugalingon ug amgohi kon unsa kadako ang paghigugma sa Langitnong Amahan ug sa Iyang Anak, ang atong Manluluwas, labaw pa sa unsay inyong posible nga mahanduraw. Ang tanan gidapit nga moduol ngadto ni Kristo ug sa Iyang Simbahan. Ang Simbahan dili alang sa mga hingpit. Kini sama sa ospital diin kita makakaplag og pagkaayo. Sa simbahan atong gibali ang atong kaugalingon, nagserbisyo sa uban nga may gugma, ug nagpakigbahin sa ebanghelyo. Kita mahimong “mahinumdoman ug maamumahan pinaagi sa maayo nga pulong sa Dios’ (Moroni 6:4). Makakaplag kita og kalinaw ug pagkaayo. Pagkadako nga panalangin!

Ang Langitnong Amahan ug ang Iyang pinalanggang Anak, si Jesukristo, nahigugma kaninyo ug nagtinguha—labaw kay sa bisan unsa—sa pagdala kaninyo sa panimalay ug makabaton sa kahangtoran sa matang sa kinabuhi nga ilang gipuy-an. Ang Pagpahiuli nagpadayag nga Sila mibuhat sa tanan aron mahimo kining mahimayaon nga posibilidad alang kaninyo. May mga higayon, kamo makasinati og mga pagsulay ug mga kalisod, apan kamo mao “aron [kamo] makabaton og himaya” (2 Nephi 2:25) niini nga kinabuhi ug sa sunod. Ang Propeta Joseph mas nakahibalo niini kay sa kadaghanan. Inyong madiskobrehan nga kamo makabaton og kamaya samtang kamo padayon nga maghinulsol ug modangop sa inyong Amahan sa Langit ug sa inyong Manluluwas.

Si Joseph nakasinati og kanunay nga oposisyon ug pagpanggukod, apan iyang gipadayon ang iyang “pagkagaan og buot” (Joseph Smith—Kasaysayan 1:28). Siya nagpabilin nga malipayon, lig-on, ug madasigon, ug iyang natuman ang buluhaton nga gihatag aron iyang himoon. Sama usab ka tinuod alang sa tanan nga nagsunod kaniya.

Lisod kaayo ang kahimtang sa sayo nga mga adlaw sa Simbahan, ug mahimong lisod gihapon kaayo karon, apan ang Pagpahiuli nagpadayon kaniadto—ug nagpadayon karon. Si Jesukristo nangulo sa Iyang Simbahan. Ang buhing mga propeta nagpadayon sa paggiya kanato. Ang mga balay sa Ginoo padayon nga tukoron. Ang gugma sa Dios ug ni Jesukristo molugway ngadto sa tibuok kalibotan samtang kita mosunod sa sugo sa Manluluwas sa pagpakaon sa Iyang karnero ug pagpakigbahin sa Iyang ebanghelyo. Ang mga kamatuoran sa Pagpahiuli magpadayon sa mga paagi ug ngadto sa mga dapit nga tingali lisod nga mahunahunaan sa panahon ni Joseph. Kita maningkamot sa paghimo sa kalibotan nga mas maaghop ug minosan ang pagkabulag-bulag.

Samtang kamo kasagaran nga magtuon sa ebanghelyo, mag-ampo kanunay, ug magserbisyo sa uban, ang mensahe sa Pagpahiuli motandog sa inyong kasingkasing ug mousab sa inyong kinabuhi. Tingali dili kini mahitabo diha-diha dayon, apan magdala kini kaninyo og kamaya—sama sa nahitabo ni Propeta Joseph.

Unta ang maayong balita sa gugma ug kamaya nga gidala sa Pagpahiuli mopanalangin ug mogiya sa inyong kinabuhi—karon ug sa kanunay.