Leaga i le Pateminitone

Na manava i totonu Shia ma taumafai e taulai i le taaloga. E mafai ona ia faia lea mea. Sa ia faapau le polo pateminitone mai lona lima, sasau i lana pate, ma …

Plonk!

Sa pa le polo pateminitone i le fola i luma tonu o ona tamatamaivae.

Sa manavanava ma faauu Shia. Sa ia toe. misi foi.

Sa tamoemoe atu Tama mai autafa o le malae pateminitone. “Manaia le taumafai!” Atonu e faaifo tele lou tapulima i leisi taimi e te faate’a ai le polo.”

“O le ta faate’a e faigata tele!” Na fai mai ai Shia. Sa ia tilotilo atu i le isi malae lea sa taaalo ai ona tausoga, o Analyn ma Jovan. Sa lele le polo pateminitone i luga o le upega a o la feauauai i le taina i a latou pate. Sa la faafoliga maia e faigofie!

Sa tuu atu e Tama lona lima i luga o lona tauau. “O le a e alualu i luma i le pateminitone. E manaomia ai se faataitai.”

“Ae ou te fia lelei i le taimi nei,” o le tala lea a Shia.

Sa ataata Tamā. “Atonu o le a sili atu le lelei o faataitaiga a lau au taeao.”

Ae o le aso na sosoo ai, sa le lelei atu le faataitaiga a le au. Sa tele taimi na misi ai e Shia le polo pateminitone nai lo le taina. Sa le mafai ona ia faate’aina ia ova i le neti. Ma i le taimi o le malologa, sa pa’u o ia ma masaa ai le vai i luga o lana toniga.

Sa tusi atu Layla, le kapeteni o le au, i lona mitiafu susu ma ata. “E ese lou faavalevalea, Shia!”

Sa lagona e Shia le vevela o ona alafau. Ona valaau atu lea o lona faiaoga i tagata uma i le malae.

“Ua lelei, tagata uma, o le taamilosaga ua na o ni nai vaiaso. Fai paga ifo tagata uma!”

Sa popo e Analyn le tauau o Shia. “E mafai ona ta paga. O le a ou fesoasoani e faataitai ma oe.”

Sa ata Layla. “O Shia e sili ona vaivai o le au! O le a e le manumalo lava pe afai o ia o lau paaga.”

Sa tilotilo ifo Shia i ona vae. Na sa’o lava Layla. O ia sa sili ona vaivai o le au, ma sa ia le mautinoa pe o le a lelei atu o ia.

Ina ua taunuu Shia i le fale, sa faia e Tina ni moa tao i le ogaumu. O lona tuagane pepe, o Tolome, sa tagi ma uu le vae o Tina.

Sa foliga fiafia tina ina ua vaai ia Shia. “Tai lelei, ua e sau i le fale! E mafai ona e aveina Tolome ma taaalo ma ia a o faauma la’u kuka o le afiafi?”

Sa le’i lagona e Shia le fia taalo i le taimi nei. Ae sa foliga faanoanoa tele Tolome! Sa si’i e Shia o ia i luga. Sa tagi pea Tolome.

Sa tuu o ia e Shia i luga o le fola ma aumai i fafo ni pepa o galuega taulima mai le kapeneta. Ma le filemu, sa amata ona ia gaugauina se pusi origami.

Sa tilotilo atu Tolome ia te ia, ma sa to’a malie ifo o ia. Sa faauma e Shia le pusi ma uu i luga. “Meow!”

Sa ata tolome. Sa tuu atu e Shia ia te ia le pusi origami ma amata ona gaugau pepa o siligi, lapiti, ma laumei mo i laua e taaalo ai.

“Oka o oe o se fesoasoani lelei!”

Sa faliu atu Shia ma vaaia ai Tina o ataata. “Faafetai mo lau fesoasoani ia te a’u i le asō. Ua e faia se uiga faaKeriso,” o le tala lea a Tina.

“Ou te fafia sa mafai ona ou fesoasoani.” Sa tilotilo atu Shia i le fiafia o Tolome ma lagona le mafanafana i totonu. E tusa lava pe leaga o ia i le faateaina o le polo pateminitone, atonu e mafai ona ia taumafai malosi e avea ma tagata sili ona lelei i le auauna atu i lona aiga.

I nai vaiaso na sosoo ai, sa taumafai ai Shia ia lelei atili i le faate’a—i le malae ma i le fale. Sa ia faataitai i aso uma pe a tuua le aoga i le malae pateminitone. Sa fesoasoani o ia ia Tina ma Tolome pe a uma ana faataitaiga i le fale. Ma sa ia tatalo ina ia fesoasoani le Tama Faalelagi ia te ia e saunia mo lana tauvaga.

Ina ua oo mai le aso o le tauvaga, sa matuai popole lava Shia! Sa la savavali atu ma Analyn i luga o le malae. Sa talotalo mai Tina, Tama, ma Tolome mai le nofoaga matamata. Ina ua oo i lona taimi e faate’a ai, sa manava loloa Shia. E mafai ona ia faia le mea lea.

Sa faapa’u e Shia le polo pateminitone mai lona lima, sasau i lana pate, ma …

Ta!

Sa alu i luga o le neti! Sa ia faalogoina le tapuaiga a Tama. Sa ia mafaia!

Atonu sa lei faigata tele le faate’a.

Tatala le PDF

Ata na tusia e Beatrice Costamagna. E mafai ona kopiina mo na o le faaaogaina e le Ekalesia.