“O Uo Gummy Bear,” Uo, Aperila 2026, 18–19.

O Uo Gummy Bear

Saunia e Norman Hill

Sa manao Rowan e avea ma uo a Ernest, ae na te lei iloa se tala e fai i ai.

O se tala moni mai le ISA.

Atatusi o se tamaitiiti faanoanoa o loo aapa atu ma le popole i se tamaitiiti faanoanoa o loo nofo i luga o le mutia i fafo, faatasi ai ma se mamanu o gummy bear o loo opeopea i tua atu

Sa tilotilo atu Rowan a o valaaulia e Miss Brody se tagata aoga fou e tu i luma o le potuaoga.

“O Ernest lenei,” o le tala lea a Miss Brody. “Faatoa taunuu o ia i Hawaii mai se atunuu e tau o Iukureini. E le tautala o ia i se Igilisi. Pe o le a outou agalelei uma ea ma faauo atu ia te ia?”

Sa luelue mai ulu o Rowan ma ana uo i le vasega.

Sa tilotilo ifo Ernest ma faauu. Sa na o ia lava le tagata na ofuina ofuvae uumi ma se ofutino lima uumi.

Sa mafaufau Rowan pe faape’i le siitia atu i se atunuu fou ma e le tautala i le gagana. Sa foliga taufaafefe!

I le malologa, sa vaai atu Rowan ia Ernest o savali atu i se tulaga na o ia lava a o taufetuli atu isi tamaiti e taaalo faatasi. Sa faauu pea o ia.

Sa manao Rowan e faauo atu ia te ia, ae na te lei iloa le tala e fai atu. E mafai faapefea ona avea i laua ma uo pe afai laua te le tautatala i se gagana e tasi?

Ina ua tuua le aoga, sa alu Rowan i le fale ma fesili atu ia Tama mo se fesoasoani. “E mafai ona e fesoasoani mai ia te au e sue pe faapefea ona fai atu tala i le faaUkraine?” O le fesili lea a Rowan. “E i ai se tamaitiiti fou i le matou vasega e le tautatala faaPeretania.”

Na luelue le ulu o Tamā. “Ae a.”

Muamua, sa laua saili i le auala e fai atu ai, “O le taimi o le malologa.” Sa faalogologo Rowan i le tali. “Nastav obidniy chas.” Sa taumafai Rowan e faataitai ona fai mo ni nai taimi. Sa faigata! O lea sa ia saili ai pe faapefea ona fai atu “talofa.”

“Pryvit,” sa ta’u mai ai e le leo o le komepiuta ia te ia. Sa faigofie atu lena. Sa toe faataitai pea lava pea e Rowan le upu ma faataitai ona fai atu.

O le aso na sosoo ai i le malologa, na maua ai e Rowan ia Ernest o loo nofo na o ia i luga o le mutia. Sa tu Rowan i ona autafa ma ataata. “Pryvit!” sa ia fai atu ai ma le leotele. Sa faamoemoe o ia e sa’o lana tala.

Sa ataata Ernest ma tuu atu ia Rowan se gummy bear.

Sa nofo Rowan i autafa o Ernest ma toe fai atu pryvit . Ona ia faapea mai lea, “Talofa.”

“Talofa,” na fai mai lemu ai Ernest. Sa ia tuu atu ia Rowan se isi gummy bear. Sa manogi e pei o moli, ma sa suamalie ma manaia.

Atatusi o se tamaitiiti o loo tuuina atu se gummy bear i se tama sa opoina o ia

Sa tusi e Rowan ni laina se fa i le palapala i o la autafa e fai ai se taaloga o le tic-tac-toe. Sa ia aoaoina Ernest i le auala e taalo ai. Sa faigata ona faamatala talu ai laua te lei tautatala i le gagana e tasi. O nisi taimi na tusia ai e Ernest le X i le taimi e le o lona taimi lea. Ae sa le’i afaina ia Rowan. Sa na ona ia manao lava e fai sana uo fou.

O aso uma o lena vaiaso, na taaalo ai Rowan ma Ernest i le malologa. Sa laua fefaasoaai gummy bears ma taaalo faatasi i taaloga.

I se tasi aso i le fale, sa fesili atu ai Tama, “O a mai le tamaitiiti fou i lau vasega? Na e faataitaia upu na e aoaoina?”

“Ioe! O lona igoa o Ernest,” o le tala lea a Rowan. “Ma te taaalo i taaloga i le malologa, ma na te tuuina mai ia te au ni gummy bears.”

Sa ataata Tamā. “Manaia tele lena.” Sa nofo i talaane o Rowan i luga o le nofoa momi. “O Ernest ma lona aiga o ni tagata sulufai. E o mai mai se atunuu mamao lava. Fai mai Elder Kearon o Iesu Keriso o se tagata sulufai a o laitiiti ma fai mai ia avea i tatou ma ni uo pe a tatou feiloai ma tagata mai isi atunuu. O le a sou manatu, o le a se mea e avea ai se tagata ma se uo lelei?”

Sa mafaufau Rowan mo sina sekone. “E manaomia ai se alofa ma le sailia o se taaloga e taaalo faatasi ai,” o lana tala lea. “Ona, mafai lea e isi ona auai ma taaalo foi i le taaloga ma faamasani ai le tasi i le isi.”

Sa toso mai e Tama ia Rowan mo se opo. “O loo e mulimuli ia Iesu ma faia mea ua talosagaina i tatou e perofeta e fai,” na ia fai atu ai. “Ma o lenei ua i ai sau uo fou.”