Faamoemoega o le Eseta

Sa saofai Melissa i le Peraimeri, ma le fiafia e aoao se pese fou. Fai mai lona faiaoga, o Sister Costa, sa ta’ua o le “Ketesemane.”

“O lenei pese o loo talanoa mai e uiga i le tele o le alofa o Iesu Keriso ia i tatou ma mea na Ia faia mo i tatou. Faalogo lelei ma taumafai e pese faatasi.”

Sa taina e Sister Costa se vitio na faaalia ai upu e pese faatasi ai ma ata i luga o le lau.

Sa pese Melissa e ui lava na te lei iloaina uma upu. Sa ia lagonaina le toafimalie tele i totonu a o ia faalogologo i upu, “Ketesemane! E alofa Iesu ia te a’u.”

Ina ua uma le pese, sa uu i luga e Sister Costa se ata o Iesu Keriso o loo sau i fafo mai le tuugamau. “Na maliu Iesu, ae sa toe soifua mai o Ia! Ona o Ia, o le a tatou toe ola uma foi,” o lana tala lea.

Sa maua e Melissa se lagona toafilemu, e pei o loo ia maua se opo lapoa. “O lea … afai e oti se tasi, e le faavavau?” O le fesili lea a Melissa.

“E sa’o lena,” na fai atu ai Sister Costa. Ona sa toetu Iesu Keriso, o le a tatou toetutu uma foi i se aso.

I lena Aso Sa, sa alu ai Melissa i le fale ma se loto fiafia. Sa mafaufau o ia i le alofa o le Faaola mo ia.

I se taimi mulimuli ane, sa amata ona filemu ma faanoanoa le fale o Melisa. Sa ma’i lona tama mo sina taimi ma maliu ai. Sa tagi soo lona tina. Sa tuuina atu e tagata ni opo uumi. Sa mafai e Melisa ona lagonaina se mea taua tele na suia.

I le aso o le falelauasiga, sa matuai malulu lava, ma sa tau le iloa atu le la i le lagi. Sa i ai fugalaau faataamilo i le pusamaliu. Sa tutu filemu tagata, ma sa fetagisi nisi.

Sa uu mau e Melisa le lima o lona tina. A o alu atu o ia i le pusa maliu ma tilotilo atu i lona tama, sa ia manatuaina le ata o Iesu Keriso o tuua le tuugamau. Sa ia manatuaina foi le tala a Sister Costa e faapea, ona o le Faaola, o le a tatou toe ola uma ai i se aso.

“Tina, o loo soifua Iesu. Na maliu o Ia, ae sa toetu mai o Ia. E i ai se aso, o le a toetu ai foi Tama, a ea?” O le fesili lea a Melissa.

“Ioe, pele” o le tali lea a Tina. Ona o Iesu, o le a tatou toe vaai ia Tama i se aso!

Sa misia e Melisa lona tama. Sa manao o ia e fusi o ia, faalogo i lona leo, ma toe taaalo faatasi ma ia. Ona o Iesu Keriso, e i ai se aso o le a ia faia ai. Ae e tatau ona faatali o ia. Sa tuu e Melisa lona lima i luga o le pusa maliu ma musumusu atu, “Ta feiloai i se aso, Tama.”

E ui lava o se aso faanoanoa tele, ae sa lagona e Melissa le filemu lava lea e tasi sa ia lagonaina i le Peraimeri. Sa ia iloaina o le Agaga Paia.

I aso na sosoo ai, soo se taimi lava na te misia ai lona tama, sa usuina lemu e Melisa ia upu i le “Ketesemane” ia te ia lava. Ma o taimi uma lava sa pese ai o ia, sa ia lagonaina le mafanafana.

Ina ua taunuu mai le Aso Sa o le Eseta, sa ese le lagona mo Melissa.

Nai lo le mafaufau e uiga i fuamoa sukalati po o lapiti, sa ia mafaufau atili e uiga ia Iesu Keriso ma lona tama. Sa ia iloa o le a ia misia pea o ia. Ae sa ia iloa foi o le oti e le o le mutaaga lea.

Sa ia iloa ua toetu Iesu ma o le a i ai se aso o le a toe ola ai foi lona tama.

Ma seia oo mai lena aso, e mafai ona ia usuina, manatua, ma lagonaina le filemu.

Tatala le PDF

Atatusi na tusia e Teresa Alberini. E mafai ona kopiina mo na o le faaaogaina e le Ekalesia.