O Le Taua o Jelly

“Faatino!”

Sa oomi e le uso laitiiti o Evan o Ethan le fpu’e i luga o le tapeleti, ma sa amata e Evan lana tautalaga. “Talofa, o lou igoa o Evan. Sa ou saili mo nisi avanoa e auauna atu ai ma maua ai le kapoti meaai a lo matou nuu.”

Sa fiafia Evan ma Ethan i le faia faatasi o ata tifaga, ae o lenei vitio sa faapitoa.

Sa tuuina atu e le kapoti meaai ni meaai i aiga e lei lava ni tupe e faatau ai ni meaai i le faleoloa. I le taimi nei, o le kapoti meaai ua leai uma ni jelly. Sa laua talosagaina tagata e foai atili atu.

Sa lagona e Evan i taimi uma le fiafia ina ua ia auauna atu, o lea sa ia filifili ai e ao mai ni jelly e foai atu. Sa ia faia se vitio e fai atu ai i ona tuaoi e fesoasoani foi.

“Afai e te manao e fesoasoani, e mafai ona e aumai ni jelly i lo’u fale. Pe e mafai foi ona e auina atu se tupe, ma o le a ou faatauina ai jelly mo oe!” Na fai mai Evan a o pue e Ethan le ata.

Ina ua uma ona pue ata, sa faasa’osa’o e Evan le vitio seia oo ina fetaui lelei mo le faasoa atu. Ina ua uma ona tuu i luga e Tina le vitio i luga o le initoneti, sa amata ona momoli atu e tagata ia jelly ma auina atu tupe e faatau ai isi jelly e tele!

I le faleoloa, sa faaputu ai e Evan fagu jelly i totonu o se taavale toso. “O le a sili atu ona malie lenei mea i le toatele o tamaiti,” o lana tala lea. “Atonu e mafai ona fesoasoani tamaiti i la’u aoga.”

“Manaia tele le manatu,” o le tala lea a Mama.

O le aso na sosoo ai i le aoga, sa talosaga atu ai Evan e vaai ia Puleaoga Sanchez. Sa ia faamatalaina lona manatu e ao mai jelly mo le kapoti meaai.

“E mafai ona pei o se taaloga,” o le tala lea a Evan. “E mafai ona tatou ta’ua o le Taua o Jelly.”

“O se fuafuaga maoae lena!” o le tala lea a Puleaoga Sanchez.

Sa faia e Evan ni pepa faalauiloa e tufa atu ai i le vasegafa uma e ta’u atu ai ia i latou e uiga i le Taua o Jelly.

O le vaiaso na sosoo ai, sa tauva ai le vasega fa atoa i le Taua o Jelly. Sa taumafai vasega taitasi e aumai fagu jelly e sili ona tele.

I le malologa, sa fiafia tagata uma e uiga i le Taua o Jelly. “Ou te lei faia lava se tauvaga faapenei,” o le tala lea a Maria le uo a Evan. “Ou te faamoemoe e malo la’u vasega.”

“Ou te matea e malo la’u vasega!” o le tala lea a le la uo o Isaako. “Sa ou aumaia ni fagu se tolu i le asō.”

Sa vaavaai atu Evan i pusa o foai i potuaoga taitasi ua amata ona tumu i fagu.

I le taimi o le malologa, sa elieli oneone ai Evan ma lana uo o Gabe. “Pe na e aumaia ni fagu jelly?” na ia fesili ai.

“Na tuuina mai e lo’u tama ia te au le lima e foai atu! Sa ou tuuina i totonu o le pusa i le taeao nei,” o le tala lea a Gabe.

“Oka!” Sa le talitonu Evan i le toatele o tamaiti na auai i le Taua o Jelly.

E lei umi ae faatumulia pusa jelly seia atu i luga. Sa potopoto uma ia le vasega fa ma faiaoga i se potuaoga se tasi e faalogologo ia Evan o faasilasila atu le au manumalo o le Taua o Jelly.

“Sa tatou aoina faatasi le silia ma le 200 fagu o jelly!” o le tala lea a Evan. Sa alalaga fiafia uma tamaiti.

“Sa faia e tagata uma se galuega lelei tele, ae e na o le tasi le vasega e mafai ona manumalo,” na faaauau ai Evan.

Sa taofi uma manava a tagata e faalogo po o ai na manumalo.

“O le vasega a Mrs. Child ua manumalo!”

O tamaiti i le vasega a Mrs. Child sa feosofi i luga ma lalo ma pati o latou lima.

Ina ua tuua le aoga, sa feiloai Evan ma ana uo e savavali i le fale.

“E lei manumalo la’u vasega, ae sa ou lagona le fiafia ona sa mafai ona ou fesoasoani i isi tagata,” o le tala lea a Maria.

“Ma a’u foi,” o le tala lea a Evan. “O ai na iloaina o tamaiti e mafai ona faia se eseesega tele?”

Sa le mafai e Evan ona faatali e ave uma jelly i le kapoti meaai. Sa ia lagona le mafanafana i totonu ina ua ia mafaufau i tagata uma o le a i ai meaai ona o a latou foai.

O le mea sili lava, sa ia iloa sa ia mulimuli ia Iesu Keriso e ala i le fesoasoani atu i isi. Sa manao Evan ia lagona faapena i taimi uma.

“Ei, Tina,” na ia fai atu ai ina ua ia taunuu i le fale. “O afea e mafai ai ona tatou faia le isi a tatou galuega fesoasoani?”

Tatala le PDF

Ata na tusia e Minna Miná. E mafai ona kopiina mo na o le faaaogaina e le Ekalesia.