O Le Lesona o le Fuamoa o le Eseta

I le aso a o lumanai le Eseta, sa alapo ai Freddy. Sa tilotilo atu o ia i autafa o lona aluga, ma le fiafia. E masani lava ona ia maua se fuamoa masimelo mo le Eseta. Ae o lana ataata na oo atu i se faauu. Sa leai se fuamoa mo ia!

Sa tilotilo atu Freddy i autafa o le moega fogafale lua. “Matilda!” sa ia ee atu ai i lona tuafafine. “Na e gaoia la’u fuamoa o le Eseta?”

“Leai,” sa ia fai mai ai. “E le o ii foi la’u fuamoa!” Sa tusi atu Matilda i lona aluga.

O le pisa sa feala ai isi tei o Freddy. Na misi uma a latou fuamoa e fitu o le Eseta!

“O le a lenei pisapisao?” O le fesili lea a Tina.

“Ua gaoi e se tagata a matou fuamoa!” Na fai mai ai Freddy.

“E leai se tasi na gaoia,” o le tala lea a Tina. “Ma te lei faatauina mai ni fuamua i lenei tausaga.”

“Leai ni fuamoa o le Eseta?” Sa tagi Freddy. “Ae o taimi uma lava matou te maua ai se fuamoa e tasi!”

“O le Eseta e sili atu nai lo le na o le taumafa i meaai mama,” o le tala lea a Tina. “O se taimi faapitoa e mafaufau ai ia Iesu Keriso.”

Sa faauu Freddy. Talu mai lava le suiga o galuega a Tama, sa faatele atu ona fai mai tina ma Tama e leai. Leai ni tafaoga i le ao. Leai ni meaai faatau mai faleaiga. Ma o lenei ua oo lava i le Eseta ua faaleagaina!

“Ou te iloa ua e le fiafia,” o le tala lea a Tina. “Ae e mafai lava ona tatou fiafia i fuamoa faapitoa o le Eseta i le asō. Sau loa!”

I le umukuka, sa i ai se ato fuamoa a Tama. Sa oi Freddy. “O fuamoa na o moa.”

“O le a tatou valiina?” o le fesili lea a lona tuafafine matua o Celeste.

Sa luelue le ulu o Tina. “Ae muamua lava e tatau ona tatou faapuna i latou.“

Sa le fiafia Freddy e faatali. Sa fiafia o ia ina ua fai mai Tina ua lava le pupuna o fuamoa. “O lea la!” o lana tala lea.

“Faatali pea,” o le tala lea a Tina. “E manaomia pea ona faamaalili.”

Sa oi leotele Freddy. Ua lava na faatalitali!

O le mea na sosoo ai, sa fesoasoani Tina ia i latou e fai le vali. Sa latou saeu faatasi le vineta ma le vai vevela ma tuu ai mataua o le vali meaai. Sa fiafia Freddy e matamata i mataua o loo faataamilo i le vai.

“O le a le lanu o le a e filifilia?” O le fesili lea a Celeste.

“Lanumoana!” Na fai mai ai Freddy.

Sa soka fuamoa i le vali mo se taimi umi lava. Ae sa lei afaina ia Freddy le faatalitali. E le o le taimi lenei. O se mea manaia le faatasi ai ma lona aiga. Sa mafaufau o ia i le mea na fai mai ai Tina—o le auala na sili atu ai le Eseta nai lo le ai i meaai mama.

“Tina,” o le tala lea a Freddy, “Ou te manatu ua ou iloa le auala e fesoasoani ai fuamoa o le Eseta ia i tatou e manatua ai le Toetu o Iesu Keriso.”

Sa ataata o ia. “E faapefea lena mea?”

“Ou te fiafia lava i la’u fuamoa vali,” o lana tala lea. “Ae sa tele se taimi na alu ai. O le na faatalitali sa faigata. Ona ou mafaufau lea pe na faapefea ona faatalitali le au soo mo le Toetu o Iesu Keriso ina ua maliu o Ia i luga o le satauro.”

“E sa’o oe,” na fai atu ai Tina. “Sa lei faigofie mo i latou ona faatalitali foi. Ae sa toetu mai le Faaola. Ma o lenei o au fuamoa masani o ni fuamoa vali matagofie.”

Sa ataata Freddy i fuamoa lanu sesega. Sa le manaia i latou e pei o ni masimelo, ae sa faapitoa lava. Sa faamoemoe Freddy o le a latou toe valiina fuamoa i le tausaga a sau.

Tatala le PDF

Atatusi na tusia e Tania Rex. E le mafai ona kopiina.