“Pagpakigbahin sa Maayong Balita,” Higala, Mar. 2026, 36–37.

Pagpakigbahin sa Maayong Balita

Ni Kelvin Njenga

Usa ka tinuod nga istorya gikan sa Kenya.

Mga paghulagway sa mga kahoy nga mangga, mga balay nga kugon og atop, ug sa usa ka babaye nga naghatag og usa ka plato nga snak sa batang lalaki

Usa ka mahayag nga Dominggo sa Pasko sa Pagkabanhaw, si Ryan mibangon og sayo ug midagan ngadto sa kusina. Nasimhot niya ang lubi ug ang mga lamas nga gikan sa mahamri nga bag-o lang gihimo sa iyang Mama. Giingkit ni Ryan ang usa sa init, humokon nga triangle nga mga donut. “Mama! Pasko sa Pagkabanhaw karon! Puwede tang motan-aw og salida bahin ni Jesus karon?” nangutana siya nga nagpahiyom og dako.

Ang Mama mitan-aw niya ug mipahiyom. “Siyempre!”

Ang gamayng manghod ni Ryan, si Liam, midagan sa gawas samtang ang Mama ug si Ryan milingkod aron motan-aw sa salida.

Paghulagway sa usa ka babaye og batang lalaki nga nagtapad ug nagtan-aw sa salida sa TV

Nakita nila si Jesukristo nga naghimo og mga milagro ug nagserbisyo sa mga tawo. Dayon dihang gipasakitan si Jesus sa mga tawo, ang mga mata ni Ryan napuno sa luha.

“Mama, nganong gibuhat man nila kadto ni Jesus?” nangutana siya nga magul-anon.

“Gipili niya nga mag-antos para nato,” miingon ang Mama. “Gihigugma kaayo Niya kita, Ryan. Namatay Siya aron mabuhi kita pag-usab.”

Dihang ang salida nagpakita sa Pagkabanhaw ni Jesukristo, mipahiyom si Ryan. “Tan-awa, Ma! Nabuhi Siya pag-usab!”

“Husto kana,” miingon ang Mama. “Siya nabanhaw! Sama sa gisulti sa anghel diha sa Biblia.”

Sa wala madugay si Ryan migawas aron magdula. Nakita niya si Liam nga nagdula og mga tukog sa ilawom sa kahoy nga mangga.

Paghulagway sa batang lalaki nga miduol sa iyang manghod nga lalaki, kinsa naglingkod sa ilawom sa kahoy nga mangga

“Liam! Gusto kong mosulti nimo og nindot nga istorya,” miingon si Ryan.

Naghuwat si Liam samtang nilingkod si Ryan sa ilawom sa kahoy nga mangga. “Bahin ba kana sa mga sakyanan?”

“Dili. Labaw pa niana!” Miingon si Ryan. “Bahin kini kang Jesus. Namatay Siya, apan nabuhi Siya pag-usab.”

“Tinuod?” Nangutana si Liam.

“Oo! Ang anghel miingon, ‘Wala Siya dinhi; kay Siya nabanhaw na!’ Nagpasabot kana nga kita usab mabuhi pag-usab.”

“Wow!” Miingon si Liam. “Kusgan kaayo si Jesus.”

Mitando si Ryan. Naghunahuna siya kon unsa Siya ka pinangga ni Jesukristo. Nakapuno kini ug nakapalipay sa iyang kasingkasing. Iyang gipakigbahin ang maayong balita ngadto sa iyang pamilya, ug kana nakapahimo sa iyang Pasko sa Pagkabanhaw nga mas espesyal.

Duha ka batang lalaki nga naglingkod ilawom sa kahoy nga mangga