“Ang Maanindot nga Plano,” Higala, Mar. 2026, 4–7.

Ang Maanindot nga Plano

Paghulagway sa langit nga napuno sa bitoon

Sa wala pa kita moanhi sa yuta, ang Langitnong Amahan adunay nindot nga plano alang kanato. Matawo kita ug magkat-on ug molambo dinhi sa yuta. Makasunod kita sa Iyang dalan sa pakigsaad ug makahimo og maayong mga pagpili.

Ang Langitnong Amahan nasayod nga magkinahanglan kita og tabang. Nasayod Siya nga makahimo kita og dili maayo nga mga pagpili ug makasala usahay. Dili kita makabalik ngadto Kaniya kon dili kita limpyo.

Nagkinahanglan kita og usa ka espesyal nga tawo nga motabang nato aron malimpyo sa atong mga sala. Si Jesukristo mao ang kamagwangan nga espiritu nga Anak sa Langitnong Amahan. Mitanyag Siya nga moanhi sa yuta ug moluwas kanato gikan sa atong mga sala.

Paghulagway sa Malaamon nga mga Tawo nga nagsunod sa bitoon sa pasko sakay sa mga kamilyo

Sa daghang katuigan, ang katawhan naghulat nga matawo si Jesus. Sa kataposan, usa ka bag-ong bitoon ang midan-ag sa langit aron pahibaloon ang kalibotan nga ang Manluluwas miabot na.

Paghulagway sa Manluluwas uban sa mga bata

Sa dihang midako na si Jesus, Iyang gitudloan ang katawhan sa ebanghelyo. Mabination ug mahigugmaon Siya. Iyang gipanalanginan ang mga bata.

Paghulagway sa Manluluwas nga nag-ayo sa masakiton nga bata diha sa higdaanan

Mitudlo siya nga kinahanglan kitang mosunod Kaniya ug motratar sa uban sama sa Iyang pagtratar. Giayo Niya ang mga tawo nga masakiton. Gibuhi Niya og balik ang mga tawo nga namatay na.

Paghulagway ni Jesukristo nga nag-ampo sa Getsemani

Nasayod si Jesus nga panahon na alang sa Iyang labing mahinungdanong milagro. Miadto Siya sa Tanaman sa Getsemani ug nag-ampo. Gibati Niya ang kasakit sa tanan natong mga sala, kaguol ug sa atong mga sakit.

Paghulagway ni Jesukristo nga anaa sa krus

Ug ubang mga tawo nasuko ni Jesus. Wala sila ganahi sa Iyang gitudlo ug wala motuo nga Siya ang Anak sa Dios. Gidakop si Jesus ug gilansang sa krus, diin Siya namatay.

Usa ka grupo nga nagbangotan nag-andam sa lawas ni Jesus didto sa lubnganan

Nagguol kaayo ang mga higala ni Jesus. Gipahimutang nila ang Iyang lawas sa lubnganan ug giligid ang dakong bato ngadto sa atubangan sa pultahan.

Paghulagway kang Maria Magdalena nga naghilak

Sa paglabay sa tulo ka adlaw, pipila ka babaye miadto sa lubnganan. Ang bato giligid na palayo ug ang lubnganan wala nay sulod! Si Maria Magdalena nagsugod og hilak kay nawala ang lawas ni Jesus. Usa ka buotan nga tawo nangutana niya kon nganong naghilak siya. Dihang gisultihan niya Siya, gitawag siya sa iyang ngalan. Mitan-aw siya Kaniya ug nakakita nga Siya mao si Jesus! Nabuhi Siya pag-usab!

Paghulagway sa nabanhaw nga Manluluwas nga nagpakita kang Maria Magdalena

Sa Pasko sa Pagkabanhaw atong gisaulog ang gibuhat ni Jesukristo para nato. Tungod kay Siya nagsakripisyo alang kanato, makahinulsol kita ug malimpyo. Tungod kay Siya nabanhaw, mabuhi usab kita pag-usab! Tungod Kaniya, kita makabalik ngadto sa Langitnong Amahan ug makauban nato ang atong mga pamilya sa hangtod.