Semana Santa ni Mia

Si Mama ug si Papa mibasa sa istorya sa Dominggo sa Lukay diha sa mga kasulatan. Sa dihang miadto si Jesukristo sa Jerusalem, ang mga tawo miwara-wara og mga lukay ug misinggit og “Hosanna!”

Ang akong igsoon nga si Lucy naggunit og hulagway ni Jesus nga nagsakay og asno. Ang uban namo miwara-wara sa among mga sanga nga papel. Mibati ko og kalipay sa paghunahuna nga akong giabi-abi si Jesus.

Nasuko si Jesus nga ang mga tawo namaligya og mga butang diha sa templo, mao nga Iya kining gilabay. Namunit kami og basura didto sa mga kasagbotan libot sa simbahan. Nalipay ko nga makatabang mi sa pag-atiman sa balay sa Dios!

Mibasa si Mama og mga istorya nga gisulti ni Jesukristo sa mga tawo. Naminaw mi og among gigamit ang clay sa paghimo og mga butang gikan sa mga istorya. Si Lucy mihimo og karnero kay si Jesus mao ang Maayong Magbalantay sa karnero. Mihimo ko og gamay nga lampara. Nakatabang ni nako sa paghinumdom nga pun-on kanunay ang akong kasingkasing sa pagtuo.

Gisultihan mi ni Papa nga si Maria mihatag ni Jesukristo og espesyal nga lana para sa Iyang mga tiil. Ang kahumot niini mipuno sa tibuok balay.

Wala kami niining espesyal nga lana. Hinuon, among gigamit ang sinamon sa paghimo og makaon. Misulti si Mama nga kon among masimhot ang sinamon samtang giluto pa ang makaon, angay kaming maghunahuna kon unsa ang among mahimo nga ihatag ni Jesus.

Among gidagkotan ang mga kandila ug mikanta og awit, sama nga si Jesukristo ug ang Iyang mga disipulo mikanta atol sa Kataposang Panihapon. Mikaon mi og pan nga pita ug miinom og grape juice aron sa paghinumdmon sa unang sakramento. Nag-andam usab mi og mga prutas nga granada [pomegranates] aron mopahinumdom namo sa dugo ni Jesus, ug mga olibo alang sa tanaman sa Getsemani.

Samtang nangaon mi, mitingog ang dalugdog sa gawas. Mibati ko nga luwas ug mapasalamaton sa pagkahibalo nga giatubang na ni Jesus ang labing lisod nga mga hagit ug pagsulay.

Mibasa mi kon sa unsang paagi si Jesukristo namatay alang kanato. Dayon among gidala ang walay sulod nga kaang sa buwak didto sa tanaman ug among gipahigda sa kilid nga bahin niini, sama sa walay sulod nga lubnganan. Nagbutang mi og mga yuta ug mga bato libot niini apan wala namo gitabonan ang buka nga bahin. Gihatagan mi ni Mama og porma nga nagrepresentar sa lawas ni Jesus. Giputos namo kini og puti nga panapton sa matinahoron nga paagi ug gibutang kini sa sulod sa kaang sa buwak.

Bisan tuod og kaang lamang kadto sa buwak, gibati gihapon nako ang kaguol sa pagtabon sa pultahan gamit ang bato.

Misulti si Mama nga human mamatay si Jesukristo, giandam Niya ang misyonaryo nga buluhaton didto sa kalibotan sa mga espiritu. Nianang paagiha ang mga tawo nga wala makahibalo sa Iyang ebanghelyo dinhi sa yuta makakat-on gihapon bahin Kaniya. Diha sa mga templo, mabunyagan kita alang sa mga tawo nga wala mabunyagi sa wala pa sila mamatay.

Si Lucy ug ako wala pa sa hustong edad aron makasulod sa templo, apan mitabang mi sa paggunting sa giimprinta nga mga kard sa ngalan. Si Mama ug Papa nagpuli-puli sa paghimo sa mga buluhaton sa templo alang sa mga tawo nga anaa sa mga kard ug sa pagsuroy-suroy namo sa mga nataran. Bisan kon anaa sa gawas, ang templo mabati nga daw sama sa langit.

Sa buntag sa Pasko sa Pagkabanhaw ang bato nga didto sa atubangan sa kaang sa buwak nawala na ug ang panapton wala nay sulod. Dihay kard nga nag-ingon, Nabanhaw na Siya!

Nahibalo na ko daan nga si Jesus mao ang rason sa Pasko sa Pagkabanhaw. Human sa pagsaulog sa Semana Santa, gibati usab nako nga mas nakaila pa gayod Kaniya.