Ang Pagpamakak bahin sa Cheetah Chase

Gigunitan og maayo ni Emma ang iyang lapis samtang gitunol sa iyang titser ang mga papel.

“Oras na para sa atong Cheetah Chase,” miingon si Ms. Malcolm. “Duna kamoy lima ka minutos sa pagsulbad sa 93 ka problema sa math. Ang tanan nga makahuman sa eksaktong oras makadugang og cheetah nga sticker diha sa ilang tsart.”

Si Emma gusto gayod og cheetah sticker. Kon makakuha mo og lima ka sticker, makadaog mo sa premyo! Apan ang Cheetah Chase nga mga problema sa math lisod kaayo.

“Andam na ba ang tanan?” Si Ms. Malcom miingon. “Go!”

Gibali ni Emma ang iyang papel ug gisugdan ang pagtubag sa mga pangutana. Kinahanglan niyang nga hunahunaon og maayo ang matag usa. Lisod gyod!

BZZZZZZZ! Nibagting na ang timer, nakapahimo ni Emma sa paglukso.

“Ipaubos na ang mga lapis!” Si Ms. Malcolm miingon.

Gitabonan ni Emma ang iyang papel sa iyang kamot ug padayong nagsulat sa mga tubag. Dili man dakong sala kon magpadayon siya, di ba? Nahimo na niya kini kaniadto, ug walay nakabantay.

“Ipasa ang inyong papel ngadto sa tawo nga tupad nimo para magradohan,” si Ms. Malcom miingon.

Nahuman ni Emma ang kataposang tubag sa wala pa ipasa ang papel.

Sa dihang nakuha ni Emma og balik ang papel, nakita niya ang pula nga 100% sa ibabaw. Apan dili gyod maayo ang iyang gibati.

“Tanan dali pakit-a ko sa inyong mga papel aron makuha ang inyong mga sticker,” si Ms. Malcom miingon.

Milakaw si Emma ngadto sa lingkoranan ni Ms. Malcom dala ang iyang papel.

“Emma, pwede kang moari kadiyot, palihog?” Si Ms. Malcom mihangyo.

Samtang ang tanan nag-istoryahay, si Ms. Malcom miatubang ni Emma. “Padayon ka bang nagtubag sa mga pangutana bisan nahuman na ang timer?”

Nanginit og maayo ang nawong ni Emma. Miyango siya ug miduko. “Oo.”

“Nabuhat ba nimo na kaniadto?”

Milingolingo si Emma. “Wala.” Apan gibati niya nga nanginit og samot ang iyang nawong. Nakapanikas na siya kaniadto. Ug karon namakak siya.

“Dili ko makahatag nimo og cheetah sticker hangtod nga mosunod ka sa mga lagda. Nasabtan ba nimo?”

Mitando si Emma. Dayon milakaw siya balik sa iyang lingkoranan nga nagduko.

Hangtod sa pagkahuman sa klase, mibati si Emma nga lain kaayo sa iyang tiyan. Ngil-ad kaayo ang iyang gibati sa pagpanikas. Bati ang iyang gibati tungod sa pagpamakak. Wala siya ganahi niini nga pagbati!

Human sa klase, nakig-istorya si Emma sa iyang mama. “Dili maayo ang akong pamati,” miingon siya.

“Unsay problema?” Nangutana ang Mama.

Si Emma sa kalit ginerbiyos. Sultihan ba niya ang iyang Mama unsay iyang nahimo?

Miginhawa siya og lawom. “Nanikas ko karon sa eskwelahan.” Unang higayon kadto nga nasulti niya kini nga kusog. Gibati niya nga nagkaanam kawala ang kalain sa iyang tiyan. “Ug nahimo ko na kini kaniadto. Dili maayo ang akong gibati.”

Gigakos ni Mama si Emma. “Salamat sa imong pagtug-an kanako. Kahibalo ka nga ang pagpanikas sayop. Nganong nahimo nimo kadto?”

“Kay gusto gyod ko og usa ka cheetah sticker, apan wala nako mahuman sa oras ang akong pagtubag sa problema sa math.”

Miyango si Mama. “Unsa kahay imong buhaton karon?”

Gihunahuna kini ni Emma. “Kinahanglan kong mag-mpo sa Langitnong Amahan aron mangayo og pasaylo sa pagkadili matinuoron. Dayon sultihan ang akong titser.”

“Maanindot kana.” Mipahiyom si Mama. “Ug makatabang ko nimo nga makapraktis og daghan pa sa math aron maandam ka sa Cheetah Chase.”

“Salamat, Mama,” miingon si Emma. Dayon siya ug ang Mama nangluhod aron mag-ampo. Mibati og kainit si Emma. Nalipay siya nga nakahukom siya nga maghinulsol.

Human sa iyang pag-ampo, nag-email si Emma sa iyang titser. Gisulti niya ang kamatuoran ug nangayo og pasaylo sa pagpanikas. Misaad siya nga dili na gayod niya kini himoon og usab.

Human ma-klik ang send, mas maayo na ang gibati ni Emma. Nasayod siya nga tingali papason ni Ms. Malcolm ang iyang mga cheetah stickers gikan sa iyang tsart. Apan OK ra kana. Sugod karon maangkon na niya kini sa matinuoron nga paagi.

Ablihan ang PDF

Mga paghulagway pinaagi ni Anny Chen