“Ang Sopa sa Pagpamalandong,” Higala, Peb. 2026, 4– 5.

Ang Sopa sa Pagpamalandong

Ni Alissa Holyoak

Unsa kahay buhaton ni Jesus kon ania pa Siya dinhi karon?

Usa ka tinuod nga istorya gikan sa USA.

Paghulagway sa duha ka batan-ong babaye nga naglingkod kauban sa ilang mama sa usa ka sopa nga adunay pinintal nga hulagway ni Jesukristo sa bongbong

Si June dili gustong molingkod sa sopa sa pagpamalandong!

Sa iyang pamilya kinahanglan kang molingkod sa dako, humok nga sopa kon makahimo ka og sayop nga pagpili. Bag-o lang, si June kinahanglang molingkod didto sa makadaghan, sama sa dihang namakak siya o mihimo og daghang katag sa kusina ug dili molimpiyo. Apan sa kadaghanan molingkod siya sa pagpamalandong nga sopa human makig-away sa iyang igsoon nga babaye, si Kelly.

Karon si June naglingkod sa pikas kilid ug si Kelly sa pikas kilid. Ang ilang Mama milingkod tupad nila ug gitudlo ang litrato ni Jesukristo nga naa sa bongbong.

“Atong hunahunaon unsa kadako ang paghigugma sa Manluluwas kaninyo” miingon ilang Mama. “Unsa Kahay Iyang buhaton kon nia pa Siya dinhi? Unsa kahay gusto Niya nga inyong buhaton?”

Mitutok si June sa salog. Dili siya gustong motan-aw sa litrato. Nasayod siya nga si Jesus gusto nga siya magmabination. Apan nabalaka usab siya nga basin og masuko Siya [Jesus] niya tungod sa pagpakig-away.

Paglabay sa pipila ka adlaw dihang miduaw ang ilang higala nga si Samantha, si June ug Kelly nakahimo sa labihan ka grabe nga pakig-away sukad.

Human nga si Kelly mipalayo nga labihan kapungot, si June mibati og labihan kasuko nga daw siya mobuto. “Dili na ko gustong makigdula ni Kelly. Makalagot siya kanunay!”

“Apan ako gusto man kong makigdula ninyong duha,” miingon si Samantha. “Ug si Kelly dili man kanunay nga maglagot.”

“Ah, pero kanunay siyang maglagot nako,” miingon si June. “Iya kong siyagitan ug mongalan og ngil-ad nako ug … dapatan ko niya!”

Misiga ang mga mata ni Samantha. “Wala gyod ko makakita niya nga midapat nimo.”

“Oo, dapatan ko niya,” miingon si June. “Permi gyod!”

Subo nga tan-awon si Samantha. Si June nagsugod nga lain ang gibati. Ngano nga nakasulti man siya og ingon ana ka ngil-ad nga bakak?

Usa ka tingog gikan sa may pultahan nakapahangad ni June. Naa didto si Kelly. Nakadungog siya sa tanan! Midagan si Kelly nga naghilak. Nahugno ang kasingkasing ni June.

Wala madugay mipauli si Samantha. Apan si June padayon nga naglingkod sa salog. Pagkataudtaod, ilang Mama misulod sa kwarto.

Nasagmuyo si Kelly,” miingon siya. “Unsay nahitabo?”

Miduko si June. “Um … namakak ko. Miingon ko nga iya kong gidapatan. “Dili na tinuod. Kinahanglang makig-istorya ko niya.”

Nasayod siya nga kinahanglan siyang mangayo og pasaylo. Apan unsa kaha kon dili siya pasayloon ni Kelly?

Human motan-aw sa palibot, nakita niya si Kelly nga nagtikuko sa sopa nga namalandong. Milingkod siya tupad niya. Apan wala siya masayod unsay isulti aron mas momaayo ang sitwasyon. Nagsugod siya sa paghilak.

paghulagway sa batang babaye nga nagtikuko nga naggakos sa iyang mga bitiis

“Pasayloa ko,” miingon si June. “Wa ko kahibalo nganong nasulti nako ang ingon kangil-ad nga bakak. Ug gusto gyod kong makigdula nimo.”

Nagpaabot si June nga mosingka si Kelly. Apan hinoon, milingkod siya og tarong ug migakos ni June og kusog. “Gipasaylo teka,” miingon siya.

“Ha?” Miingon si June, nga nakalitan.

“Pasayloa usab ako,” miingon si Kelly. “Dili na ta mag-away.”

Gipahiran ni June ang iyang mga mata. “Ganahan ko ana.”

Mitan-aw siya sa litrato ni Jesukristo. “Kanunay kong maguol basin masuko Siya nako tungod sa pagpakig-away,” miingon si June. “Apan dili ingon niana si Jesus. Unsay kahay Iyang buhaton?”

“Tingali gakson ta Niya og hugot,” miingon si Kelly. “Ug mohangyo nga kita mas magbinuotan sa usag usa.”

Mipahiyom si June. “Seguro.”