Kakeememej ko an Kweilo̧k eo

Būreejtōn Oaks ej katakin bwe baam̧le ko rej dilepen gospel in an Jisōs Kraist. Ke eaar juon laddik edik, jemen eaar jako. Ako jinen eaar katakini kōn gospel in, im eaar leļok n̄an e aenōm̧m̧an im kōjatdikdik. Baam̧le ko rej ioon elōn̄ men ko, ako ippād emaron̄ wōr kōjatdikdik ke jemaron̄ uwaan juon baam̧le n̄an indeeo.

Jin̄aik juon pija in baam̧le eo am̧.

Elder Eyring eaar ba bwe tōre eo ekar pād ilo college, Physics im math rekar pen n̄an e. Eaar en̄jake an edodo im kōņaan bōjrak. Ke ekar jar, eaar en̄jake aenōm̧m̧an im kajoor. Eaar katak bwe emaron̄ kōm̧m̧an men otemjej ilo Kraist, eo im ej kakajoor kōj wōj (lale Pilippai 4:13). Eļan̄n̄e jej ioon iien ko reppen, Jemedwōj Ilan̄ im Jisōs Kraist renaaj pād ippād.

Jin̄aik ak jeje kōn juon tōre kwaar kōm̧m̧ane juon men epen kōn jipan̄ eo an Jemedwōj Ilan̄ im Jisōs Kraist.

Kevin G. Brown eaar kwaļok ke ekar deļon̄etok Kabun̄ in ilo Jamaica. Eo m̧ōttan eaar kajjitok, “Kwojaam̧ tin etal n̄an kabun̄ en? Kwoj ke lukkuun tōmak e?” Ak eaar wōr an naan in kam̧ool jān Jetōb Kwojarjar, im eaar jutak pen n̄an naan in kam̧ool eo an. Eļan̄n̄e jej kāālet n̄an tōmak, naan in kam̧ool ko ad rej eddōkļok.

Sister Spannaus ej kwaļok juon bwebwenato in Baibōļ eo kōn juon kōrā eo im eaar karuwaineneik rikanaan Elija n̄an m̧ōn̄ā m̧weo im̧ōn. Kōrā in ekar barāinwōt kalōke juon ruum̧ ilo m̧weo im̧ōn bwe en maron̄ wōr jikin an pād. Jetōb Kwojarjar eaar kwaļok n̄an e ke em̧m̧aan in ej juon rikanaan an Anij. Kōj barāinwōt jemaron̄ bōk ad naan in kam̧ool kōn rikanaan ro an Anij. Jemaron̄ kōpeļļok būruōd im ļoor er.

Sister Browning eaar kenono kōn aorōkin al ko an Būraimare. Eaar ba bwe al ej kein jerbal eo emaron̄ jipan̄ katōk ineen naan in kam̧ool eo ilo būruōd. N̄e jej al al in Būraimare ko, jej al kōn naan in kam̧ool ko ad kōn jepļaaktok eo an gospel in. Jisōs elukkun kōņaan bwe jen juon meram in aļ (sunbeam)!