15,100 im Lōn̄ļok

N̄e enaaj 8 aō iiō, Ej kab naaj wōr aō akkaun in FamilySearch! Ilo jinoin ikar mijak, ak ro jinō im jema im ro jeiū im jatū rekar katakin n̄a kilen index im kōm̧m̧ane menmenbwij eo aō bwe in maron̄ jipan̄ ro jibū im jim̧maō. Ālkin men in, ikar jab bar mijak. Ikar en̄jake jipan̄ im kar pojak.

Innām ikar en̄jake ikdeelel in erom̧ juon rietale menmenbwij an baam̧le āinwōt ro jinō im jema im ro jeiū im jatū. Ikar kāālet bwe en juon iaan kōttōpar ko aō n̄an būrookraam̧ an Ajri im Jodikdik ro. N̄an tōpar kōttōpar in, ikar aikuj in index e 1,000 rekoot ko.

Jet iien n̄aij en̄jake aō eddodo. Ak ro jinō im jema rekar kakeememej eō bwe ijjab maron̄ kōm̧m̧ane aolepāer ilo juon wōt raan. Ijello̧kin, ij aikuj pedped ioon jilu rekoot juon raan, im m̧okta jen an jemļok juon iiō inaaj tōpar kōttōpar e aō. Rekar ba bwe n̄e enaaj pen aō meļeļe pija ko, renaaj jipan̄ eō.

Ikar jar n̄an Jemedwōj Ilan̄ bwe en jipan̄ eō kōttōprak kōttōpar in aō. Ekar em̧m̧an aō mour ālkin aō jar.

Ikar jab ebbweer ak ikar wōnm̧aanļo̧k im index jen raan n̄an raan. Ālkin juon iiō, m̧okta jan an 9 aō iiō, ikar index elōn̄ļo̧k 1,000 rekoot im kar letok juon kūr bwe in juon eo ej rietale. Ikar lukkuun in m̧ōņōņō!

Kiiō ij etal wōt ippān ro jinō im jema n̄an Trujillo Peru Tampeļ. Ikar jipan̄ būriin kaat in kain̄i ko, m̧wijti, im leļo̧ki n̄an kajjojo membōr in baam̧le eo bwe ren maron̄ kōm̧m̧ane kain̄i ko ilo aō kōttar ilo jikin ekkat ko an tampeļ eo. M̧ōttan jidik imaron̄ deļon̄ im kōm̧m̧an peptaij.

10 aō iiō kiiō ak em̧ōj aō index e 15,100 rekoot ko! Ikar lukkuun m̧ōņōņō im kijooror n̄an tōpar kōttōpar eo aō n̄an erom̧ āinwōt Jisōs Kraist.

Kōmeļeļe jen Parker Nielsen