“Kāālet eo an Logan kōn Juon M̧ōttan Jon̄oul,” Jera, Nobōm̧ba 2025, 8–9.
Kāālet eo an Logan kōn Juon M̧ōttan Jon̄oul
“Kopojak ke in pokake kien in n̄an kōļļā juon m̧ōttan jon̄oul?” M̧am̧a eaar kajjitōk.
Juon bwebwenato em̧ool jān USA.
Ke Logan ekar 5 iiō dettan, ekar ļōm̧nak bwe juon m̧ōttan jon̄oul ekar jab juon men em̧m̧an!
Ilo iien nokin in jota, M̧am̧a ej likūt 10 taļa ioon tebōļ eo. “Jen ba ke kwaar bōk 10 taļa.”
Logan eaar ettōn̄ dikdik. “EKWE!”
“Juon m̧ōttan jon̄oul ej 10 bōkjāān. Innām kwoj aikuj leļo̧k juon taļa n̄an kabun̄ eo an Irooj.“ M̧ama eaar bōke juon taļa jān jāān ko.
Logan ekar jab m̧ōņōņō. “Leļok juon taļa ke? Ak ikōņan bōke aolep jāān ko aō!”
“Bōlen enaaj oktak am̧ ļōm̧nak n̄e korūttoļo̧k,” M̧am̧a ekar ba. “Jemedwōj Ilan̄ ekar kōjeraam̧m̧an kōj kōn aolep men. Kōļļā juon m̧ōttan jon̄oul ej juon wāween kwaļo̧k ad iakwe n̄an Anij im kam̧m̧oolol kōn kōjeraam̧m̧an ko An.”
Ke eaar jiljino an Logan iiō, rūkaki ro an ilo būraimare rekar katakini bwe juon m̧ōttan jon̄oul ej jerbal n̄an kalōk tampeļ ko. Ellukkun em̧m̧an ippān Logan tampeļ ko. Kōn menin kōļļā juon m̧ōttan jon̄oul ekar em̧m̧an ippān jet armej. Ak ejjab n̄an e.
Ke Logan eaar jiljilimjuon an iiō, eaar loe an armej ettōn̄ dikdik n̄e rej leļo̧k empiḷoob ko aer n̄an bisop eo. Leļo̧k jāān ko am̧ ej lukkuun kam̧ōņōņōik eok?
Ke eaar ralitōk an iiō, jinen eaar kajjitōk ippān, “Logan, etke kwaar kāālet n̄an peptaij?”
Epidodo uwaak e kajjitōk ņe! “N̄an kōjparok kien ko im ļoore Jisōs Kraist,” Logan eaar ba.
“Innām kopojak ke in pokake kien in n̄an kōļļā juon m̧ōttan jon̄oul?” M̧am̧a eaar kajjitōk. “Am̧ pepe.”
Būruwōn Logan ekar eddo. Ekar jab juon kajjitōk epidodo. Ekar jab kōņaan leļok jāān ko an. Ak eaar kōņaan kōjparok kien ko. Logan eaar ļōm̧nak kōn tampeļ im armej ro rej ettōn̄ dikdik im rekar kōļļā juon m̧ōttan jon̄oul. Innām ekar bōk kitwōn im ba,“Aaet.”
“Enaaj juon kāālet em̧m̧an!” M̧am̧a ekar ba.
Logan ekar em̧m̧anļo̧k an mour. “Ijeļā ke kōjparok kien ko eļapļok an aorōk jān kōjparok jāān ko aō.”
Ilo Jabōt, ke eaar leļo̧k empiļoob in juon m̧ōttan jon̄oul eo an kein kajuon n̄an bisop eo, Logan eaar kile ke eaar ettōn̄ dikdik. Ekar en̄jake m̧ōņōņō! Ear jab lukkun meļeļe aolep men kōn juon m̧ōttan jon̄oul. Ak kōn an iakwe Anij, ekar jeļā ke Anij enaaj kōjeraam̧m̧an e kōn an pokake kien ko.
Kōmeļeļe ko jān Shawna J. C. Tenney