Pojak n̄an Eddōkļo̧k

Jewel ej jijōt ioon jea eo ilowaan jikin kwojkwoj eo ippān ro jinen im jemān im ļaddik eo jatin. Ekar jin̄a pijain bwebwenato ko ilo Jeje ko Rekwojarjar Ekar kajjieon̄ ron̄jake rikōnono eo, ak lojeen ekar ikūm̧kum̧!

Rainin ekar raan eo kein kajuon n̄an an Jewel etal n̄an Doulul eo an Jiron̄ ro ijello̧kin Būraimare. Jewel ekar jab kōņaan etal jān ro m̧ōttan ilo Būraimere. Em̧m̧an ippān kajoor al im riiti jeje ko rekwojarjar ippāer.

Ak Jewel eaar 12 an iiō iiō in. Iien an em̧m̧akūt n̄an būrookram̧ eo an Doulul eo an Jiron̄ ro.

Jewel ej kiil mejen im jar ilo būruwōn. Jemedwōj Ilan̄, jouj im jipan̄ eō bwe en em̧m̧an aō etal im kūlaaj ilo Doulul eo an Jiron̄ ro.

Ālkin jar in ikilōk eo lo iien kwojkwoj eo, Jewel ekar bōk kitwōn im etal n̄an kūlaaj eo. Leddik ro rerūtto rekar kōttar ijo. Ekar wōr emān iaier. Rekar bwebwenato im ettōn̄.

“Iakwe,” Jewel ekar ba.

Rekar ettōn̄ dikdikļok. “Iakwe.”

Rūkaki eo ej itok im karuwaineneiki Jewel. Innām ekar jino katak eo.

Ilo iien kūlaaj eo, Jewel ekar en̄jake an makeļo̧k. Ekar mijak in kōnono kōnke ekar jab jeļā kajjien leddik ro. Enaaj to an pād ilo Doulul eo an Jiron̄ ro. Ej en̄jake an naaj to! Enaaj ke aolep iien make iaan ijin?

Innām juon ainikien ekar itok ilo kōļmenļo̧kjeņ eo an. Koban pād wōt ilo Doulul eo an Jiron̄ ro n̄an indeeo. Korūtto n̄an am̧ em̧m̧akūt im ekkatak eļapļo̧k kōn juon rikaļoor an Jisōs Kraist.

Jewel ekar aeņōm̧m̧an kōn naan kein. Ekar kile bwe Jetōb Kwojarjar ej jipan̄ e. Jekdo̧o̧n n̄e ekar jab lukkuun būjin m̧ōttan ilo kurub eo an Jiron̄ ro, ak ekar jab makeļo̧k. Ekar pād ippān Jetōb Kwojarjar.

Ālikin an dedeļo̧k kūlaaj eo, baam̧le eo an Jewel rekar loe.

“Ej et kūlaaj en an Doulul eo an Jiron̄ ro?” M̧am̧a eaar kajjitōk.

Jewel ekar atbakwōje. “Ekar EM̧M̧AN” Ij oon̄ kake Būraimare, ijjan̄in jeļā kajjien leddik raņ. Ak ikar en̄jaake an Jetōb Kwojarjar kaeņōm̧m̧an eō.”

M̧am̧a ekar ettōn̄ dikdik. “Em̧m̧an ad ron̄! Im bōlen iien in tok enaaj em̧m̧anļo̧k.”

Jewel ekar em̧ajidjid. Ekar kōjātdikdik jinen ej m̧ool.

Iien eo tok ekar bar etal n̄an kūlaaj eo an Doulul eo an Jiron̄ ro, Jewel ekar bar ba iakwe n̄an leddik ro.

“Iakwe, Jewel,” juon iaer ekar ba. “Kwoj aikuj jijōt tūrū!”

Jewel ekar ettōn̄ dikdik im jijet itūrin leddik eo. Etan in kar Ellie. Ekar ļap aerro kōnnaan m̧okta jān an katak eo ijjino. Ellie ekar jouj im kōm̧m̧an menin an ruwainene.

Ilo katak eo, rūkaki eo ekar kajjitōk eļan̄n̄e ekar wōr an jabdewōt im̧we jān Jetōb Kwojarjar.

Jewel ekar kajutak pein. “Ikar en̄jake an Jetōb Kwojarjar jipan̄ eō ke ikar mijak n̄an itok n̄an Doulul eo an Jiron̄ ro,” ekar ba. “Jetōb Kwojarjar ej jipan̄ eō n̄e ij eddōkļo̧k n̄an ioon apan̄ ko.”

Jewel ekar ļōmņake an kar Jetōb Kwojarjar kaeņōm̧m̧an e ilo an en̄jake an ajimakeke. Ekar em̧m̧an an en̄jake ke ekar kwaļo̧k men in ekar ioone ippān leddik ro ilo Doulul eo an Jiron̄ ro.

Ālkin an kwaļo̧ke, leddik ro jet rekar bar kwaļo̧k. Ekar em̧m̧an ippān Jewel ta eo rekar ba.

Jewel ej oon̄ kake Būraimare jet iien. Ak kōn Jetōb Kwojarjar, ekar pojak n̄an eddōkļo̧k.

Kōpeļļo̧k PDF

Kōmeļeļe ko jān Liz Brizzi