Aenōm̧m̧an ilo Jar

“Lon̄ļok, Jema!” Mary eaar lam̧ōj.

Jemān ej ettōn̄ im lukkun bwiļli lijjidwaḷọk eo. lijjidwaḷọk eo em̧ōj likwoje n̄an juon wōjke ekilep im ej babuļok ioon Reba Mississippi. Em̧m̧an ippān Mary n̄e ej ekōtoto mejān im an kūrkūr lojeen n̄e ej keļok ioon den ļok im bar itok.

“Tokālik N̄a!” Elizabeth eaar ba.

Mary eaar too jān lijjidwaḷọk eo bwe leddik eo jatin en baj pitoto.

Baam̧le eo an Mary rar jokwe ilo Nauvoo. Pāāren ro an rekar kobatok ilo Kabun̄ in jejjo iiō rem̧ootļok, im rekar wia kake aolep men ko mweier n̄an em̧m̧akūttok ippān rekwojarjar rein jet.

Nauvoo eaar juon jikin eo epoub. Armej kāāl rej itok aolep raan. Kar kalōk juon jikin kweilo̧k eaar ļap jerbal e, im jon̄an ajri ro reddik rekar jipan̄. Jipan̄ Mary ekōm̧m̧an bwe en en̄jake an rūttoļo̧k im aorōk. Jet iien lieo ej jipan̄ ilo an bōkļok kōrālep eo n̄an jemen ilo iien an jerbal ilo tampeļ eo ekāāl.

Ilo Jabōt, Mary ej kōņak nuknuk in jar eo an em̧m̧antata im jipan̄ ro jein im jatin pojak n̄an jar. Aolep rekar ain doon iumwin wōjke ko im ron̄jake an Rikanaan Josep Smith katakin kōn Jisōs Kraist. Ekar em̧m̧an ippān Mary n̄an ekkatak wāween aer maron̄ bar mour ippān Jemedwōj Ilan̄ juon iien joun raan. Rikanaan eo eaar lo im rōn̄ elōn̄ men ko rem̧m̧an.

Akō jet armej rekar jab em̧m̧an ippāer Rikanaan eo. Mary ekar ron̄ kōn elōn̄ bwebwenato ko kōn an armej kōņaan kakure.

Juon jotenin jem̧ar, Mary ekar jipan̄ jinen karreo ālikin kōjota. Innem Jemān ear rooltok n̄an m̧weeo. Ekar dānin kōmjaļaaļ turin mejān.

“Ta eo kar waļo̧k?” M̧am̧a eaar kajjitōk.

“Rikanaan eo Josep em̧ōj m̧ane,” Jemān ear ba.

M̧am̧a ear jino an jan̄. Ewi kōjkan an nej Kabun̄ in wōnm̧aanļok ke ejako?” eaar kajjitōk.

Mary ekar lukkuun en̄jake būrom̧ōj im mijak. Lieo ekar jeļā ke rikanaan eo ekar kāālet jān Anij. Etke Jemedwōj Ilān̄ ekar tin kōm̧m̧an bwe en waļo̧k eindein?

Lieo ekar jino jan̄ im ettōr nabōjļok n̄an jikin kallib eo m̧weeo. Ālikin an wōtlok ioon bukwien ilo turin jet mar, Mary ekar jino an jar. “O, Jema Ilan̄, ta eo kōm nej kōm̧m̧ane? Rikanaan eo amim em̧ōj m̧ane.” Denin kōmjaalal rar toor laļļo̧k itūrin mejān.

Innem ekar itok juon ainikien emera n̄an ļōm̧nak eo an Mary. Inaaj kajutak bar juon rikanaan n̄an tōl armej ro aō.

Juon en̄jake eaeņōm̧m̧an, lan̄lōn̄ ekar kobrak būruwōn. Ekar kemeraik tūrin mejān im ettōrļok n̄an m̧weeo jon̄an wōt an maron̄.

“Jinō! Jema?“ Mary ekar ba. “Ikar ba juon jar, im Jemedwōj Ilan̄ ekar uwaake n̄a.” Lieo ekar ba n̄an er kōn ainikien eo aenōm̧m̧an eo ekar en̄jake.

Ke Jinen im Jemān rekar jiburlep e, Mary eaar jeļā ke aolep men renej em̧m̧an. Lieo ekar nana wōt an mour, akō ekar jeļā ke enej wōr iien ko reppen im̧aan. Ak Jemedwōj Ilan̄ enej wōnm̧aanļok wōt im tōl er im jipan̄ er.

Kōmeļeļe ko jān Kristin Sorra