Ang Pakighinabi uban ni Azahara bahin sa Templo

Sultihi kami bahin sa imong kaugalingon.

Ako adunay magulang nga igsoong lalaki ug usa ka magulang nga babaye. Ang akong hilig mao ang rhythmic gymnastics ug pagtugtog sa piano, ug ang akong paborito nga kolor tapol.

Ang templo nahimong usa ka dakong panalangin ngari kanako, bisan dili pa igo ang akong pangidaron aron makasulod. Pinaagi lang sa pagtan-aw niini gikan sa gawas, ako makabati sa gugma sa Langitnong Amahan.

Ang templo importante usab sa akong pamilya. Ang akong mga ginikanan nag-ingon nga kon sila anaa sa templo, mabati nila nga sila nakaabot na sa panimalay. Moingon sila nga kini usa ka dapit diin sila makabati nga duol sa mga sakop sa pamilya kinsa nangamatay na. Kini usab ang dapit diin kita makatabang sa pagpundok sa Israel.

Giunsa man nimo sa pagpangandam sa pag-adto sa templo?

Ako nangandam pinaagi sa pagpaningkamot sa pagsunod sa ehemplo ni Jesukristo. Nagbasa ko sa mga kasulatan, nag-ampo, ug misimba. Ako dili 100 ka porsyento nga hingpit, apan tungod sa tabang sa Langitnong Amahan, ako mahimong takos.

Ang pag-adto sa templo sa unang higayon mao ang usa sa labing nindot nga butang nga akong nabuhat sa akong kinabuhi. Akong gibati ang gugma sa Langitnong Amahan sa tibuok higayon. Miadto ko uban sa akong pamilya ug pipila sa mga kabatan-onan sa akong ward. Ang akong papa mibunyag nako alang sa akong mga katigulangan. Ganahan ko nga masayod nga ako nagtabang kanila sa mga butang nga sila dili makahimo para sa ilang kaugalingon.

Unsa nga tambag ang imong ihatag ngadto sa ubang mga bata nga nangandam alang sa templo?

Usa ka tambag nga akong ihatag mao ang pagbasa sa mga kasulatan. Kon kita magkat-on mahitungod ni Jesukristo ug mahimong mas maayong mga disipulo, kita mas makatagamtang sa kalipay sa pagsulod sa templo.

Kon kamo mohimo sa mga bunyag diha sa templo sa unang higayon, tagamtama ang matag segundo niini! Isulat ang inyong kasinatian diha sa journal aron dili nimo kini makalimtan.