“Ang Lima ka Bato ni David,” Higala, Oktubre 2025, 20–21.

Ang Lima ka Bato ni David

Ni Sister Andrea Muñoz Spannaus

Ikaduhang Magtatambag sa Kinatibuk-ang Kapangulohan sa Young Women

Gikuha gikan sa “Matinud-anon hangtod sa Kataposan,” Liahona, Mayo 2024, 59–61.

Sa Daang Tugon, si David miboluntaryo sa pagpakig-away sa usa ka higante nga ginganlan og Goliat (tan-awa sa 1 Samuel 17). Si David wala mahadlok kay nasayod siya nga ang Dios mopanalipod kaniya ug motabang kaniya.

Si David mipundok og lima ka hamis nga mga bato, gikuha iyang lambuyog, ug miadto aron sa pag-atubang sa higante. Unsa kaha kon ang matag usa sa mga bato ni David nagrepresentar og kalig-on nga atong gikinahanglan aron magmadaogon sa mga sangka sa atong kinabuhi? Akong gihunahuna kini nga mga posibilidad:

Ang bato sa akong gugma alang sa Dios.
Ang bato sa akong hugot nga pagtuo sa atong Manluluwas, si Jesukristo.
Ang bato sa kahibalo sa akong tinuod nga pagkatawo.
Ang bato sa akong inadlaw-adlaw nga paghinulsol.
Ang bato sa akong pag-akses sa gahom sa Dios.

Ang gahom sa Diyos usa ka tinuod nga gahom nga motabang nato sa pag-atubang sa mga hagit ug sa paghimo og maayo nga mga desisyon. Unsay atong mahimo aron madugangan ang gahom sa Dios sa atong mga kinabuhi?

Ang Alang sa Kalig-on sa mga Kabatan-onan nga giya nagpasabot: “Ang mga pakigsaad mokonektar kaninyo ngadto sa Langitnong Amahan ug sa Manluluwas. Kini mopadako sa gahom sa Dios diha sa inyong kinabuhi.”

Uban ni Jesukristo, kamo makapukan sa matag Goliat nga motunga sa inyong kinabuhi.

Art nga Bato

Karon inyoha nang turno! Paghimo og usa ka pahinumdom nga bato aron sa pagtabang kaninyo sa pagbuntog sa inyong mga Goliat.

Pangita og hamis nga bato.
Isulat diha sa inyong bato ang pipila ka paagi nga ang Dios mopanalangin kaninyo.
Pagdrowing o pagpintal diha sa bato aron dekorasyonan kini.
Ibutang ang inyong bato sa dapit diin kini makapahinumdom kaninyo sa gugma ug gahom sa Dios diha sa inyong kinabuhi.