Kagubot Panahon sa Art

“Panahon na alang sa atong leksiyon sa art!” Miingon si Madam Nadirah. Iyang gidala ang usa ka dakong kahon ngadto sa atubangan sa klasrom. Ang kahon adunay mga botelya sa pintal ug mga brush sa pintal nga migimaw gikan niini.

Mipahiyom si Adam. Ganahan kaayo siya sa panahon sa art! Kanunay sila nga nagtrabaho diha sa mga grupo sa ilang mga proyekto. Tingali niining higayona makauban niya ang usa sa iyang mga higala.

Si Madam Nadirah mitudlo sa unang lamesa. “Ang unang grupo mao sila si Enzo, Ivan, Mei Ling, ug Adam.”

Si Adam mitindog ug mibalhin sa paglingkod didto sa lamesa. Wala siyay nailhan sa iyang grupo. Apan maayo siya sa pagpakighigala. Tingali sila mahimong bag-ong mga higala!

Sa higayon nga ang tanan nakakaplag sa ilang grupo, si Madam Nadirah nagsugod sa pagpasa sa mga suplay. “Ang inyong hagit mao ang paggamit niini nga mga butang aron sa paghimo og art,” miingon siya.

Gibutang niya ang tulo ka tasa sa matag lamesa. Si Adam mipaduol aron motan-aw sa sulod sa ilang mga tasa. Ang usa ka tasa adunay mga nutshell niini, ang lain adunay kahoy nga mga stick, ug ang kataposan adunay dekolor nga mga bead.

Si Adam nagmug-ot. Wala siya masayod kon unsa ang buhaton niining mga butanga.

“Kamo adunay panahon lamang sa paghimo og usa ka proyekto,” miingon si Madam Nadirah. “Mao nga pagtinabangay aron makadesisyon kon unsay inyong buhaton.”

Kusog nga panag-istoryahanay ang mipuno sa lawak samtang ang mga grupo nagsugod sa pagplano sa ilang mga proyekto.

“Unsa man ang atong buhaton?” Gipangutana ni Adam ang iyang grupo.

Gitudlo ni Mei Ling ang mga stick. “Segurado nga usa ka kahoy. Ang mga stick mahimong ang punoan ug mga sanga, ug ang mga nutshell mahimong ang mga dahon.”

“Unsay atong gamitan sa mga bead?” Si Enzo nangutana.

“Ang pipila sa mga bead lunhaw,” miingon si Adam. “Tingali magamit nato kini alang sa mga dahon.”

Milingo-lingo si Ivan. “Dili, kinahanglan kitang maghimo og balay. Ang mga nutshell para sa atop. Ang mga stick para sa mga bungbong, ug ang mga bead alang sa mga bentana.” Gikuha niya ang pipila ka shell ug mga stick aron ipakita ngadto nila.

Gikuha ni Mei Ling ang kataposan nga tasa sa wala pa makuha ni Ivan ang mga bead. “Apan gusto kong maghimo og usa ka kahoy!”

“Pero, gusto kong maghimo og balay!” Gisulayan ni Ivan nga kuhaon og balik ang tasa gikan kang Mei Ling.

Mitan-aw si Adam sa iyang bag-ong mga higala. Dili siya gusto nga mag-away sila. Apan gitugotan lamang sila sa paghimo og usa ka proyekto. Dili sila makahimo og usa ka kahoy ug usa ka balay.

Dayon adunay ideya si Adam. Tingali adunay paagi nga mahimo nila kining duha. “Unsa kaha kon maghimo kita og balay diha sa kahoy?”

Si Mei Ling ug Ivan mihunong sa paglalis bahin sa tasa sa mga beads ug mitan-aw kang Adam.

“Sama sa usa ka treehouse?” Nangutana si Mei Ling.

“Oo!”

Si Mei Ling mibutang og balik sa tasa diha sa lamesa. “OK.”

Mitando si Ivan. “Buhaton nato kini!”

Si Adam mikuha og papel ug papilit gikan sa kahon sa art. Gipili ni Enzo ang mga kolor sa pintal. Dayon gisugdan nila ang paghimo sa ilang treehouse. Sa sinugdanan, si Mei Ling ug si Ivan nagtrabaho lamang sa mga bahin nga gusto nila. Apan sa wala madugay silang tanan nagtinabangay ug nagkinataw-anay sa dihang nagkapintal ang ilang mga tudlo.

Sa hinay-hinay ang ilang mga stick, mga shell, ug mga bead nahimong usa ka taas, mabulokon nga treehouse. Gidugang ni Adam ang usa ka nutshell sa atop.

“Wala ko kahibalo nga makalingaw kaayo ang paghimo og treehouse,” miingon si Ivan. Gipapilit niya ang lain nga bead ngadto sa kahoy.

“Oo, maayo kaayo kini nga ideya!” Miingon si Mei Ling.

Mipahiyom si Adam. Makalingaw kadto nga nagtinabangay. Naglaom siya nga makatrabaho niya pag-usab ang iyang bag-ong mga higala alang sa sunod nga leksiyon sa art!

Ablihan ang PDF

Mga paghulagway pinaagi ni Corey Egbert