“Usa ka Malinawon nga Dapit,” Higala, Oktubre 2025, 36–37.
Usa ka Malinawon nga Dapit
Naugtas gayod og maayo si Kevin! Murag dili kini maayo nga adlaw ang pag-adto sa templo.
Usa ka tinuod nga istorya gikan sa USA.
Gilamano ni Kevin ang kamot sa bishop ug migawas sa opisina. Gitan-aw niya ang gamayng kard nga iyang gikuptan. Kini mao gayod ang iyang kaugalingon nga rekomend sa templo!
Si Papa naghulat niya diha sa pasilyo. “Kanus-a kita makaadto sa templo?” Nangutana si Kevin kaniya.
Mingisi si Papa. “Mahimo kitang magtakda og appointment inig abot dayon nato sa balay.”
Si Kevin ug si Papa mitakda og usa ka appointment sa pagbuhat og mga bunyag alang sa mga patay. Apan sa dihang miabot ang adlaw sa appointment, si Kevin nasakit, mao nga sila mieskedyul og usab. Ug dayon sila kinahanglan nga mag-eskedyul og usab tungod kay si Papa adunay usa ka dinalian nga biyahe sa trabaho.
Si Kevin misugod sa paghunahuna kon siya makaadto ba gayod sa templo.
Sa dihang ang adlaw sa ikatulo nga appointment miabot, si Kevin andam na! Siya ug si Papa nagplano sa pagbiya padulong ngadto sa templo human dayon sa panihapon.
Mipahiyom si Kevin samtang nangandam siya alang sa eskwelahan. Apan ang iyang maayong pagbati nawala sa dihang gipahibalo sa iyang magtutudlo sa matematika ang usa ka sorpresa nga pasulit. Dili maayo ang resulta sa pasulit. Ni ang nahabilin sa adlaw sa pag-eskwela. Ug sa dihang gikuha na siya ni Mama, naglabad ang iyang ulo.
“Hinumdomi nga ikaw ang modumala og kadiyot sa balay samtang naa koy dinalian nga lakaw?” Nangutana si Mama.
Si Kevin mikulismaot. Wala siya makahinumdom.
Dihang mibiya dayon si Mama, ang mga igsoong lalaki ni Kevin nagsugod sa panaglalis. Sa dihang si Kevin misulay sa pagtabang kanila sa pagsulbad sa problema, sila nasuko kaniya. Adunay mas grabe pa kaha niining adlawa?
Oo! Dihadiha dayon, ang iyang manghod nga babaye nakayabo og gatas sa tibuok salog sa kosina. Sa dihang gi-mop niya kini, paspas kaayong nagpitik ang kasingkasing ni Kevin, ug nangusog ang iyang kaunoran.
Mibalik si Mama samtang gibalik niya [Kevin] ang mop. “Nakayabo na usab ang imong igsoong babaye?”
Si Kevin mitando ug nanghupaw sa iyang mga abaga, naningkamot nga makarelaks. “Dili maayo kini nga adlaw.”
“Unsay nahitabo?” Nangutana si Mama.
“Makaugtas lang gayod kaayo. Murag dili maayo nga adlaw nga moadto sa templo.”
“Mahimo kitang mopili og lahi nga adlaw,” miingon si Mama.
Ang hunahuna sa pag-eskedyul og usab nakapahimo ni Kevin nga mobati nga mas grabe pa. “Dili,” miingon siya. “Gusto ko nga moadto. Dili lang kaayo malinawon ang akong pagbati.”
“Ang Langitnong Amahan moabiabi kanimo sa Iyang balay bisan kon mobati ka nga malinawon o dili,” miingon si Mama. “Ug si Jesukristo mao ang Prinsipe sa Kalinaw. Daghang higayon nga makakaplag ka og kalinaw diha sa templo bisan kon ikaw adunay makaugtas nga adlaw.”
Nanghupaw si Kevin. “Sulayan nako kini.”
Atol sa panihapon ug sa pagdrayb paingon sa templo, kanunay niyang gihunahuna ang tanang dili maayong mga butang nga nahitabo nianang adlawa. Mibati gihapon siya nga tensiyonado sa dihang siya ug si Papa miabot sa templo. Apan diha dayon sa pagsulod ni Kevin sa mga pultahan, nakarelaks siya og gamay.
Ang templo limpyo ug hilom sa sulod. Ang tanan nagsul-ob og puti ug hinay nga nag-istorya. Samtang nag-ilis siya og sa usa ka puti nga jumpsuit diha sa lawak ilisanan, namatikdan ni Kevin nga nagkahinay ang iyang paglihok ug nagkahinay usab nga nagsulti. Sa dihang iya nang turno sa pagbuhat sa mga bunyag, mas mibati siya nga arang-arang.
Gibunyagan ni Papa si Kevin alang sa upat ka tawo nga namatay na. Ang kalinaw ug kalipay nagsugod sa pagtubo sa kahiladman ni Kevin. Kini dili lamang tungod kay siya anaa sa ingon ka malinawon nga dapit, apan usab tungod kay siya mitabang sa mga tawo sa paghimo og mga pakigsaad uban sa Dios.
Sa biyahe padulong pauli, si Kevin nakaamgo nga wala na siya maugtas. Ug nagpahiyom na usab siya! Aduna lang siyay usa ka pangutana alang kang Papa.
“Kanus-a ko makabalik sa templo?”
Mikatawa si Papa. “Sa dili madugay.”
Mga paghulagway pinaagi ni Alyssa Tallent