Bildimap Nauvu

Lod i talem long ol Sent blong oli kam tugeta long wan niu ples. Hemia i kolosap long wan bigfala reva, ples ia graon i wetwet mo i gat fulap sofmad. I no luk olsem se i wan gudfala ples blong bildim wan siti long hem. Be Profet Josef Smit i save se wetem help blong Lod, oli save mekem i kam naes.

Ol Sent oli wokhad blong mekem i kam wan gudfala ples blong stap long hem. Josef i singaotem taon ia Nauvu, we i minim “wan naesfala ples.”

Lod i wantem ol Sent blong Hem blong oli bildim wan tempol long Nauvu. Ol pipol oli stat blong wok hariap.

Lod i gat ol bigfala blesing blong givim long ol pipol blong Hem. Insaed long tempol, bae oli mekem ol tabu kavenan, o spesel promes, wetem Lod. Bae oli lanem tu abaot plan blong hapines blong Papa long Heven blong evri pikinini blong Hem.

Ol sent oli wok had blong bildim tempol. I tekem longfala taem, be oli glad blong lanem abaot ol spesel promes we Lod i gat blong olgeta insaed long tempol blong Hem.