“5 Samting blong Tingbaot abaot Bodi Sefti,” Fren, Septemba 2025, 38–39.

5 Samting blong Tingbaot abaot Bodi Sefti

Bodi blong yu i wan presen we i kam long Papa long Heven. Hem i wantem helpem yu blong yu stap sef mo hapi. Sapos wan man i traem blong mekem nogud long yu wetem ol toktok o ol aksen, !hemia i no ORAET! Yu mas kaen mo gat respek long ol narawan, mo yumi mas ekspektem olgeta blong oli kaen mo gat respek long yumi tu.

Hem i ORAET blong talem no, iven long wan adalt. Yu yu bos long bodi blong yu. Hemia i minim se yu save disaed sapos wan man i save tajem yu, haggem yu, o kisim yu Yu save praktis blong talem “No,” “No tajem mi,’ mo “Lego mi.” Sapos oli tajem yu o askem blong mekem wan samting we yu filim se i no stret, hem i ORAET blong talem no mo yu aot sapos yu save mekem.
Save wea ples nao i oli save tajem o wea ples oli no save tajem. Wan taj we hem i sef hem i mekem yu filim se oli lavem yu (olsem wan hag o wan hae faef) o stap klin mo stap helti (olsem wan paren i stap helpem yu blong swim o wan dokta i helpem yu taem yu sik). Samtaem wan sef taj i save soa, olsem oli stikim yu long meresin, be hem i sef from bae hem i kipim yu helti. Wan taj we i no sef i mekem bodi o filing blong yu i soa, olsem oli kilim yu, pusum yu o tajem praevet pat blong wan man. Ol taj ia oli soa mo yumi no filim se i no stret hemia i no ORAET.
I gat sam pat long bodi blong yu we i praevet we wan narafala man i no mas tajem yu. Ol praevet pat ia i tekem tu ol pat blong bodi blong yu we oli kavremap wetem wan klos blong swim. Hem i no ORAET blong ol narafala man i tajem praevet pat blong yu ( i no mata andanit o antap long ol klos blong yu) o askem yu blong tajem blong olgeta. Sapos hemia i hapen long yu, toktok long wan adalt we yu trastem hariap.
Tingbaot ol sikret mo ol sapraes i defren. Wan sapraes hem i wan samting we i gud blong evriwan, olsem wan betdei presen. Wan sikret i wan samting we wan man i talem blong yu no talem long eniwan. Sapos yu askem wan blong kipim wan sikret abaot wan i stap tajem o mekem nogud long yu, yu mas talem long wan we yu trastem stret long taem ia. Gohed blong talem ol adalt we yu trastem kasem taem wan i helpem yu stap sef.
Sapos wan man i tajem yu o mekem yu harem nogud, hem i no rong blong yu. Wan man we i mekem yu i harem nogud bae i traem blong mekem yu o ol narawan i biliv se yu yu mekem wan samting i no stret, be yu no mekem. Papa long Heven mo Jisas Kraes, Tufala i save mo lavem yu i fulwan. Askem wan adalt we yu trastem, mo tingbaot se oltaem yu save prea long Papa long Heven from help tu.