“Konfrens Kwestin blong Lou,” Fren, Septemba 2025, 4–5.
Konfrens Kwestin blong Lou
“?Bae mi go long pati blong Alice o no?” Lou i raetem raetem.
Wan tru stori we i kam long Beljiom
Lou i glad taem we hem i openem wan blu envlop. Bes fren blong hem Alice bae gat wan betdei pati, mo oli invaetem hem.
Be taem Lou i ridim invitesen, hat blong hem soa. No, wan narafala pati long Sandei, hem i tingting.
Famli blong Lou oli no stap go long ol pati long Sandei. Be, oli spenem taem tugeta, oli go long jos, mo mekem ol narafala samting blong tingbaot Sevya.
Be pati ia i had blong talem no long hem. ?Olsem wanem nao bae hem i save mestem pati blong bes fren blong hem?
“?Mi save go long taem ia nomo?” Lou i askem papa mo mama blong hem long naet ia. “Mi save se ol Sandei oli impoten. Be mi no wantem blong mestem.”
Papa i talem, “hem i wan had joes”. “Papa long Heven i askem yumi blong mekem Sandei i wan tabu dei. Be hem i stap long yu blong yu disaed olsem wanem nao bae yu mekem hemia.”
Mama i haggem Lou. !Jeneral konfrens hem i long wiken ia! Maet hemia nao kwestin we bae yu askem.”
Famli blong Lou oli gat wan tradisen blong raetem daon wan kwestin bifo oli wajem konfrens. Afta long taem blong konfrens, oli lisin long ol ansa.
Lou i pulum win blong hem. “Okei.”
Taem blong silip, Lou i raetemdaon kwestin blong hem. Afta, hem i prea. “Papa long Heven, mi wantem tumas blong go long pati ia, mo mi no save wanem blong mekem. “?Plis yu save helpem mi fanem ol ansa taem mi wajem jeneral konfrens?”
Sam dei afta, Lou mo ol brata blong hem oli sidaon long amjea. !Hem i taem blong konfrens! Lou i karemaot notbuk blong hem long taem blong fas hym. Fas spika i toktok.
Lou i lukluk i go antap. !Spika ia i tokbaot Sabat dei! Hem i se God bae i blesem olgeta we oli kipim ol komanmen blong Hem, iven sapos ol blesing oli no kam long semmak taem.
Lou i talem, “mi ting se Papa long Heven i ansarem kwestin blong mi.” “I hariap nomo.”
Long nekis dei, long skul, Lou i faenem Alice long brek taem. Lou i talem, “Tangkyu blong invaetem mi long pati blong yu.” Hem i pulum gud win blong hem. “Ol Sandei oli ol spesel dei blong mi mo famli blong mi.” Mekem se bae mi no save kam.”
“OK,” Alice i talem. “Mi harem nogud se bae yu mestem.”
“Mi tu,” Lou i talem. “Be long Satedei, ?yu wantem go pleplei wetem mi long trapolin pak? Olsem yumitu save pleplei tugeta mo selebretem betdei blong yu.”
“!Mi wantem! ” Alice i smael.
Lou i smael i gobak. Blong no go long betdei pati i wan had joes blong mekem. Be hem i save se hem i raet samting blong mekem. Mo hem i talem tangkyu long Papa long Heven blong ansa long impoten kwestin blong hem.
Ol pikja droing i kam long Flavio Remontti