Faamuamua o le Malumalu

“Ua iinei faifeautalai!” O le vala’au mai lea a Graham W. Sa talotalo atu o ia i faifeautalai a o la savavali atu i lo latou fale.

O Tinā, Tamā, ma le uso matua o Graham, o Nunu, na papatisoina i le tausaga ua te’a. O Graham ma lona uso laitiiti o Iopu, e le’i papatisoina ona e laiti tele. Ae sa la fiafia lava e a’oa’o mai faifeautalai.

“O le asō ma te mananao e talanoa e uiga i le malumalu,” o le saunoaga lea a Elder Hale. “O se fale faapitoa lea e mafai ona e faia ai ni folafolaga ma le Atua ma faamauina ai i lou aiga. O le uiga o lena mea, e mafai ona outou faatasia e faavavau!”

“O le malumalu sili ona lata mai o Niu Sila.” Sa u’u i luga e Elder Singh se ata o se fale pa’epa’e matagofie. “E mamao le malaga. Ae o faamanuiaga o le a matuā aoga ma fetaui lelei lava.”

“Matou te mananao e o,” o le tala lea a Tinā.

Sa fuafuaina e matua o Graham le latou malaga i le malumalu ma se isi aiga mai le aulotu. O i latou o aiga muamua e lua mai Vanuatu e o atu i totonu o le malumalu!

I ni nai masina mulimuli ane, na o’o mai ai le aso e tu’uva’a atu ai mo la latou malaga. O le taimi muamua lea a Graham i luga o se vaalele, ma sa malie. Sa ia tilotilo atu i ao ma le sami i lalo ifo o i latou. Sa ia vaai faalemafaufau i le fale pa’epa’e maualuga. Sa le manofonofo o ia i le fia vaai atu i ai!

Ina ua latou taunuu, sa latou o i luga o se pasi. O se tietiega salutulutu, ma sa lelava Graham. Ae na toetoe lava o latou o’u atu iina.

“Vaai!” Sa faasino atu Graham i fafo o le faamalama. A lale! Sa sili atu foi ona matagofie nai lo ata.

I totonu o le malumalu, sa leai se pisa ma sa filemu. Sa latou oofu uma i ofu papa’e. Mo sina taimi, sa saofafa’i ai Graham ma ona uso i le potu faatalitali ma matamata i ata o Iesu Keriso.

Ona ia taitai atu lea o i latou e se tagata faigaluea a le malumalu i le potu o faamauga. Sa tootutuli matua o Graham i tafatafa o se fata faitaulaga sa ufiufi i ie vaivai. Sa foliga fiafia i latou!

Sa tootutuli Graham ma ona uso i autafa o Tinā ma Tamā. Sa latou tilotilo atu i fa’ata tetele ma uumi i luga o puipui. O o latou ata i le fa’ata sa alu pea lava pea.

“O fa’ata e faamanatu atu ai ia te outou e mafai ona outou faatasi e faavavau,” o le tala lea a le tagata faigaluega o le malumalu.

Na lagona e Graham le fiafia ma le saogalemu. Sa ia lagonaina e pei o loo tuu atu e le Faaola se opo lapoa lava ia te ia.

E le’i umi ae oo i le taimi e o ai i le fale. I luga o le pasi ma luga o le vaalele, sa mafaufau pea Graham i le lagona faapitoa na ia maua i le malumalu.

I ni nai aso mulimuli ane, na oo mai ai se matagi tele. O laau pama na foliga mai o le a gaui i le afa!

Sa fefe Graham. “O le a le afaina lava i tatou?”

“Ioe,” o le tala lea a Tamā. “Ae o nei matagi e malolosi. Sa fai mai faifeautalai e faapotopoto i le falesa seia uma le afa.”

Sa fesoasoani Graham ia Tinā e ave ni meaai ma palanikeke i le falesa. Sa agi malosi le matagi!

I totonu, na lagona e Graham sina lagona sili atu ona lelei. Sa i ai uma iina a latou uo mai le lotu. Ae sa ia faalogoina pea le agi malosi mai o le matagi.

“Ae faapefea lo tatou fale?” Na fesili atu ai Graham.

“E tatau ona tatou fa’atali se’ia mae’a le afa ona iloa lea.” Sa opo mai o ia e Tinā. “O le mea e sili ona tāua o le saogalemu o lo tatou aiga. E te manatua ou lagona i le malumalu?”

Na luelue atu le ulu o Graham. “Sa ou lagona le mafanafana ma le saogalemu.”

Sa ataata Tamā. “Ma ona o Iesu Keriso ma lo tatou faamauga i le malumalu, ua mafai ai ona tatou faatasi e faavavau.”

Sa mafaufau Graham i le lagona mafanafana ma le toafilemu sa ia lagonaina i totonu o le malumalu. Na sa’o lava Tamā. Ona o Iesu Keriso ma feagaiga o le malumalu, ua mafai ai ona avea i latou ma se aiga e faavavau. Ma talu ai na ia iloa lena mea, o le a lelei mea uma.

Tatala le PDF

Ata na tusia e Eduardo Marticorena