“Ofutino Papatiso o Harvey,” Uo, Setema 2025, 36–37.

Ofutino Papatisoo Harvey

Saunia e Noelle Lambert Barrus

Sa le’i mafai e Harvey ona maua lona ofutino pa’epa’e i soo se mea!

O se tala moni mai Initonesia.

O le tamaitiiti ma ona matua o lo’o nonofo i le pito i tua o le ta’avale laititi

Sa nofo Harvey i tua o le ta’avale laititi ma Ibu (Tina) ma Bapak (Tama). Sa latou o atu i le lotu mo le papatisoga o Harvey.

“Bapak, sa faape’i ou lagona i le taimi na papatisoina ai oe?” Na fesili atu ai Harvey. Na papatisoina Bapak i ni nai masina talu ai. O lenei ua valu tausaga o Harvey, o le a papatisoina foi o ia!

Sa mafaufau Bapak mo se minute. “Sa matuā malulu lava le vai!” na ia fai mai ai ma ata. “Ae sa ou lagonaina foi le tele o le alofa. E ui lava o le toatele o lo matou aiga e le o ni tagata o la tatou ekalesia, ae sa ou lagonaina lo latou alofa ma le alofa o le Atua.”

Ina ua latou taunuu atu i le falesa, sa fesoasoani nisi o tagata mai le lotu ia i latou e faatumu le faatanoa i le vai ma sauniuni.

O le tamaitiiti faanoanoa o loo tilotilo atu i totonu o se ato gaogao; o le tamaitiiti o loo ofuina se ofutino pa’epa’e e lapo’a tele

“Harvey, ua oo i le taimi e sui ai i ou ofu papatiso,” o le tala lea a Ibu. Na lue le ulu o Harvey ma maua le ato o i ai ona lavalava. Ae na o lona ofuvae pa’epa’e sa i totonu o le ato. Sa le mafai ona ia mauaina lona ofutino pa’epa’e! Sa ia siakiina isi ato ma tilotilo solo i le falesa.

“Ibu, e le o i ai lo’u ofutino iinei,” o le tala lea a Harvey.

Na faanonou atu le pupula a Ibu. Sa ia siakiina foi ni nai ato. “Atonu sa tatou tuua ai lava i totonu o le taxi.”

“E i ai nisi a matou ofu mo papatisoga i totonu o le kapoti’” o le tala lea a Sister Putri. “O le a ou alu atu e aumai.”

Ae na pau lava ofu o le papatisoga mai le kapoti sa lapopoa tele mo Harvey. Sa foliga popole Ibu. E le o toe mamao ona amata lea o le papatisoga. E toatele tagata ua i ai iinei, ma e le’i i ai se ofutino o Harvey.

“Atonu e mafai ona tatou faia se tatalo ina ia toe aumai e le avetaavale le ofutino,” o le tala lea a Harvey. “Ae afai na te le aumaia, e mafai lava ona ou ofuina se ofutino lapo’a tele. Ou te le o toe popole po o le a le ofu ou te ofuina. Ua matuai ou fia papatiso lava.”

Na luelue le ulu o Ibu ma Bapak. Sa latou o atu faatasi i le umukuka, o se nofoaga sa filemu. Sa o latou pi’ilima ma punonou o latou ulu.

Sa faia e Harvey le tatalo. “Le Tama Faalelagi pele, faafetai atu ia te Oe o le a mafai ona ou papatiso i le asō. Faamolemole fesoasoani i le aveta’avale e toe aumai lo’u ofutino. Ae afai e leai, e le afaina foi lea.”

Ina ua uma le la tatalo, sa alu atu Harvey e sui i le ofutino sa lapoa tele. Na oo atu i ona tulivae.

“Harvey!” Sa valaau mai Sister Putri mai le auala savali o le potu. “Ua iinei le avetaavale.”

O se tamaloa o lo’o uuina se ofutino pa’epa’e la’ititi i luga o se lave tautau lavalava.

Na maua e Harvey ma Ibu le avetaavale taxi i tafatafa o le faitotoa i luma. Sa ia uuina le ofutino o Harvey!

“Sa ou tilotilo atu i tua ma vaaia ai i luga o le nofoa,” o lana tala lea. “Sa ou manatu atonu o oe e onaina.”

“Faafetai tele lava,” o le tala lea a Ibu.

Na u’u mai e Harvey le ofutino mai le tamaloa. “Faafetai lava.”

Sa ataata le tamaloa ma talotalo faatofa.

E le’i umi, ae oo mai le taimi e amataina ai le papatisoga. Na sui Harvey i lona ofutino. Sa fetaui lelei! Ma sa pa’epa’e ma mamā.

Ina ua savali atu Harvey i totonu o le faatanoa, sa malulu le vai! Na faia e Bapak le tatalo ma papatisoina Harvey. Ina ua ia sau i fafo mai le vai, sa ia lagonaina se lagona fou ma le to’afilemu i totonu.

Na taitai atu e Bapak Harvey i fafo o le faatanoa ma ‘aui atu se solo vaivai i tauau o Harvey. Sa mafaufau Harvey i tagata uma na fesoasoani ma lagolagoina o ia. Ibu, Bapak, le avetaavale, ma lona aiga. Ma le Tama Faalelagi ma Iesu Keriso foi.

Na fusi e Harvey ia Bapak. “E sa’o oe. Sa matua maatiati le malulu o le vai!” Sa la talie uma. Ona tilotilo atu lea o Harvey i mata o Bapak. “Ae sa sa’o foi oe e uiga i se isi mea. Ua ou lagona le tele o le alofa.”