“O le Fesili a Lou o le Konafesi,” Uo, Setema 2025, 4–5.

O le Fesili a Lou o le Konafesi

Saunia e Lucy Stevenson Ewell

“E tatau ona ou alu i le pāti a Alice?” Na tusia e Lou.

O se tala moni mai Belgium.

O se teineititi o lo’o mata faasiasia, o loo tilotilo atu i se vala’aulia o se pāti

Na lagona e Lou le fiafia a o ia saeia le teutusi lanumoana. O lana uo mamae o Alice sa faia se pāti o lona aso fanau, ma sa valaaulia ai o ia!

Ae ina ua faitau e Lou le valaaulia, sa goto ifo lona loto. O se isi foi pāti i le Aso Sa, sa ia mafaufau ai.

E le o le aiga o Lou i pāti i Aso Sa. Nai lo lena, sa latou faaaluina se taimi faatasi, o i le lotu, ma faia isi mea e manatua ai le Faaola.

Ae o lenei pāti sa sili atu ona faigata ona fai atu leai. E mafai faapefea ona ia misia le aso fanau o lana uo mamae?

“E le mafai lava ona ou alu i le taimi lenei e tasi?” Sa fesili atu ai Lou i ona matua i lena po. “Ou te iloa e tāua Aso Sa. Ae ou te le fia misia lenei pati.”

“O se filifiliga faigata,” o le tala lea a Tamā. “Ua poloaiina i tatou e le Tama Faalelagi ina ia avea le Aso Sa o se aso paia. Ae e pule lava oe e filifili pe faapefea ona e faia lena mea.”

Sa opo e Tinā Lou. “O le faaiuga o le vaiaso lenei le konafesi aoao. Atonu o le fesili lena e te fesili atu ai.”

Sa i ai i le aiga o Lou se tu masani e tusi ai i lalo se latou fesili sa i ai a o lei oo i le konafesi. Ona oo lea i le taimi o le konafesi, latou te faalogologo ai mo ni tali.

Na mapuea Lou. “Ua lelei.”

O le teineitiiti o loo tootuli i tafatafa o lona moega ma tatalo; o se api ma se penitala o loo i luga o lona moega

I le taimi moe, sa tusia ai e Lou lana fesili. Ona ia tatalo lea. “Le Tama Faalelagi e, ou te matuai manao lava ou te alu i lenei pāti, ma ou te le iloa le mea e fai. E mafai ona e fesoasoani mai ia te a’u e sue tali a o ou matamata i le konafesi aoao?”

Tamaiti o loo saofafa’i i luga o se nofoa ma tilotilo i se komepiuta feavea’i i luga o se laulau i o latou luma

I ni nai aso mulimuli ane, na nonofo faatasi ai Lou ma ona tuagane i luga o le nofoa. Ua oo i le taimi o le konafesi! Na tusitusi Lou i lana api i le taimi o le pese amata. Ona amata lea o le failauga muamua.

Sa ea a’e Lou i luga. Sa talanoa le failauga e uiga i le aso Sapati! Fai mai a ia, e faamanuia e le Atua i latou o e tausia Ana poloaiga, e tusa lava pe le vave oo mai le faamanuiaga.

“Ou te manatu ua uma ona taliina e le Tama Faalelagi la’u fesili,” o le tala lea a Lou. “Ta’i vave!”

O le aso na sosoo ai i le aoga, na maua ai e Lou ia Alice i le malologa. “Faafetai lava mo le vala’auliaina o a’u i lau pāti,” o le tala lea a Lou. Sa manava loloa o ia. “O Aso Sa o se aso faapitoa mo a’u ma lo’u aiga. O lea o le a le mafai ai ona ou sau.”

“Ua lelei,” na faiatu ai Alice. “Ou te faanoanoa o le a e misia le pāti.”

“Ma a’u foi,” o le tala lea a Lou. “Ae i le Aso Toonai, e te fia alu ma a’u i le paka o meataalo osooso (trampoline)? Ona mafai lea ona tatou taaalo faatasi ma faamanatu lou aso fanau.”

“Ou te fiafia tele la i ai!” Sa ataata Alice.

Sa toe ataata atu i a Lou. O le lē alu i le pāti o se filifiliga sa faigata ona fai. Ae sa ia iloaina o le mea sa’o lea. Ma sa ia loto faafetai ona sa taliina e le Tama Faalelagi lana fesili tāua.