O Se Talanoaga ma Gabby e uiga i le Auauna Atu i le Lotu

Ou te fiafia e kuka mea’ai suamalie ma taina le marimba. Ou te pese ma siva, ma o loo ou a’oa’o e ta le fagufagu, xylophone, ma le piano.

Sa fai mai le epikopo ia te a’u e fesoasoani e taitai musika i le sauniga faamanatuga. Ou te le’i faamoemoeina lena mea ma manatu o le a latou filifilia se tagata matua. Ae sa ou lagonaina foi le alofagia ma le fiafia auā ou te fiafia i musika.

O nisi taimi ou te fefe ai lava ina ne’i sese le auala ou te usuina ai ma o le a lagonaina mai e tagata. Ae e fesoasoani le Agaga Paia ia ou maua le mafanafana i luma o tagata uma. O lenei ua amata ona ou masani i ai, e matua malie lava!

I le taimi muamua sa o se tulaga taufaafefe. A o matou faataitai, o nisi taimi e galo ai ia te a’u nisi o upu. O lea sa ou faataitai ai le pese ma lo’u tinā i le fale, ma sa fesoasoani tele lena mea. Pe a matou faataitai i le Peraimeri, sa ou pese leotele atu e fesoasoani ia i latou o e le mafai ona faitau pe le iloa upu.

Sa ou lagona le fiafia ina ua oo mai le aso o le faatinoga. Sa matagofie mea uma. Sa ou lagonaina le filemu ma le toafilemu, ma na oo mai upu ia te a’u.

Na ou a’oa’oina o nisi taimi e lē lelei ai mea uma, ae e lē afaina ma e mafai ona e a’oa’o mai ai. O le taitaiina o musika i le Peraimeri na saunia ai foi a’u mo lo’u tofiga fou!

O nisi taimi atonu e faigata ona auauna atu i luma o le toatele o tagata, ae o le mea e uiga ia i tatou o tamaiti e mafai ona tatou taitai e tusa lava po o le a lo tatou matua po o le a foi le puupuu po o le umi tatou te i ai. Ou te ta’u atu ia i latou e ui lava o nisi taimi o lo tatou fefe e mafai ona faavaivaia ai i tatou, ae e mafai e le Agaga Paia ona fesoasoani ia i tatou ia lagona le toafilemu. O le a Ia fesoasoani pea ia i tatou e toe tutu i luga.