Ibukin te Tembora

“A roko ikai mitinare!” E wewete Graham. E anoia mitinare ngke a nakonako ni kaineta aia auti.

Tinana, Tamana, ao tarin Graham ae ikawai riki, Nunu, a tia ni bwabetitoaki n te ririki ae nako. Graham ao tarina ae uarereke, Job, a tuai raoi n roro n te bwabetito. Ma a teimatoa n tangiria n reirei ma mitinare.

“N te bong aei ti tangiria ni maroroakina taekan te tembora,” e taku Elder Hale. “Bon te kateitei ae onoti are ko kona ni karaoa iai te berita ma te Atua ao ni kabaeaki iai ma am utu. Are nanona bwa ti kona n ikotaki n aki toki!”

“Te kabanea ni kaan e mena i New Zealand.” Elder Singh e taua tamnein te kateitei ae mainaina ae tamaroa. “E rangi n raroa te mwananga. Ma te kakabwaia e na rang uaana.”

“Ti tangiria n nako,” e taku te Tina.

Ana karo Graham’ a bairea mwanangaia nakon te tembora ma te utu teuana man te ekaretia. A na riki bwa te moan utu aika uoua mai Vanuatu n nako n rin te tembora!

Tabeua te namwakina imwiina, e a roko te bong are a nako ni mwananga iai. Bon ana moan tai Graham n toka n te wanikiba, ao e rang kaunga. E tara te nang i tinaniku ao te marawa inano iaaia. E katamneia te kateitei ae mainaina ae rietatata n ana iango. E aki kona n tataninga ni kan nooria!

N te tai are a roko iaon te aba, a toka naba iaon te bwati. E kiritabukibuki te kawai, ao e a rang kua Graham. Ma a bon kan roko ikekei.

“Taraia!” E kotokoto Graham man te winto. Awarei! E bon rang tamaroa riki nakon te tamnei.

Inanon te tembora, e kainabwabu ao e rau. A bane ni bwai mainaina. N te tai ae uarereke, a tekateka n te ruu Graham ao tarina n tataninga ao a taraa tamnein Iesu Kristo.

Ngkanne te tia mwakuri n te tembora e kairiira nakon te ruu ni kabaebae. Ana karo Graham a katorobubua irarikin te bao ni karea ae rabunaki n te kunnikai ae maraurau. A rang taraa ni kukurei!

Graham ma tarina a katorobubua irarikin Tinaia ao Tamaia. A taraa te tirotaam ae bubura, n abwabwaki iaon te oo. Tamneia e reitinako n nako ma e a nako.

“Taian tirotaam a kauringnga bwa ko kona n ikotaki n akea tokina,” e taku te tia mwakuri n te tembora.

E namakina te kukurei Graham ao te kamanoaki. Kanga ai aron namakinan ae e rang bubura ana inga nakoim te Tia Kamaiu.

Imwiina e a roko aia tai n okira mweengaia. I aon te bwati ao i aon te wanikiba, e teimatoa n iango Graham n te namakin are e namakinna n te tembora.

Tabeua te bong imwiina, e kare te ang ae korakora ae bubura. A taraa ni kani maoto mai nukaia aroka bwaam!

E maaku Graham. “E na akea ara kangaanga?”

“Eng” e taku Tamana. “Ma e rang korakora te ang. A taku mitinare bwa a na ikotaki i nanon ana kateitei te ekaretia ni karokoa e toki te buaka.”

E buoka tinana Graham ni uoti amwarake tabeua ao burangketi nakon te umwantabu. E rang korakora karekaren te ang!

Inanona, e namakina riki ae tamaroa Graham. Ni kabane raraona man te ekaretia a mena ikekei. Ma e teimatoa ni kona n ongo karen te ang.

“E uara ara auti?” E titiraki Graham.

“Ti na tataninga tokin te buaka ao tia nooria.” E koona Tinana ao ni kaniia. “Ae kakaawaki riki bwa e mano ara utu. Uringa aron ara namakin n te tembora?”

E katoua atuuna Graham. “I namakina te aabue ao te kamanoaki.”

E wingare tamana. “Ao ibukin Iesu Kristo ao ara kabaebae n te tembora, ti a kona n ikotaki n akea tokina.”

E iangoa te aabue Graham, namakinan te rau are i nanon te tembora. E eti are e taku Tamau. Ibukin Iesu Kristo ao te berita ae tabu n te tembora, a kona n riki bwa te utu n akea tokina. Ao ibukina bwa e ata anne, bwaai ni kabane a bane n NAKORAOI.

Kauka te PDF

Tamnei ni kamatata iroun Eduardo Marticorena