“Kaekaan Ana Titiraki Lou n te Maungatabu,” Te Rao, Tebetembwa 2025, 4–5.
Kaekaan Ana Titiraki Lou n te Maungatabu
“E riai bwa N na nako ni kaea ana Bootaki Alice?” E koroboki Lou.
Te karaki ae koaua mai Belgium.
E namakina te kukurei Lou ngke e raea te tinaniku ae buru ni kaukia. Raraona ae Alice e karaoa ana bootaki n rekenibong, ao ngaia e kaoaki!
Ma ngke e wareka ana beeba ni kakao Lou, e koenako nanona. Tiaki manga bootaki ni kukurei riki teuana n te Tabati, e iango.
Ana utu Lou aki kakaei bootaki n te Tabati. N onean mwiina, a kabanea aia tai n ikotaki, nako n taromauri, ao ni karaoi bwaai tabeua ni kauringa te Tia Kamaiu.
Ma aei te bootaki ni kakukurei ae kaanganga bwa kona aki butimwaia. E na kanga n aki ira ana rekenibong raraona?
“I aki kona n ti ira aei ti ngkai?” E tuangiia ana karo Lou n te tairiki anne. “I ataia bwa a rang kakaawaki bongin te Tabati. Ma I aki tangiria bwa e na boo baiu.”
“Bon te rinerine ae rang kangaanga,” e taetae Tamana. “E tuangiira Tamara are i Karawa bwa ti na karaoa te Tabati bwa te bong ae tabu. Ma e a bon nakoim baireana bwa ko na kanga ni karaoa anne.”
E inga nakoina Tinana. Te Maungatabu ni kabuta e waaki n te wikente aei. Tao e na kona n riki anne bwa am titiraki ae kona anga.”
Ana utu Lou iai kateia ae a kokorea aia titiraki imwain te maungatabu. Ngkanne n tain te maungatabu, a ongora ibukin kaekakiia.
E kanakoa te ang Lou. “E TAMAROA.”
N ana tai imwain matuuna, e korei ana titiraki Lou. E tataro imwiina. “Tamara arei Karawa, I rang kan nako n ira te bootaki aei, ao I aki ataia bwa tera ae N na karaoia. Ko kona ni buokai ni karekea kaekakiu ngkai I mataku n te maungatabu ni kabuta?”
Tabeua te bong imwiina, Lou ma mwanena a kareuatao iaon te kaintekateka. E a boo tain te maungatabu! E korotamnei Lou n ana boki n tain te anene ni kaukuuki. Ngkanne e a waaki te moan tia taetae.
E tararake Lou. Te tia taetae e maroro iaon te bong ae te Tabati! E taku bwa te Atua e kakabwaiaia naake a kawakin Ana tua, riki ngkana e aki roko te kakabwaia n te tai naba anne.
“I taku bwa e a tia ni kaeka au titiraki Tamau are i Karawa. “E rang tawe anne!”
Te bong are imwiin n te reirei, e kaitibo Lou ma Alice n tain te motirawa ae uarereke. “Ko rabwa n am kakao nakoiu nakon am bootaki,” e taku Lou. E ikerake. “Te Tabati bon te bong ae e rangi ni kakaawaki man onoti irou. Ngaia are I aki kona n roko.”
“E Tamaroa” e taku Alice. “I nanokawaki ngkai ko aki roko.”
“Ngai naba,” e taku Lou. “Ma n te Kaonobong, ko kona n irai nakon te trampoline park? Ngkanne ti kona naba n ikotaki n takakaro ao ni bukamarua am rekenibong.”
“I kukurei iai!” E wiingare Alice.
E wiingare rikaaki nakoina Lou. Aki irakin te bootaki bon te rinerine ae kangaanga karaoana. Ma e ataia neiei bwa bon te bwai ae eti karaoana. Ao e kakaitau bwa Tamara are i Karawa e kaeka ana titiraki ae moan te kakaawaki.
Kamataataan korotamnei iroun Flavio Remontti