“Nimaua te Berena ao Uoman te Ika,” Te Rao, Tebetembwa 2025, 2–3.
Man te Beretitentii n te Moanrinan
Nimaua te Berena ao Uoman te Ika
Man te intawiu ma Lucy Stevenson Ewell.
Teuana te karaki ae tatangiria e reke n te Nutetemanti. E raka iaon nimaua te ngaa aomata ake a ongora iroun te Tia Kamaiu ni karokoa e bong. A moanna ni bora ni baki.
E taku temanna ana reirei, “Temanna te teinimwane ikai, ae nimaua te berena ae te barei rouna, ao uoman te ika, ma tera manen baikanne i buoakoia aomata aika uanao?” (Ioane 6:9).
E tuangiia Iesu bwa a na uoti amwarake akekei nakoia, ao E tataro. Imwiina e riki te kakai. E tau te amwarake ibukin kamwarakeaia aomata ni kabane. Ao a tiku te nikira 12 bwaene ni bwerena!
I tangiria bwa kam na uringnga bwa antai ae uoti berena ao te ika. Bon te ataeinimwaane! E anga ni kabane ake irouna nakon te Tia Kamaiu.
Ataei a bon rang ni kakaawaki iroun Tamara are i Karawa. Ngkana ko iriira Iesu Kristo ni buokiia aomata, E na bon kakabwaiako.
Ko Kona Naba n Anga!
Korea tamnein te aro are ko kona iai ni buokiia tabeman.