Iaļ in kōpeļļo̧k meļeļe ko Repidodo
Naan ko Rem̧m̧an im Pidodo
Juon bwebwenato em̧ool jān USA.
Kaci ej ettōn̄ dikdik ke ej jijet jea eo an ilo Būramere Rainin ekar iien kwaļo̧k an ajri ilo iien kwojkwoj eo. Ekar kaam̧jak n̄an ba baat eo an, ak ekar kōm̧m̧ane!
Sister Dench, Būraimere būreejtōn eo, ekar jutak im̧aan. “Em̧m̧an jerbal ilo kweilo̧k in kwojkwoj eo rainin!” liin ekar ba. “Ijeļā bwe kajjojo iami ekar lukkuun jerbal n̄an ekkatak baat eo am̧.”
“Ijjelo̧kin Kaci,” juon iaan ļaddik ro rerūtto ekar ba. “Ejjeļo̧k juon emaron̄ jiron̄ e ta eo ekar ba.”
Sister Dench ekar kōm̧m̧ōn̄e mejān n̄an ļaddik eo, innām oktakļo̧k n̄an Kaci im ettōn̄ dikdik. “Kwaar kōm̧m̧ane juon jerbal em̧m̧an.”
Kaci ekar kajjieon̄ jar jan̄. Ekar kōm̧m̧ane jon̄an eo em̧m̧antata emaron̄e n̄an ekkatak baat eo an. Ak jet iien naan ko an rejjab diwōjtok ilo jejjetier.
Ilo iaļ eo aer n̄an m̧weo im̧ōer, Kaci ekar jab bōjrak an dānnin kōm̧jaļaļaaļ.
“Kweita?” Jinen ekar kajjitōk.
“Juon iaan ļaddik ro ekar kōm̧m̧an kōjan̄ kōn eō. Ekar ba bwe ekar jab jim̧we aō ba baat eo aō.” Ekar jino ļapļo̧k an jan̄.
“Em̧m̧an am̧ kar kōm̧m̧ane. Jemōm̧ im n̄a kōm̧ro ej lukkun uteej būruwōm̧ kōn eok,” Jinen ekar ba. “Kwoj ke jeļā wōn eo juon ej uteej būruwōn kōn kwe?”
Kaci ekar kōjeboluuļ bōran.
“Jemedwōj Ilan̄,” Jinen ekar ba. “Ejeļā bwe kwaar kōm̧m̧ane jon̄an eo em̧m̧antata komaron̄e.”
Kaci ekar em̧m̧anļo̧k an en̄jake. Ekar kōņaan kōjerbal naan ko an n̄an jipan̄ ro jet en̄jake m̧ōņōņō barāinwōt.
Ilo jikuuļ, Kaci ekar jiron̄ļo̧k rūkaki eo an bwe ekar em̧m̧an an katakin.
Ilo m̧weo, Jemān ekar kōm̧m̧ane juon jeļōb. Kaci ekar jiron̄ e bwe em̧m̧an an kōm̧m̧ane jerbal ej kōm̧m̧an bwe m̧weo m̧weer en em̧m̧an.
Inam̧ōj, Kaci im ļaddik eo jatin rej ikkure bo̧o̧ļ ippān doon. Kaci ekar jiron̄ļo̧k e bwe ekar em̧m̧an an kadkad kōn bo̧o̧l eo.
Jiron̄ļo̧k armej bwe em̧m̧an aer kōm̧m̧ane jerbal eo ekar kōm̧m̧an an Kaci en̄jake em̧m̧an ilo būruwōn. Ke leddik eo ekar lo an ro jet ettōn̄, ekar jeļā bwe naan ko an rōm̧era rekar kōm̧m̧an juon oktak eļap.
Kōmeļeļe ko jān Greg Paprocki