Juon Mōnjar Ekāāl n̄an Jamesi
Jamesi ekar oktak an en̄jake ijin jān ke ekar etal n̄an kabun̄ ko aer jet.
Juon bwebwenato em̧ool jān Fiji.
Jamesi ekar etetal ļo̧k n̄an juon wōrwōr edik ijo baam̧le eo an rej kōjparok piik ko nejier ie. “Er kane, piik!” Ekar lutōkļo̧k jet m̧ōn̄ā, im piik ko rekar ainikien n̄ortak ilo aer m̧ōņōņō.
Innām Jamesi ekar kotak bato in aibōj ko rerreo n̄an po̧jet eo namōj. Aibōj ko rem̧ōļo̧ to̧o̧r laļļo̧k n̄an bato ko ke ej kōto̧o̧r po̧jet eo. Naajdik piik ko im etteen̄ dān n̄an baam̧le eo an ekar wāween an kar jipan̄ aolep raan.
“Jamesi!” Jinen eaar kūri. “Pojak ke n̄an jar?”
Jamesi ekar kūne po̧jet eo im kotake bato eo eddo n̄an lowaan m̧weo. “Ij kiiō!”
Aolep Jabōt baam̧le eo an Jamesi rekar etal n̄an juon kabun̄ an Rikūrijin ilo bukwōn eo aer. Ekōņaan ekkatak kōn Jisōs Kraist.
Ejjab etto Jamesi im leddik ro jatin, Unaisi im Marama, rekar etetal ippān ro uwaan baam̧le eo aer jet n̄an m̧ōnjar eo. Jejjo bao ko rekūre rekar jōbwābwe ilo iaļ eo.
Ak ke rekar tōpar ijo, kōjam̧ ko rekar kilōk. “Ikar meļo̧kļo̧k ke m̧ōnjar eo ekar kilōk wiik in im wiin in tok kōnke rūkaki eo ekar etal,” Jemān ekar ba.
“Ebar ke wōr bar juon m̧ōnjar jemaron̄ etal n̄an?” Jamesi ekar kajjitōk. Enaaj kar būrom̧ōj n̄e ekar jab etal n̄an m̧ōnjar wiik in.
Jemān ekar ļōmņak ilo jidik. “Aaet,” ekar ba. “Ij ļōmņak ewōr juon ijeļā kajjeen.”
Jamesi im baam̧le eo an rekar ļoore Jemāer n̄an m̧weo im̧ōer. Aolep rekar iuwe ilo ļoon aļaļ eo ilo m̧aan reba eo. Jemān ekar jijet itulikin ļoon eo n̄an kōjo̧ injin eo.
Ļoon eo ekar jidik kake ilo reba eo. Jamesi ekar reilo̧k n̄an bao ko rej kitileek ilo wōjke ko raitok im m̧aroro. Ālkin enan̄in 15 minit ko, rekar loe juon m̧ōnjar jidikdik. Ewōr juon an jain ekar ba, “Kabun̄ eo an Jisōs Kraist im Armej ro Rekwojarjar ilo Raan Ko Āliktata.”
“En̄in ej m̧ōnjar eo ikar ļōmņak kake,” Jemāer ekar ba. Ekar kattōr ļoon eo n̄an pārijet, im aolep rekar to. Rekar maron̄ ron̄ ainikien al ej itok jān m̧ōnjar eo.
Lowaan, Jamesi ekar jijet ippān jinen im jemān im ajri ro jatin. Rekar ron̄jake rikōnono ro im al ko. Jamesi ekar en̄jake aenōm̧m̧an, en̄jake m̧ōņōņō ibūruwōn.
Ke kweilo̧k eo ekar jem̧ļo̧k, juon kōrā ejouj ekar itok im kōnono n̄an er. “Ewōr juon am kūlaaj ejenolo̧k n̄an ajri ro,” liin ekar ba. “Ņae etan Būramere. Kom̧ kōņaan ke itok?”
Jamesi ekar reilo̧k n̄an leddik ro jatin. Ekar jidik mijak in etal n̄an juon kūlaaj ijo ekar jab jeļā kajjeen jabdewōt ro ie! Eļan̄n̄e ejjab im leddik ro jatin remaron̄ itok barāinwōt, Bōlen enaaj kam̧ōņōņō.
“Aaet,” Jamesi ekar ba.
“Je,moot!” Marama ekar āinwōt em̧ōņōņō.
Jamesi im leddik ro jatin rekar ļoore ļo̧k kōrā eo n̄an juon kūlaaj ruum̧. Ekar lōn̄ ajri ro rej jijet ioon jea ko reddik, kōnono im ettōn̄. Ke Jamesi ekar jijet laļļo̧k, rekar ettōn̄ dikdik n̄an e. Aolep rekar jouj!
Rekar al al ko, im ajri ro jet rekar jipan̄ Jamesi im leddik ro jatin ekkatak naan ko. Innām rekar katak juon katak kōn Jisōs Kraist Jamesi ekar oktak an en̄jake ijin jān ke ekar etal n̄an kabun̄ ko aer jet. Ekar juon oktak em̧m̧an.
Ke ekar m̧ōj jar, baam̧le eo an Jamesi rekar tallōn̄ļo̧k ioon ļoon eo n̄an aer ro̧o̧l n̄an m̧weo m̧weer. Jamesi ekar bar reilo̧k n̄an jain eo itu nam̧ōj in m̧ōnjar eo, Epād etan Jisōs Kraist ioon. Kōn menin ej aikuj in Kabun̄ eo an Jisōs Kraist! Jamesi ekar kōņaan ļoor Jisōs.
“Jemaron̄ ke bar itok n̄an ijin wiik in tok?” Jamesi ekar kajjitōk.
Jinen im jemān rekar ettōn̄ dikdik. “Kōm̧ kar ļōmņake ejja menin wōt,” Jinen ekar ba.
“Yay!” Unaisi ekar laudin̄din̄.
Jamesi ekar maidikdik. Ekar jeļā bwe rekar loe juon men ejenolo̧k. Im ekar jab maron̄ kōttar n̄an ekkatak elapļo̧k.
Kōmeļeļe ko jān Bethany Stancliffe