Jidik Āinwōt Lan̄

Tahira ekar limi jōōt eo an āliktata im likūt ilo kōban̄ eo an. Ekar kōpooji men ko m̧weien n̄an juon tūreep n̄an joļo̧k jōm̧ar eo ippān kōrā nej jinen im eo ulepān ilo Canada. Liin ekar lukkuun m̧ōņōņō ak barāinwōt ikūm̧kūm̧. Canada ekar lukkuun ettoļo̧k jān m̧weo im̧ōn ilo India.

“Epād ke aolep men ko m̧weium̧?” M̧am̧a ear kajjitōk.

“Aaet ij ļōmņak.” Tahira ekar kilōke kōban̄ eo an.

“Enaaj juon iien em̧m̧an n̄an kwe. Lukkuun lale im leļo̧k n̄an jemād Reza im Jined Misu ebbakwij ko jān n̄a,” Mama ekar ba.

Ke Tahira tutok jān baļuun eo ilo Canada, ekar leļo̧k jemād Reza im Jined Misu juon ebbakwij eļap. “Menin ej jān mama,” ekar ba.

Raan ko tok jet raar ilo̧k im alooje bukwōn eo im jikin ko repaake bukwōn eo. Ekar alooje amusement baak eo kein kajuon im lale Niagara Falls. Ekar juon iien ekalimomo!

Ālkin rālep in Jādede eo, Tahira ekar jipan̄ kōm̧ate chicken makhani eo n̄an kōjota eo. Ālkin aer m̧ōn̄ā, Unlepāer Reza ekar kajjitōk ippān juon kajjitōk.

“Kwoj kōņaan ke itok im jar ippem ilju?” ekar kajjitōk. “Kōm̧ijar etal n̄an juon kabun̄ an Rikūrijin. Kōm̧ij ekkatak kōn Jisōs Kraist im gospel eo An ijeņ.”

“Em̧m̧an,” Tahira ekar ba. Mama im Baba rekar tōmak ilo juon kabun̄ eoktak, ak Tahira ekar etal n̄an juon jikuuļ an Rikūrijin ilo India. Etal n̄an juon kabun̄ ekāāl enaaj ke maron̄ oktak.

Raan eo juon, Tahira ej kōņan juon nuknuk kōrā nej jinen ekar leļo̧k bwe en kōņake. Ke rekar tōpar m̧ōnjar eo im deļo̧n̄eļo̧k, aolep rekar al. Tahira ekar bōjrak im jino kalimjōke aolep armej ro. Ekar wōr m̧am̧a ro im baba ro rej jijet ippān ajri ro nejier. Aolep āinwōt rem̧ōņōņō. Al eo ekar lukkuun aiboojoj.

En̄jake in ej āinwōt lan̄, Tahira ekar ļōmņak.

Tahira ekar jijet laļļo̧k ioon juon iaan jea ko raitok ippān eo nej Jinen Misu im nej jemān Reza. Ekar lale ke pileej in pilawe ko im dān ko rej lito litak. Ekar ron̄jake rikōnono ro rej kōnono kōn Jisōs Kraist. Im ekar bar ron̄jake elōn̄ļo̧k al ko. Al eo āliktata ekar kōn baam̧le ko remaron̄ ippān doon n̄an indeeo. Ekar iakwe wāween an naan ko kar kōm̧m̧an an en̄jake.

Ālkin jar eo āliktata, Tahira ekar oktakļo̧k n̄an ippān nej jemān Reza. “Ta meļeļe maron̄ pād ippān doon n̄an indeeo?”

Eo nej jemānReza ekar ettōn̄ dikdik. “Jej tōmak bwe eļan̄n̄e jej ļoore Jisōs Kraist im kōm̧m̧an im kōjparok bujen ko ippān Anij, jemaron̄ mour ilo lan̄ ippān baam̧le ko ad juon raan—aolep ippān doon.”

Tahira ekar en̄jake emāņāān itulowa jān bōran n̄an addiin neen. Ekar kōņaan ļōmņak eo kōn an baam̧le eo an pād ippān doon n̄an indeeo.

Ālkin jar, Tahira ekar ļōmņak wōt kōn al ko raiboojoj. Ekar kōņaan ekkatak eļapļo̧k kōn Jisōs Kraist im baam̧le ko n̄an indeeo. Ekar pepe n̄an ioon mijenede ro. Ke wiik ko rej eļļā, Tahira ekar jeļā eļapļo̧k im eļapļo̧k bwe gospel eo ekar m̧ool.

Tahira ekar kūrļo̧k jinen im jemān im jiron̄ er kōn ta eo ekar ekkatak. Innām ekar kajjitōk ippāer juon kajjitōk eaorōk. “Imaron̄ ke peptaij?” Rekar ba aaet!

Ilo raan in peptaij eo an, Tahira, Unlepān Reza, im nej jinen Misu rekar al “N̄a Nejin Anij.” Eo nej jemān Reza ekar ukōt bwe er ren maron̄ al kake ilo Hindi. Hindi ekar kajin eo ekar kōnono ilo m̧weo im ilo India.

Ke Tahira ekar al, leddik eo ekar en̄jake juon m̧āņāān ilo būruwōn. Ej en̄jake āinwōt lan̄. Im Tahira ekar jeļā bwe kōnke Jisōs Kraist, eļan̄n̄e enej kōjparok kallim̧ur ko an n̄an Jemedwōj Ilan̄, emaron̄ mour ippān jim̧or Er bar juon alen juon raan.

Kōpeļļo̧k PDF

Kōmeļeļe ko jān Ekata Mandal