O Mea Na Tutupu i le Malaga Faaleaoaoga

Sa taufetuli atu Nyamedo i le pasi ma lona uso laitiiti o Kwame. Sa latou a’ea’e i le faasitepu ma nonofo i autafa o se faamalama. Sa tilotilo atu Nyamedo i fafo ma vaaia ai le susulu o le la i laau lanumeamata. Sa malaga le la a’oga i se malaga faaleaoaoga i se nofoaga faasao faalenatura. O le asō o se mea e fiafia i ai!

“Ei, Nyamedo!”

Sa nonofo i lalo uo a Nyamedo o Ralph ma Sierra i le nofoa e faafesagai ma ia.

Sa toso atu e Ralph le lima o Nyamedo ma musumusu atu. “A tatou taunuu i le paka, tatou o loa e sailiili ma suesue!”

“Ioe!” Na fai mai ai Sierra. “E mafai ona tatou faia la tatou lava malaga e fiafia i ai.”

Sa luelue le ulu o Ralph ma le fiafia. “E mafai ona tatou tolotolo ese a o le’i faia le gaoioiga muamua.”

Sa mafaufau Nyamedo i mea uma e ono latou vaaia i le vao. O Laau uumi, manu mananaia, ma atonu o vaitafe!

“E foliga malie lena mea! Tatou faia,” na ia fai mai ai ma se ataata.

Ina ua tu atu le pasi i le nofoaga o le faasao faalenatura, sa o ese faatasi Nyamedo ma Kwame mai le pasi. Sa ta’u atu e o latou faiaoga i tagata uma e nonofo faatasi ma le vaega ma ‘aua nei alu ese se isi.

Sa savali atu Ralph ia Nyamedo. “Manatua le fuafuaga?” Na musumusu atu ai Ralph.

Sa luelue le ulu o Nyamedo. Ae na ia toe taofi lava ma mafaufau. O le matamata ma le suesueina o le vao sa foliga mai o se vaega e faafiafiaina ai, ae sa iloa foi e Nyamedo e mafai ona matautia. Ae faapefea pe afai e leiloloa pe lavevea?

Na faafuasei lava ona ia lagonaina se leo o tautala atu ia te ia. Nofo ma Kwame.

O le leo sa filemu ma itiiti. Sa iloaina e Nyamedo o le Agaga Paia.

Sa popole o ia ina ne’i ita ana uō iā te ia ona o le lē o e matamata ma suesue ma i latou. Ae atonu sa puipui o ia e le Agaga Paia.

Na liliu atu Nyamedo ia Ralph. “Faamalie atu, e tatau ona ou nofo ma lo’u uso,” o lana tala lea. “O ia o la’u matafaioi.”

Na faanonou atu le pupula a Ralph.

“Ae na e fai mai o le a e sau!”

“Sa fai mai le faiaoga e tatau ona tatou nonofo,” o le tala lea a Nyamedo. Sa mapuea Ralph ma savali ese.

Sa o atu Nyamedo ma Kwame ma isi tamaiti aoga ma mulimuli i o latou faiaoga. Muamua sa latou o i le faase’e lea e taupe i se uaea malo. Sa agi atu le matagi i o latou foliga a o latou oso a’e i luga o laau lanumeamata susulu. Sa pei lena mea o lo’o latou felelei!

Na sosoo ai ma le aoaoina o i latou e tagata taiala i le faasao e uiga i nisi o manu sa nonofo ai iina. Sa le mafai e Nyamedo ma Kwame ona faatali e vaai atu i na manu. Na latou aoaoina e uiga i separa, manuki, gata, anetelope, ma le tele o manulele! Ina ua uma ona latou matamata i manu mananaia, ona latou o lea e fe’a’ei i papa ma tietie solofanua. Mulimuli ane, sa latou taaalo i taaloga.

Sa fiafia Nyamedo ua nofo o ia ma Kwame. Ana leai, semanu na te misia le tele o mea malie!

Ina ua oo i le taimi e toe foi ai i le pasi, sa vaai Nyamedo ia Ralph ma Sierra. Sa la taufetuli atu ia te ia.

“Na toetoe lava a tuliina i ma’ua e manuki feitai,” o le musumusu mai lea a Ralph. Sa foliga fefe teisi o ia. “Semanu ma te lavevea.”

Na luelue atu le ulu o Sierra. “E lelei e te le’i sau.”

“Oi sole,” na fai mai ai Nyamedo. “Ua ou fiafia ua saogalemu oulua!”

Sa puipuia moni lava a’u e le Agaga Paia, sa ia mafaufau ai. Sa ia uuina le lima o Kwame a o la oso faatasi i luga o le pasi.

Sa faafetai o ia ona sa tausia i latou e le Agaga Paia ia saogalemu ma fesoasoani ia i latou ia maua se malaga malie.

O Ata na tusia e Cam Kendall