Ua Faasaoina e Maria ma Karolaina Tusitusiga Paia

O Maria Rollins sa 12 tausaga le matua i le taimi muamua na ia aoao ai e uiga i le Tusi a Mamona. Sa ia nonoina mai se kopi ma sa ia ala pea i le tele o le po e faitau ai.

Sa fiafia foi Maria mo se tusi fou e ta’ua o le Tusi o Poloaiga. O le a i ai le tele o aoaoga na tuuina atu e Iesu Keriso ia Iosefa Samita.

Ae o nisi tagata sa le fiafia i le Ekalesia. I se tasi aso, na osofaia ai e alii le fale lea sa lolomiina ai le Tusi o Poloaiga. Sa latou lafoina le masini lomitusi i fafo o le faamalama ma faataapeapeina itulau i le auala.

Sa lafi Maria ma lona uso laitiiti, o Karolaina, ma vaavaai. Sa manao Maria e faasaoina ia itulau a o le’i faaleagaina. Sa fefe Karolaina, ae sa la iloaina o loo i ai i ia itulau le afioga a le Atua.

Sa taufetuli atu nei uso i le auala ma u’u mai le tele o itulau la te mafaia. Sa iloa atu i la’ua e nisi o alii ma fe’ei atu ia i la’ua e taofi. Sa u’u e Maria ma Karolaina ia itulau ma taufetuli atu i se faatoaga sana lata ane.

Sa tuliloa atu i la’ua e ni alii se toalua. Sa faapa’u ifo Maria ma Karolaina i le eleele ma nana itulau i lalo ifo o o la tino. Sa la faalogologo filemu a o sailia i la’ua e alii.

E le’i umi ae fiu nei alii. Sa saogalemu Maria ma Karolaina! Ua la faasaoina itulau! I aso nei o na aoaoga ua lolomiina i le Mataupu Faavae ma Feagaiga.