“Aua Le Mulimuli i Lena Taifau!” Uo, Me 2025, 8–9.
‘Aua Le Mulimuli i Lena Taifau!
O se lagona ea lenei mai le Agaga Paia?
O se tala moni mai le ISA.
“Ta o!” na alaga atu ai Lauren a o ia pasia le auala taavale.
Sa tui e Marcie lona pulou. “O le a ou alu atu!”
Sa vili atu Marcie lana uila i lalo o le auala savali agai i ana uo. E fiafia o ia e taaalo i ituaiga uma o taaloga ma Lauren ma Cassidy. Ae o le mea sili lava, sa fiafia o ia e tietie faatasi ma i la’ua i lana uila.
A o tietie uila teineiti i lalo o le auala savali, sa amata ona mulimuli atu le taifau a le tuaoi, o Rocket, ia i latou.
“Oi leai,” o le tala lea a Cassidy. “E tatau ona tatou o e ave o ia i le fale!”
Ae sa le’i fia alu le taifau i le fale. Sa latou valaau atu ia te ia e faatali mai, ae sa faaauau pea ona alu Rocket. E tusa lava po o le a le mea latou te faia, ae sa tamoe solo o ia ma tata lona siusiu. Sa fiafia o ia!
A o mulimuli atu teineiti ia Rocket, sa iloa e Marcie ua foliga mai ua faaitiitia le tulaga o fale masani. Sa mamao ese atu o ia mai lona auala. E le’i iloa e Marcie se tasi e nofo i nei fale!
O fea a tatou o i ai? Na mafaufau ai Marcie. Pe o le a mafai ona ou toe maua lo’u auala e toe foi ai?
Sa taumafai Marcie e aua le popole ma sa faaauau pea ona tietie uila. Ae na toe foi mai le lagona. Sa i ai se mea na ta’u atu ai ia te ia e tatau ona alu i le fale.
Sa taofi e Marcie lana uila i luga o le auala savali. Sa ia fai atu i se leo leotele, “Atonu e tatau ona tatou toe foi nei!”
“E tatau ona tatou aveina Rocket i le fale!” o le tala lea a Cassidy. Sa faaauau pea ona la tietie uila ma Lauren i le taifau.
Sa lagona pea e Marcie se lagona uiga ese. Aisea na ia lagona ai le popole tele? Pe na lagonaina foi e ana uo?
Atonu o lenei lagona e mo na o a’u lava, o le mafaufau lea o Marcie. Pe sa aumai ea e le Agaga Paia lea lagona? Sa papatisoina o ia ma faamauina i ni nai masina ua mavae, ma sa aoaoina o ia e Tinā ma Tamā e uiga i le faalogo i le Agaga Paia. Sa la’ua fai mai o le a Ia fetalai atu ia te ia ma lagona i lona loto po o mafaufauga i lona mafaufau. Sa ia iloaina o le a Ia taialaina o ia pe afai e faalogo o ia.
Sa ia toe lagonaina le lagona. O le taimi la lea sa matua malosi lava. ‘Aua le mulimuli i lena taifau.
“O le a ou toe foi,” o le valaau atu lea a Marcie i ana uo.
“Ua lelei!” O le tala lea a Lauren.
Sa toe liliu atu Marcie ma toe tietie atu i le ala na sau ai. Ina ua taunuu o ia i le fale, sa ia tuua lana uila i luga o le mutia ma alu i totonu. Sa pisi Tinā i le umukuka.
“Talofa, Tinā,” o le tala lea a Marcie. “Ua ou sau i le fale. Sa lagona le popole i totonu.”
Sa tu Tina. “O le a le mea ua tupu?”
“Sa ou lagonaina se lagona o le lapataiga a o o’u tietie i la’u uila ma a’u uo. O lea na ou sau ai i le fale,” o le tala lea a Marcie. “Ou te manatu o le Agaga Paia.”
Sa opo o ia e Tinā. “Ua ou fiafia lava sa e faalogo i lena lagona.”
Sa lagona e Marcie le mafanafana i totonu. “Ma a’u foi.”
O Ata na tusia e Simini Blocker