O le Apa o Mealilo

“O le a lenei mea, Tinā?” Sa toso mai e Sadie se atigi apa lapoa mai tua o le kapoti. “E leai sona faailoga.”

“Ua galo ia te a’u lena mea,” o le tala lea a Tinā. “Na o ese pepa sa iai igoa o ni oloa tu’u apa, o lea na faatau mai ai e le faleoloa i se tau taugofie. Sa ou faatauina mai se tasi. Sa ou manatu atonu o se apa pi.”

Sa faanonou atu foliga o Sadie. O apa pi e lē o se mea lea e sili ona fiafia i ai.

Sa sii i luga e Tinā le apa ma liliu i le isi itu. “E le o toe mamao ona leaga lea. E sili atu ona tatou aai ai i le asō.” Sa ia tuuina le apa i luga o le laulau.

“O le a lena mea?” O le fesili lea a Jason, le tuagane matua o Sadie

“Ia o ai na iloa?” Na fai mai ai Sadie. “E manatu Tinā o ni pi.”

Sa lulu e Jason le apa. “E lē pa’ō pei o ni pi. Ou te matea o fatu pi.”

Na aumaia e lena mea se manatu ia Sadie. Sa ia uu mai se mea faapipii ma se peni maka ma tusi “pi” i luga o le tasi fasi pepa ma “pi [beans]” i luga o le isi. Sa ia faapipiiina i le apa.

Ona ia mafaufau lea mo sina minute ma tusi le “sosi tamato” i se isi fasipepa.

O le taimi tonu lena na sau ai Tamā i le umukuka. “O le a le mea lea o tupu?”

“O loo matou taaalo i se taaloga,” o le tala lea a Tinā. “Mate po o le a le mea o i totonu o le apa.”

Sa sii i luga e Tama le apa, lulu malosi, ma sogisogi i ai. “Pulouaitu!” na ia faasilasila mai ai.

Sa oi tagata uma. “E le o ni pulouaitu!” Na fai mai ai Sadie. E sili atu ona leaga nai lo pi,fatu pi, ma le sosi tamato. “Atonu e tatau ona tatou tiai ese le apa.”

“E te le fia iloa le mea moni o i totonu?” o le fesili lea a Tinā.

Sa u’u mai e Tama le tala’apa. “Ou te fia iloa!”

A o tatala e Tama le apa, sa ufiufi e Sadie ona mata. Ae ina ua ia tosoina i tua le tapuni, sa faateia o ia. Sa tumu le apa i fualaau aina manaia.

“Manaia!” sa ia fai mai ai a o ia tilotilo atu i pea ua tipiina, vine, cherry, ma peaches.

Sa aumai e Jason ni ipu ma sipuni. “Tatou a’ai!”

Sa asu e Sadie ni fualaau aina mai le apa i lana pesini. “Ou te le talitonu sa sese uma i tatou,” o lana tala lea. “Sa ou mautinoa sa i ai se mea e le lelei i totonu.”

“Pe tatou te faailogaina ea tagata faapena?” o le fesili lea a Tinā.

“O le a le uiga o lau tala?” Na fesili ai Sadie.

Sa tu’u e Tamā lana pesini i luga o le laulau. “Tatou te filifili pe faapei vaega i totonu, ae na pau lava le mea e mafai ona tatou vaaia o fafo.”

Sa mafaufau Sadie i lena mea. “A o fou Samara i le aoga, sa ou manatu e le faauo o ia. Ae na ou iloa ane e le mafai ona ia tautala lelei i la tatou gagana. O lea la ua ma taaalo i taimi uma!”

“O se faataitaiga lelei lena,” o le tala lea a Tina.

“O nisi taimi ou te lagona ai le faailogaina,” o le tala lemu lea a Jason. “Fai mai tamaiti i le aoga pau lava le mea oute maua ai togi lelei ona e fiafia le faiaoga ia te a’u. Ae o le mea moni, ou te galue malosi ma fai a’u meaaoga uma.”

“O faailoga e mafai ona avea ma mea tiga, a ea?” o le tala lea a Tamā.

Sa lue atu le ulu o Jason.

Sa faamae’aina e Sadie lana u mulimuli o fualaau aina. “Ae mata o faailoga uma e leaga? I le faleoloa e tatau ona e iloa le mea moni o loo e faatauina.”

“Sa’o lelei oe,” o le tala lea a Tamā. “Ia, o le a la le taimi e lelei ai?”

Sa sii i luga e Jason lana sipuni. “Pe a moni i latou!”

“Ma o ai e iloa le mea moni o i totonu o se tagata?” o le fesili lea a Tinā.

“O le Tama Faalelagi,” o le tala faatasi lea a Sadie ma Jason.

“Ua ou iloa!” Na fai mai ai Sadie. “O a’u o se afafine o le Atua. O le faailoga sa’o lena mo a’u.”

“Ma a’u,” o le tala lea a Jason.

“Ma a’u!” o le tala lea a Tamā.

“Mo tagata uma.” Na ataata Tinā. “O lea la e le tatau ai ona tatou faailogaina tagata e faavae i mea tatou te vaaia i fafo, pe talitonu i faailoga sese ua tuuina mai ia i tatou. Auā ua na o le Atua lava e silafia lo tatou tulaga moni o i ai i totonu.”

Sa tusi e Sadie se fasi mea faapipii fou ma tu’u i luga o lona ofu mafanafana. “O se afafine o le Atua,” o lana tala lea. Sa ataata Sadie. E sili ona fiafia o ia i lena faailoga.

Buka PDF

O Ata na tusia e Róisín Hahessy