“Fefaasoaai le Susulu o le La,” Uo, Me 2025, 30–31.
O Paionia i Atunuu Uma
Fefaasoaai le Susulu o le La
“O se pese mai la’u ekalesia,” o le tala lea a Ángel.
O se tala moni mai Atenitina.
Sa a’e Ángel i luga o le taavale toso i autafa o Papá. Sa fetoai lemu fagu susu i tua a o savalivali atu i luma a latou solofanua. Sa susulu le la, ma sa faamanatu atu ai ia te ia lana pese e sili ona fiafia i ai.
“E manao Iesu ia ou fai ma sulu,” o le pese lea a Ángel.
I ni nai masina ua mavae, na papatisoina ai Ángel. Sa papatisoina foi Mamá ma lona uso laitiiti o Oscar. E le’i auai Papá i le Ekalesia, ae sa fiafia o ia mo i latou. Sa manatua pea e Ángel le lagona ina ua ia sau i luga mai le vai. Sa pei o le lagona o le susulu mafanafana o lona papatua, ae i totonu.
Sa faaauau pea ona pese Ángel ia te ia lava a o taofi e Papá le taavale toso i fafo o le fale o Señora Perez. Sa oso i lalo Ángel ma uu mai se fagu susu mai tua. O Señora Perez o se tasi o tagata faatau a lona aiga.
“O le kiliva!” o lana tala lea.
Sa faigaluega Señora Perez i lana togalaau. “Faafetai lava,” sa ia fai mai ai, ma ave le fagu. Sa ia tuuina atu ia te ia ni tupe siliva. “O le a lena pese sa e usuina?”
Sa lagonaina e Ángel le mafanafana o ona alafau. Na te lei iloaina sa lagona mai e le fafine o ia!
“O se pese mai la’u ekalesia,” o le tala lea a Ángel. “O Le Ekalesia a Iesu Keriso o le Au Paia o Aso e Gata Ai.”
Sa ataata Señora Perez. “Aisea e te le ta’u mai ai ia te a’u se mea e uiga i lau ekalesia?”
Mo sina taimi, sa le mautinoa e Ángel le mea e fai atu. Ona ia fai atu lea, “Matou te talitonu o le ekalesia lava lea na faatuina e Iesu Keriso a o soifua o Ia i le lalolagi ua toe i ai iinei.”
“Manaia,” o le tala lea a Señora Perez. “Ou te le’i faalogo lava i se ekalesia e talitonu i lena mea.”
“Atonu e mafai ona e sau i se isi taimi,” o le tala lea a Ángel. “Manuia le aso!” Ona ia toe tamoe atu lea ia Papá e fesoasoani e avatu susu na totoe.
I le taeao po o le Aso Sa, na ala a’e ai Ángel. Sa mafai ona ia faalogoina Mamá i le umukuka o faia le malutaeao.
“Oscar,” o le tala lea a Ángel, “ua oo i le taimi e saunia ai mo le lotu!”
Sa fai e Ángel ma Oscar o la ofu o le lotu ma sauni e o ese atu. Na toeitiiti atoa le lua maila le mamao o le falelotu. Sa umi se savaliga, o lea sa tatau ai ona latou vave o ese.
“Ia tou maua se taimi fiafia,” o le tala lea a Papá a o latou o ese.
A o latou savavali, sa toe faaleoina e Ángel lana pese e sili ona fiafia i ai. Sa ia pesepese a o latou pasia fale sa ia avatu ai le susu. Sa ia pesepese a o latou pasia le tulaga o fualaau aina i le maketi. Ma sa ia pesepese a o latou liliu agai atu i le auala sa i ai le falelotu.
Ina ua latou la’a atu i totonu, sa faateia Ángel. Sa i ai iina Señora Perez! Sa ia aumaia lona aiga atoa faatasi ma ia.
“Ua e sau i le lotu!” Na fai mai ai Ángel.
Sa luelue le ulu o Señora Perez. “Sa musuia a’u i lau pese,” o lana tala lea. “Sa ou valaau atu i lou tinā mo le tuatusi. Sa ou manao e sau e aoao e uiga i lenei ekalesia mo a’u lava ia.”
Sa ataata Ángel. Sa ia faasoa atu le talalelei i le na o le usuina o se pese. Sa faamoemoe o ia e mafai foi e Señora Perez ona lagonaina sina susulu o le la i lona loto i le asō.
O Ata na tusia e Jomike Teijido