O Gaoioiga o le Sau, Mulimuli Mai ia te A’u

Ua aoao mai e tusitusiga paia le tāua o le mulimuli i poloaiga a le Atua (tagai i le Mataupu Faavae ma Feagaiga 42). Tuu atu i se tagata e toatasi e avea ma taitai ma tu i luma o le vaega. A latou fai mai “moli lanumeamata,” e mafai e tagata uma ona agai i luma. Pe a latou fai mai “moli mūmū,” e tatau ona tu faamalō tagata uma!

O le a ilia e se agelu se pu pe a toe afio mai Iesu Keriso (tagai i le Mataupu Faavae ma Feagaiga 45:45). Fai lau oe lava pu pepa! Lola se fasi pepa i se foliga kone ma faapipii i se mea faapipii ina ia tapuni ai. E mafai foi ona e faaopoopoina se ‘au i lau pu po o ni li’o mo faamau. Ona faataitai lea o le tautala i lau pu ma ta’u atu pe aisea e te alofa ai ia Iesu Keriso.

E tuuina mai e le Atua meaalofa faaleagaga i tagata uma. O lona uiga na te faamanuiaina i tatou i taleni e ala mai i le Agaga Paia (tagai i le Mataupu Faavae ma Feagaiga 46:11–33). Saili se fagu po o se ipu e leai se mea o i ai. I luga o ni fasi pepa, tusi ni taleni po o ni meaalofa eseese atonu e i ai i se tasi. Ia feauauai i le filifilia mai le fagu ma faaigoa se tasi e te iloa o loo i ai lena meaalofa!

O le talalelei a Iesu Keriso e masani ona ta’ua o le feagaiga tumau-faavavau (tagai i le Mataupu Faavae ma Feagaiga 49:9, 12–14). Ua ta’ua foi e Peresitene Nelson o le ala o le feagaiga. I luga o ni nai fasipepa, tusi i lalo auala e mafai ona tatou mulimuli ai ia Iesu Keriso. Fai se ala i pepa ma feauauai e savavali ai luga.