Tibwuaan Otana

E tamwarake Ángel iaon te kaa nako rarikin Papá. Bwatoro ni miriki ibuki a rebwerebwe ngke a tabe ni karaurau n nakonako aia aoti. E otanako taai, ao e kauringnga n ana anene ae mamate nanona iai.

“Jesus wants me for a sunbeam,” e anene Ángel.

Tabeua te namwakaina n nako, ao e a tia Ángel ni bwabetitoaki. Mamá ao tarina ae uarereke, Oscar, a bwabetitoaki naba. E aki kaaina te Ekaretia Papá, ma e kukurei irouia. E teimatoa n uringnga Ángel aron ana namakin ngke a teirake man te ran. Bon ti tebo ma aron kabubuen otan taai are i akuuna, ma inanona.

E teimatoa Ángel n anene ngke e katea te kaa Papá itinanikun ana auti Señora Perez. E ruo Ángel ao e ana te bwatoro ni miriki mai buki. Señora Perez bon temanna mai ibuakoia ana katitamwa.

“E roko nikiran ami bwai!” e taku.

Señora Perez e mwakuri n ana onaroka. “Ko rabwa,” e taku, ao e anaa te bwatoro. E anganna tabeua te mwane. “Tera te anene are ko aneneia?”

E namakina te bobotika Angel. E aki ataia ae e a tia n ongo ana anene!

“Bon te anene man au ekaretia,” e taku Ángel. “Ana Ekaretia Iesu Kristo Ibukiia Aika Itiaki ni Boong aika Kaitira.”

E ngare Señora Perez. “Ao tera ae ko kona tuangai ibukin am ekaretia?”

E aki kaeka Ángel tabeua te tai, bukina bwa e aki koaua n te bwai ae na taekinna. Imwiina ao e taku, “Ti kakoaua bwa te Ekaretia e bon kateia Iesu Kristo ngke E mena iaon te aba e a tia ni manga kaokaki.”

“E kakaongora,” e taku Señora Perez. “I tuai man ongo taekan te ekaretia ae onimaki n aron anne.”

“Tao ko kona n roko n te tai teuana,” e taku Ángel. “Tekeraoi am bong!” Imwiina ao e biri rikaaki nakon Papá ni buokia ni tibwatibwai nikiran ana miriki.

Ni moantaain moaningabongin te Tabati, e uti Ángel. E kona n ongo ana kakamwakuri Mamá n te tabo ni kuuka ni karaoa te kaingabong.

“Oscar,” e taku Ángel, “e a boo te tai ni katauraoi ibukin te taromauri!”

A karin aia kunnikai n taromauri Ángel ao Oscar ao n tauraoi n nako. Raroan te tabo n taromauri e kaniia uota te maire raroana. Bon te nakonako ae abwabwaki, ngaia ae a na moan n taai n nako.

“E na tekeraoi te mwananga,” E taku Papá ngke a nako.

Ngke a tabe n nakonako, ao e a manga anenea kunana Ángel ae tatangiria. E anene ni karaurau ngke a rirarikin auti are e anganiia te miriki. E anene inanona ngke a rirarikin te tabo n uanikai ae tei n te mwakete. Ao e anene ni karaurau ngke a bwake nakon te kawai are e mena iai te umwantabu.

Ngke a rin inanona, e rang ni miimi Ángel. Señora Perez e mena ikekei! E kairiia kaain ana utu ni kabane ma ngaia.

“Ko roko n taromauri!” E taku Ángel.

E katoutoua atuna Señora Perez. “I kaungaaki man am anene,” e taku. “I wetea tinam ibukin te tabo. I tangiria n roko n reiakina taekan te ekaretia aei bon ibukiu.”

E ngare Ángel. E a tia n tibwaua te euangkerio ti man anenean te kuna. E kantaningaia bwa e na namakina te kukurei Señora Perez inanona n te bong naba aei.

Te kamataata n te tamnei iroun Jomike Teijido