“Tai Ira te Kamea Anne!” Te Rao, Meei 2025, 8–9.
Tai Ira te Kamea Anne!
Bon te namakin mairoun te Te Tamnei ae Raoiroi?
Te karaki ae koaua man te USA.
“Ti a nako!” e takarua Lauren ngke e a kitana te kawai.
E katokaa otangan atuna Marcie. “I a roko!”
E bweena ana bwatika Marcie rikaaki n te kawai n nakonako nakoia raoraona. E tangiria n takakaro n aekan takakaro nako ma Lauren ao Cassidy. Ma angiin te tai, e tangiria ni buti n ana bwatika mangaia.
Ngke a buti n aia bwatika ataeinnaine n te tabo n nakonako, e iririia aia kamea kaain rarikina, Rocket.
“O tiaki anne,” e taku Cassidy. “Ti riai ni kaokia rikaaki nakon mweengana!”
Ma e aki tangiria te kamea n okira mweengana. A tuangnga bwa e na toki, ma e bon teimatoa Rocket ni waaki nako. E aki tabe ma te bwai ae a karaoia, e biri aitua ao ni katiotioa bukina. A rangii ni kukurei!
Ngke a tabe ataeinnaine n ira Rocket, e namakinna Marcie bwa a moanna n raroanako taian auti ao man mena n te tao ae aki tataneiei iai. E a moanna n raroanako man ana kaawa. E aki kinaia aomata Marcie aika a maeka n auti aikai!
Ti na nakea? E iango Marcie. N na kona ni kunea kawaiu n oki?
E kataia Marcie n aki raraoma ao n teimatoa ni buti n ana bwatika. Ma e a manga roko naba te namakin. Iai te bwai ae tuangnga bwa e riai n okira mweengana.
E katoka ana bwatika n te tabo n nakonako. E taku n te bwanaa ae korakora, “Tao ti a bon riai n oki ngkai!”
“Ti riai ni kaoka Rocket nakon mweengana!” e taku Cassidy. Ngaia ma Lauren a teimatoa ni buti n aia bwatika n rimwiin te kamea.
E teimatoa Marcie n namakina te maroaa. Bukin tera e namakina te raraoma? A namakinna naba raoraona?
Tao te namakin aei bon ti ibukiu, e iango Marcie. Mairoun te Te Tamnei ae Raoiroi aei? E a tia ni bwabetitoaki ao ni kamatoaaki tabeua te namwakaina n nako, ao a tia Tinana ao Tamana n reireina arona ni kakauongo nakon te Tamnei ae Raoiroi. A taekinna bwa E na taetae nakoina ma namakin inanona ke iango n ana iango. E ataia ae E na kairia ngkana e kakauongo.
E a manga namakina naba te namakin anne. N te tai aei e a bon korakora riki. Tai ira te kamea anne.
“N nang oki rikaaki,” e weteia raoraona Marcie.
“NGAIA!” E taku Lauren.
E rairaki Marcie ao n oki n te kawai are e bon moan roko mai iai. Ngke e a roko ni mweengana, e katuka ana bwatika i aon te uteute ao e nako n rin. E tabetabe tinau i nanon te umwanikuuka.
“Mauri, Tinau,” e taku Marcie. I a oki. I raraoma i nanou.”
E katoka ana mwakuri tinau. “Tera ae riki?”
“I namakina te kauring ngke I buti n au bwatika ma raoraou. Ngaia ae I a oki,” e taku Marcie. “I ataia bwa bon te Tamnei ae Raoiroi.”
E inga nakoina Tinana. “I kukurei bwa ko kakauongo nakon te namakin anne.”
E namakina te kukurei Marcie i nanona. “Ngai naba.”
Kamataata n te korotamnei iroun Simini Blocker