O Se Talanoaga ma Melvis e uiga i le Faamanatuga

E iva o’u tausaga, ma ou te sau mai Nigeria. Ou te tautala i gagana e lua, o le Igbo ma le Igilisi. O mea ou te fiafia i ai o le soka ma le taalo i taaloga. E toafa tagata i lo’u aiga—o a’u, o’u matua, ma lo’u tuafafine.

O mea ou te fiafia i ai e uiga i le nofo ai i Meleisia o meaai ma le aganuu. O le meaai e sili ona ou fiafia i ai o le nasi goreng (araisa falai). I la’u aoga matou te faamanatuina ai le Tausaga Fou Lunar ma isi aso malolo mai aganuu eseese.

E ala i le tagofia o le faamanatuga, ua ou faafouina ai feagaiga ma folafolaga sa ou faia i le Tama Faalelagi. Ou te iloa o le tagofiaina o le faamanatuga ma le tausia o a’u feagaiga e aumaia ai faamanuiaga, e pei o le i ai o Lona Agaga e faatasi ma a’u, taiala a’u, ma tuuina mai ia te a’u le faamafanafanaga e fetaiai ai ma luitau.

Ou te taumafai e mulimuli ia Iesu ma ola i se auala faa-Keriso i le aluga o le vaiaso. I le sauniga faamanatuga ou te fiafia e usu viiga. I le taimi o le faamanatuga, ou te faia ai se tatalo le leoa i lo’u loto, ma ou te taumafai ia migao.

Ou te faia le mea sili ou te mafaia e faalogologo ai i lauga pe a uma le faamanatuga. Ou te fiafia e tusi ni faamatalaga a o o’u faalogologo. Ona ou talanoa lea pe a uma le lotu e uiga i mea sa ou aoaoina faatasi ma lo’u tina ma lo’u tuafafine.

Ou te faia pea lava pea tatalo i le taeao ma lo’u aiga i aso uma. I le aoga, ou te faatagaina tamaiti o la’u vasega e faaaoga la’u komepiuta feaveai i le taimi o le vasega pe a galo ia i latou a latou komepiuta feaveai i le fale. Ou te faasoa atu foi a’u meaai mama i tamaiti o le vasega e leai ni meaai mama.

Ou te fai atu ia i latou e faasaoloto o latou mafaufau mai o latou popolega ma isi mea uma. Tau lava o le mafaufau i faamanuiaga ma le alofa o le Atua i o latou olaga.