O Le Tatalo o le Piano

Sa tatala e Miguel lana musika piano ma sioa atu i nota uliuli o loo i le itulau. Faatoa uma ona tuuina atu e lona faiaoga ia te ia se pese fou e ta. Sa foliga mai e faigata tele! O le a umi se taimi e aoao ai.

Sa tuu ona tamatamailima i luga o ki ma amata ona saili mo nota sa’o i luga o le piano. Piliki, piliki, PALAKI. Sa ia ta pea lava pea ki sese a o ia tata.

Ai sea na le mafai ai ona ia maua nota sao? O lenei pese sa sili atu ona faigata nai lo pese a le Peraimeri sa fiafia o ia e ta. Sa matuai le fiafia o ia! Sa ia faamamafa i lalo ona lima i ki o le piano. Poloka!

“Miguel?” O le valaau lea a Mamá. “O lelei mea uma iina?”

“Ioe.” Sa mapuea Miguel. “E faigata tele lenei pese.”

Sa savali atu Mamá i totonu o le potu. “Ou te faamalie atu ua e le fiafia. Na e tatalo ae e te le’i amata faataitai?”

“Leai.” E le’i mafaufau Miguel i lena mea.

“Pe a ou aoaoina se mea fou, ou te fiafia e fai se tatalo ae ou te le’i faataitai. O loo i ai iinei le Tama Faalelagi e fesoasoani ia i tatou. E le afaina pe o e taalo i taaloga, faia se lauga i le lotu, po o le taina o le piano. E mafai lava ona tatou ole atu ia te Ia mo se fesoasoani, aua e le mafai ona tatou faia i taimi uma na o i tatou.”

Pe mafai moni ea ona fesoasoani le tatalo ia te ia e aoao ai lana pese fou i luga o le piano? Sa ia filifili e taumafai e fai.

O le aso na sosoo ai na toe nofo ai Miguel i lalo i le piano, ua sauni e faataitai. Ae a o le’i amataina, sa ia manatua e tatalo.

“Tama Faalelagi e,” na ia fai atu ai, “fesoasoani mai ia te a’u e aoao la’u pese fou. E faigata ona aoao, ae ou te iloa e mafai ona ou faia i Lau fesoasoani.”

Ona ia faaiuina lea i le faafetai i le Tama Faalelagi mo ana faamanuiaga. Sa toamalie ona lima, ma sa saunia o ia e faataitai.

Sa amata ona ia mauaina lemu ia nota i luga o ki ma taina le tasi ma le isi. Sa faaauau pea ona ia faataitai. Ae na te le’i iloaina, na mafai ona ia taina le amataga o le pese! Na te le’i matauina foi le umi na ia faataitai ai.

Sa onoono mai le ulu o Mamá i totonu o le potu. “Oka, Miguel. Ua matuā maoae mai le leo!”

“Faafetai,” o le tala lea a Miguel. “Ou te manatu o le faia o se tatalo ae ou te le’i faataitaia na fesoasoani ia te a’u e onosai ai ma aoao sina vaega i lea taimi.” Sa ia susue i itulau o le pese. “E sili atu nai lo le taumafai e aoao uma i le taimi e tasi.”

“E lelei lau amataga!” Sa fai atu ai Mamá ma se ataata. “Ae e te le’i iloaina, o le a e aoaoina le pese atoa.”

Sa toe ataata atu Miguel. Ona tuu lea o ona lima i luga o ki ma amata ona tata.

O Ata na tusia e Tracy Nishimura Bishop